Dentro das actividades programadas para o ano 2007, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase a realización dun curso sobre deontoloxía policial, que se desenvolverá a través da internet, que deberá levarse a cabo conforme as seguintes bases:

Obxectivos.

-Coñecer o marco ético da actuación profesional dos membros das forzas e corpos de seguridade, tendo en conta as disposicións xurídicas vixentes e os códigos de conduta nacionais e internacionais.

-Capacitar ao alumno para valorar o comportamento socioprofesional naquelas situacións máis delicadas e/ou conflitivas, de xeito que a resposta se adecúe aos requirimentos ético-xurídicos e de actuación profesional.

Destinatarios.

O curso vai dirixido aos membros das forzas e corpos de seguridade en xeral, tendo preferencia os membros das policías locais e da policía autonómica.

Inscrición.

A inscrición dos participantes será totalmente gratuíta.

Prazas e selección.

Ata 75 prazas, que serán outorgadas por rigorosa orde de entrada de solicitudes, tendo en conta o disposto no punto de destinatarios.

Solicitudes.

1. O persoal que desexe participar neste curso deberá presentar, cuberta á máquina ou con letra moi clara, a instancia que figura no anexo, pero tamén a través do correo electrónico, sen prexuízo da acreditación posterior.

2. O prazo para a presentación de instancias rematará o día 27 de febreiro ás 14.00 horas.

3. As instancias deberán enviarse á Academia Galega de Seguridade Pública, sita na Avenida da Cultura, s/n, 36680 A Estrada; por correo electrónico a través da páxina web http://agasp.xunta.es, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.

Datas.

O curso realizarase desde o 5 ao 20 de marzo e terá unha valoración de carga horaria de 25 horas lectivas.

Contido.

Módulos:

1. Actuacións en relación coas persoas.

2. Actuacións nas relacións internas.

3. Fundamento dos principios básicos de actuación.

Requirimentos técnicos mínimos para os equipamentos dos alumnos.

Os requirimentos técnicos para usar a web dos cursos da AGASP (baseada nunha ferramenta de aprendizaxe electrónica ou e-learning son de nivel básico:

Hardware.

A configuración mínima dun PC doméstico (en xeral, calquera con menos de cinco anos) é suficiente.

Software.

Calquera navegador web actual (de versión recente) sobre calquera sistema operativo de uso común.

Por exemplo:

-En windows pódense empregar o Mozilla Firefox o Opera ou o Internet Explorer.

-En Linux pódese empregar o Firefox, o Konqueror ou o Opera.

Comunicacións.

Para acceder á estrutura de xestión do curso abonda unha conexión de baixa velocidade (por exemplo: unha conexión telefónica con módem a 40 Kbps permite interactuar comodamente coa ferramenta de xestión do curso).

Temporalización dos contidos e probas parciais.

Neste procedemento os contidos do curso irán sendo facilitados aos alumnos en etapas sucesivas, do seguinte xeito:

-O día 5 de marzo o primeiro módulo, do cal haberá un exame tipo test con tempo limitado, tendo o alumno a necesidade de superalo para poder continuar no curso.

-Unha vez superada esta proba, os alumnos terán acceso ao segundo módulo, do cal haberá tamén unha proba ao seu remate.

-E por último, no caso de superala, terá acceso ao último módulo que tamén comportará a realización dunha proba final.

Proba final e certificado de aproveitamento.

O día 20 de marzo ás 17.30 horas, os alumnos que opten ao certificado de aproveitamento deberán superar unha proba presencial final do conxunto dos contidos, o que lles dará acceso a este certificado. Noutro caso outorgaráselles certificado de participación activa. Os lugares de desenvolvemento desta proba serán comunicados oportunamente.

Incompatibilidade.

A participación neste curso resultará incompatible coa admisión do alumno noutra actividade da AGASP que se desenvolva pola internet ou en edicións anteriores desta mesma temática.

Relación de admitidos.

A relación de admitidos farase pública o día 2 de marzo a partir das 14.00 horas, no taboleiro de anuncios da Academia Galega de Seguridade Pública e na páxina web http://agasp.xunta.es, ou ben poden coñecer e confirmar a súa asistencia chamando ao teléfono 986 59 02 41.

Modificacións.

A Academia Galega de Seguridade Pública poderá modificar o desenvolvemento do curso para adaptalo ás necesidades da Administración e ás continxencias que poidan xurdir.

A Estrada, 8 de febreiro de 2007.

Carlos Suárez-Mira Rodríguez

Director xeral da Academia Galega de

Seguridade Pública