Os servizos de transporte público discrecional de viaxeiros por estrada, prestados con vehículos de menos de dez prazas, incluída a do condutor, e realizados ao amparo de autorizacións de transporte documentadas en tarxetas da clase VT, encóntranse sometidos ao réxime tarifario que se regula nos artigos 18 e 19 da Lei 16/1987, do 30 de xullo, de ordenación dos transportes terrestres, e 28 e 29 do seu regulamento, aprobado polo Real decreto 1211/1990, do 28 de setembro.
O artigo 19 da referida lei establece que as tarifas do transporte público deberán cubrir a totalidade dos custos reais en condicións normais de produtividade e organización, debendo permitir un razoable beneficio empresarial e unha correcta prestación do servizo, sen que se deixen de retribuír, se é o caso, as prestacións complementarias.
Pola súa parte, o segundo parágrafo, alínea d), do artigo 5 da Lei orgánica 5/1987, do 30 de xullo, delega nas comunidades autónomas a facultade de fixar as tarifas correspondentes aos servizos prestados ao amparo de autorizacións cuxo ámbito territorial exceda do dunha comunidade autónoma.
O incremento dos custos de explotación, especialmente o referido ao gasóleo, desde a aprobación da Orde do 15 de decembro de 2005 (DOG nº 250, do venres 30 de decembro) aconsella a súa actualización e a conseguinte revisión das tarifas de aplicación.
No procedemento de elaboración desta orde emitiu informe o Consello Galego de Transportes, de conformidade co previsto no Decreto 230/1986, do 10 de xullo, polo que se regula a súa estrutura, composición e funcións.
Artigo 1º.-Ámbito de aplicación.
1. O réxime de tarifas establecido nesta orde aplicarase aos servizos interurbanos de transporte público de viaxeiros con orixe en Galicia, e prestados, ao amparo de autorizacións documentadas en tarxeta VT-N, en vehículos de menos de 10 prazas, incluído o condutor.
2. Quedan fóra desta regulación as autorizacións de arrendamento de vehículos con condutor.
Artigo 2º.-Tarifas.
1. Os servizos previstos no artigo anterior prestaranse con suxeición ás seguintes tarifas máximas, impostos incluídos:
-Prezo por km percorrido: 0,94 euros.
-Prezo por hora de espera: 12,38 euros.
-Mínimo de percepción: 2,82 euros.
-Suplemento para domingo, festivo ou nocturno (entre as 22.00 e as 6.00 horas en días laborables e entre as 0.00 e as 24 horas en domingos e festivos): 20%.
2. Os tempos de espera motivados polo abandono temporal do coche polo usuario facturaranse a razón de 3,10 euros por fracción de 15 minutos. Durante o transcurso da primeira hora de espera, o usuario terá dereito a dispoñer gratuitamente dun tempo de espera de 15 minutos.
Artigo 3º.-Taxímetro.
1. Os titulares de autorizacións de transporte documentadas en tarxetas VT-N poderán instalar un taxímetro homologado, calquera que sexa a localidade en que teña residencia a súa autorización de transporte.
2. Os vehículos provistos de taxímetro deberán, sen prexuízo da aplicación da tarifa urbana se é o caso aprobada, determinar en todo caso o prezo do servizo mediante o taxímetro que se axustará aos pasos por tempo ou por quilómetro nas contías seguintes:
-Valor do paso: 0,05 euros.
-Metros por salto: 53,19.
-Segundos por salto: 14,53.
-Metros primeiro salto: 3.000.
-Tempo primeiro salto: 14'.
3. A percepción mínima prevista no artigo 2º subsumirá os saltos correspondentes de distancia e tempo, de forma que tan só a partir da distancia ou do tempo correspondente ao primeiro salto comezarán a computarse os pasos sucesivos.
Artigo 4º.-Vehículos non provistos de taxímetro.
1. Aos servizos prestados por taxis non provistos de taxímetro seranlles de aplicación as tarifas establecidas por km percorrido, prezo por hora de espera e mínimo de percepción.
2. O mínimo de percepción cubrirá os 3 primeiros quilómetros, polo que non será acumulable á tarifa de distancia por cada quilómetro ou fracción.
Artigo 5º.-Publicación das tarifas.
Os vehículos aos que se refire esta orde deberán expoñer as tarifas interurbanas vixentes de forma visible no interior do vehículo segundo o modelo recollido no anexo a esta orde, sen prexuízo da obriga de expoñer, se é o caso, as tarifas urbanas de forma independente.
Artigo 6º.-Cálculo da tarifa.
1. As tarifas establecidas nesta disposición refírense, en todo caso, á contratación por coche completo.
Os titulares de vehículos non provistos de taxímetro deberán aplicar a tarifa por distancia aos quilómetros e á fracción de quilómetro percorridos que determine o contaquilómetros do vehículo.
