Dentro das actividades programadas para o ano 2007, e conforme as funcións atribuídas pola Lei 1/2007, do 15 de xaneiro, de creación da Academia Galega de Seguridade Pública, anúnciase a realización dun curso sobre policía xudicial, inspección ocular e instrución de atestados, que deberá desenvolverse conforme as seguintes bases:
Obxectivos.
Coñecer a actuación policial como policía xudicial, afondando na necesidade da elaboración de atestados e dilixencias preprocesuais, con rigor e técnica procedemental, de tal xeito que se poidan constituír no plenario como proba de cargo.
Destinatarios.
O curso vai dirixido aos membros dos corpos de Policía Local de Galicia.
Inscrición.
A inscrición dos participantes será totalmente gratuíta.
Prazas.
30.
Solicitudes.
1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo.
2. O prazo para a presentación de instancias rematará o día 16 de marzo de 2007, ás 14.00 horas.
3. As instancias deberán enviarse á Academia Galega de Seguridade Pública, sita na avenida da Cultura, s/n, 36680 A Estrada; ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Datas.
O curso realizarase en datas do 27 ao 29 de marzo.
O horario será de 9.30 a 14.00 h e de 15.30 a 19.00 horas, e o día 29 de 9.30 a 13.30 horas.
Contido.
Módulo I: a policía xudicial e os principios básicos que informan a súa actuación.
Módulo II: o atestado policial e a instrución técnica de dilixencias preprocesuais.
Módulo III: o testimonio policial e a reprodución das actuacións policiais na fase de plenario.
Relación de admitidos.
A relación de admitidos farase pública o día 20 de marzo a partir das 14.00 horas, no taboleiro de anuncios da Academia Galega de Seguridade Pública e na páxina web http://agasp.xunta.es, ou ben poden coñecer e confirmar a súa asistencia chamando ao teléfono 986 59 02 41.
Lugar.
O curso desenvolverase na Academia Galega de Seguridade Pública, sita na avenida da Cultura, s/n, no Concello da Estrada.
Certificado de asistencia.
Ao remate do curso entregaráselles un certificado de asistencia a aquelas persoas que acrediten a súa participación continuada a el.
Modificacións.
A Academia Galega de Seguridade Pública poderá modificar o desenvolvemento do curso para adaptalo ás necesidades da Administración e ás continxencias que poidan xurdir.
A Estrada, 13 de febreiro de 2007.
Carlos Suárez-Mira Rodríguez
Director xeral da Academia Galega de Seguridade
Pública
