O artigo 52 do Decreto 199/2002, do 6 de xuño, establece, na redacción resultante do Decreto 233/2004, do 23 de setembro, que o modificou e integrou o Decreto 35/2004, do 6 de febreiro, polo que se regulaban as subvencións no marco do programa bolsa de vivenda en alugueiro do Instituto Galego da Vivenda e Solo (IGVS), prevía que pola inclusión da vivenda na bolsa de alugueiro o IGVS concederíalle ao arrendador, con cargo a fondos da comunidade autónoma, entre outros beneficios, un servizo gratuito de defensa xurídica para a reclamación de rendas vencidas e non pagadas. Este servizo veuse prestando e seguirase a prestar para todos os arrendadores incluídos no programa da bolsa de vivenda en alugueiro que así o solicitaron.

O artigo 52 citado establece, para estes efectos, que os arrendadores se comprometen a outorgar os poderes de representación oportunos para a súa defensa xurídica por avogado e procurador, designados polo Instituto Galego da Vivenda e Solo.

Ao mesmo tempo, e dado que o IGVS debe apoderar os profesionais que han asumir a defensa dos arrendadores, e para unha maior axilidade na tramitación, cómpre delegar a dita competencia, que corresponde á presidenta do IGVS por ter a súa representación oficial, no director xeral do dito organismo autónomo.

Na súa virtude, facendo uso das facultades que me conceden os artigos 10 e 11 c) da Lei 3/1988, do 27 de abril, de creación do IGVS, e o artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, e demais disposicións de xeral aplicación,

DISPOÑO:

Primeiro.-Delégase no director xeral do Instituto Galego da Vivenda e Solo a competencia para representar ao IGVS no outorgamento das escrituras de apoderamento a avogados e/ou procuradores, precisas para o exercicio das accións que teñan por obxecto a reclamación das rendas vencidas e impagadas polos respectivos arrendatarios aos arrendadores acollidos ao programa de bolsa de vivenda en aluguer, no marco do disposto polo artigo 52 do Decreto 199/2002, do 6 de xuño, na súa redacción dada polo Decreto 233/2004, do 23 de setembro.

Segundo.-As escrituras de apoderamento que se asinen facendo uso desta delegación farán constar expresamente esta circunstancia.

Terceiro.-Esta delegación efectúase sen prexuízo de que a presidenta do IGVS poida reasumir en calquera momento a competencia delegada.

Santiago de Compostela, 5 de marzo de 2007.

Teresa Táboas Veleiro

Presidenta do Instituto Galego da Vivenda e Solo

SERVIZO GALEGO DE PROMOCIÓN DA IGUALDADE DO HOME

E DA MULLER