Antes do inicio da viaxe deberase poñer o contaquilómetros parcial a cero, comunicándolle ao usuario a dita circunstancia.
2. O usuario determinará o itinerario do servizo de transporte antes da súa iniciación. No suposto de que se contrate a realización do traxecto de ida por autoestrada, correrá por conta do usuario o custo das peaxes de ida e de retorno.
No resto dos supostos, deberase seguir a ruta máis curta das posibles, debendo o condutor manifestarlle ao usuario as modificacións do dito percorrido cando concorran causas de forza maior ou circunstancias que aconsellen unha ruta alternativa.
3. O prezo por distancia establecido nesta orde aplicarase ao traxecto de ida.
Cando o usuario do servizo decida retornar ao punto de inicio por un itinerario máis longo, o transportista, ademais dos suplementos que correspondan por espera no lugar de destino, terá dereito a cobrar o incremento de quilómetros, respecto á viaxe de ida, conforme o valor establecido por quilómetro ou fracción.
Artigo 7º.-Percorridos mixtos.
Cando o servizo contratado conte cun tramo urbano e outro interurbano aplicarase a tarifa urbana ata os límites establecidos pola ordenanza correspondente e, a partir do dito punto, a tarifa regulada nesta orde. O condutor do vehículo deberá advertirlle ao usuario a dita circunstancia no momento que cambie o réxime de tarifas.
Artigo 8º.-Emisión de facturas.
1. O contratante do servizo poderá exixir unha factura en que se reflictan os puntos de inicio e finalización do servizo, a tarifa resultante do percorrido e, se é o caso, a contía dos suplementos por espera, horario nocturno e días festivos.
2. Cando o vehículo non estea provisto de aparello taxímetro deberase consignar a quilometraxe na viaxe de ida e, se é o caso, o suplemento establecido no parágrafo segundo do punto 3 do artigo 6º.
3. Sempre que os contratantes estipulasen unha tarifa antes do inicio do servizo, a dita circunstancia deberá quedar reflectida na factura, así como a indicación proporcionada polo transportista do custo do servizo cando o contratante do servizo demande a inclusión da dita mención.
Artigo 9º.-Equipaxes.
1. O usuario terá dereito ao transporte gratuíto de equipaxes de ata 75 kg de peso nos vehículos de ata 4 prazas, e de 90 kg nos de capacidade superior, sempre que o seu volume permita transportalos no maleteiro ou na baca do vehículo sen contravir as normas de tráfico e circulación.
2. Cando non se utilicen o número total de prazas poderanse incrementar as ditas cifras a razón de 30 kg por asento libre, sempre que o condutor do vehículo acceda a isto e as dimensións e natureza da equipaxe permitan o seu transporte.
Artigo 10º.-Devolución de cambio.
1. Na prestación dos servizos de transporte regulados nesta orde non existirá a obriga de proporcionar a devolución de billetes con valor facial superior a 50 euros.
2. O dito límite elevarase á contía necesaria sempre que a diferenza entre o billete ofrecido e o importe do transporte non exceda de 50 euros.
Artigo 11º.-Transportes con orixe ou saída nalgún aeroporto.
A directora xeral de transportes queda facultada para autorizar o establecemento, logo de audiencia dos concellos afectados e da asociación provincial de taxis correspondente, dun suplemento específico de aplicación aos servizos de taxi con orixe ou saída nalgún dos aeroportos da comunidade autónoma.
Disposición derradeira
Única.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 31 de xaneiro de 2007.
María José Caride Estévez
Conselleira de Política Territorial, Obras Públicas
e Transporte
ANEXO
Tarifas de taxis para servizos discrecionais de transporte de viaxeiros con autorización de clase VT-N, en percorridos con orixe en Galicia.
Prezo por quilómetro (viaxe de ida só): 0,94 euros.
Mínimo de percepción: 2,82 euros.
Prezo por hora de espera: 12,38 euros.
Prezo de fracción 15 minutos: 3,10 euros.
Suplemento de tarifa de domingos, festivos e nocturno (das 22.00 ás 6.00 horas en días laborables e entre as 0.00 e as 24 horas en domingos e festivos): 20%.
Valor do paso equivalente a 53,19 metros ou 14,53 segundos: 0,05 euros.
Condicións aplicables:
1. As tarifas levan incluídos os impostos.
2. Os servizos contrátanse por coche completo e as tarifas compútanse só na viaxe de ida, salvo que as partes contratantes acorden computar o retorno.
3. Non existe obriga de facilitar cambio superior a 50 euros.
4. Existe un libro de reclamacións ao dispor dos usuarios.
5. A percepción mínima corresponde a un primeiro salto de 3.000 metros ou 14'.
6. Durante o transcurso da primeira hora de espera o usuario terá dereito a dispoñer dun tempo de espera
de quince minutos. Transcorrido este, computarase por fracción de quince minutos a razón de 3,10 por cada fracción.
Vehículo matrícula:
Titular da autorización: