O Estatuto de autonomía de Galicia, no seu artigo 31, establece como competencia plena da Comunidade Autónoma de Galicia a regulación e administración do ensino en toda a súa extensión, niveis e graos, modalidades e especialidades, no ámbito das súas competencias.
O Real decreto 1754/1987, do 18 de decembro (BOE do 19 de xaneiro de 1988, DOG do 17 de febreiro de 1988), transferiulle á Comunidade Autónoma competencias en materia de universidades. Estas competencias foron asumidas pola Comunidade Autónoma e asignadas á Consellería de Educación e Ordenación Universitaria no Decreto 62/1988, do 17 de marzo (DOG do 8 de abril).
A Lei orgánica 6/2001, do 21 de decembro, de universidades, no artigo 8.2º establece que a implantación e supresión de ensinanzas conducentes á obtención de títulos universitarios de carácter oficial e a validez en todo o territorio nacional serán acordadas pola comunidade autónoma, ben por proposta do Consello Social ou ben por propia iniciativa co acordo do referido consello, en todo caso logo do informe do Consello de Goberno da universidade.
No uso da autorización outorgada ao Goberno polo artigo 88.2º da Lei orgánica 6/2001, de universidades, do 21 de decembro, ditouse o Real decreto 56/2005, do 21 de xaneiro, polo que se regulan os estudos universitarios oficiais de posgrao. Estes estudos de posgrao teñen como finalidade a especialización do estudante na súa formación académica, profesional ou investigadora e articúlanse en programas integrados polas ensinanzas conducentes á obtención dos títulos de máster ou doutor. Este real decreto regula o marco xurídico das ensinanzas de posgrao, en consonancia coas liñas xerais emanadas do Espazo Europeo de Educación Superior. No artigo 5, modificado polo Real decreto 1509/2005, do 16 de decembro, se establece que a implantación dos programas oficiais de posgrao será acordada pola comunidade autónoma correspondente, de acordo co que establece o artigo 8.2º da Lei orgánica de universidades.
No ámbito autonómico esta materia está regulada no Decreto 259/1994, do 29 de xullo (DOG do 16 de agosto), polo que se establece o procedemento para a creación e recoñecemento de universidades, centros universitarios e autorización de estudos na Comunidade Autónoma de Galicia. No seu artigo 3.1º establécese que a autorización para a implantación de estudos no ámbito territorial propio da comunidade autónoma farase por decreto do Consello
da Xunta de Galicia, por proposta do Consello Social da universidade galega xa autorizada e logo do informe do Consello Galego de Universidades.
Baixo a formulación xeral exposta, neste decreto considérase a implantación de estudos conducentes aos títulos de máster e doutor no sistema universitario de Galicia, unha vez cumpridos xa todos os requisitos previos ao acto formal de autorización por parte da Xunta de Galicia.
A construción dun Espazo Europeo de Educación Superior, organizado polos principios de calidade, mobilidade, diversidade e competitividade oriéntase á consecución, entre outros obxectivos, dun sistema baseado fundamentalmente en dous niveis principais de ensino: grao e posgrao. Neste proceso de converxencia destaca a relevancia dos estudos europeos de posgrao como un dos principais elementos para reforzar a educación superior europea no contexto internacional e a acreditación dos estudos para asegurar un nivel de calidade adecuado.
A reforma do modelo iníciase coa regulación da estrutura das ensinanzas universitarias e a regulación dos estudos de grao dada polo Real decreto 55/2005, do 21 de xaneiro, polo que o proceso de implantación das novas ensinanzas oficiais de posgrao dependerá da configuración do novo catálogo de títulos oficiais de grao no marco do proceso de converxencia europea e dos prazos previsibles para súa posta en marcha, que se desenvolverá de forma progresiva ata o ano 2010.
A oferta de ensinanzas oficiais de posgrao ten que deseñarse co obxecto de atender fundamentalmente á demanda dos actuais titulados universitarios que desexen recibir unha especialización adicional ou formación investigadora e a de profesionais titulados universitarios que decidan actualizar os seus coñecementos e destrezas ou modificar o seu perfil. Así mesmo ten que responder ás necesidades de Galicia cunha oferta coordinada, integrada e complementaria no sistema universitario de Galicia.
Os programas de posgrao que se van implantar están pensados nunha oferta versátil que se adapta ao perfil do alumno actual e futuro, que responde ás necesidades socioeconómicas galegas, ás expectativas de formación dos alumnos e ás necesidades estruturais de funcionamento das universidades.
Por todo isto, en aplicación do artigo 8.2º da Lei orgánica 6/2001, do 21 de decembro, de universidades, por proposta dos consellos sociais das universidades de Santiago de Compostela, A Coruña e Vigo, cos informes dos consellos de goberno das respectivas universidades, logo do informe favorable do Consello Galego de Universidades, en exercicio das competencias sinaladas na Lei 2/2003, do 22 de maio, en uso das atribucións conferidas pola Lei 1/1983, do 22 de febreiro, reguladora da Xunta e do seu presidente, por proposta da conselleira de Educación e Ordenación Universitaria e logo da deli
beración do Consello da Xunta de Galicia na súa reunión do un de febreiro de dous mil sete,
DISPOÑO:
Artigo 1º
Conceder autorización, no sistema universitario de Galicia, para a implantación dos estudos oficiais de posgrao para o curso 2007/2008 que se relacionan nos anexos I, II e III deste decreto.
Disposicións adicionais
Primeira.-Respecto da homologación dos plans de estudos, as universidades ateranse ao disposto no artigo 35 da Lei 6/2001, do 21 de decembro, de universidades e a regulación contida no Real decreto 49/2004, do 19 de xaneiro, sobre homologación de plans de estudos e títulos de carácter oficial e validez en todo o territorio nacional.
Segunda.-A efectiva impartición de estudos autorizados neste decreto queda condicionada ao procedemento ordinario que cumpra segundo o establecido no artigo 35.4º da Lei 6/2001, do 21 de decembro, de universidades e no Real decreto 49/2004, do 19 de xaneiro, sobre homologación de plans de estudos e títulos de carácter oficial e validez en todo o territorio nacional.
Disposicións derradeiras
Primeira.-Autorízase a conselleira de Educación e Ordenación Universitaria para que, no ámbito das súas competencias, dite as disposicións necesarias para o desenvolvemento deste decreto.
Segunda.-Este decreto entrará en vigor o día seguinte ao da súa publicación no Diario Oficial de Galicia.
Santiago de Compostela, un de febreiro de dous mil sete.
Emilio Pérez Touriño
Presidente
Laura Sánchez Piñón
Conselleira de Educación e Ordenación Universitaria
ANEXO I
PROGRAMAS OFICIAIS DE POSGRAO (POP) NO SISTEMA
UNIVERSITARIO DE GALICIA
POP Título Univ.
Dereito urbanístico e do medio ambiente Máster en dereito urbanístico e do medio ambiente UVigo
Dereito Máster en asesoramento xurídico empresarial. Esp. en dereito inmobiliario e da construción, dereito ambiental e dereito urbanístico UDC
Educación, xénero e igualdade Máster en educación, xénero e igualdade. Esp. en investigación e deseño de programas e intervención educativa USC
Doutor
Economía e empresa Máster en xestión e políticas públicas UDC
Doutor
POP Título Univ.
Desenvolvemento rexional e integración económica Máster en desenvolvemento rexional e integración económica. Esp. en desenvolvemento rexional e integración económica USC
Doutor
Lingua e usos profesionais Máster en lingua e usos profesionais: español, galego e inglés UDC
Saúde, discapacidade, dependencia e sociedade Máster en intervención na discapacidade e na dependencia UDC
Doutor
Intervención logopédica Máster en intervención logopédica na infancia e na adolescencia UDC
Ciencias da saúde Máster en asistencia e investigación sanitaria:-Esp. avances en medicina clínica-Esp. reeducación funcional, autonomía persoal e calidade de vida-Esp. fundamentos de investigación biomédica UDC
Doutor
Enxeñaría marítima Máster en enxeñaría marítima UDC
Doutor
Enxeñaría industrial Máster en enxeñaría e tecnoloxía industrial UDC
Seguridade integral Máster en prevención de riscos laborais UVigo
Prevención en riscos laborais e saúde medioambiental Máster en prevención en riscos laborais e saúde medioambiental USC
Rehabilitación arquitectónica Máster en rehabilitación arquitectónica UDC
Enerxía e sustentabilidade Máster en enerxía e sustentabilidade UVigo
Enerxías renovables e sustentabilidade enerxética Máster en enerxías renovables e sustentabilidade enerxética USC
Doutor
Enxeñaría para o desenvolvemento rural Máster en enxeñaría para o medio rural USC
Industrias lácteas Máster en ciencia e tecnoloxía das industrias lácteas USC
Química teórica e modelización computacional Doutor UVigo
Ciencia e tecnoloxía ambiental Máster en ciencia e tecnoloxía ambiental UDC
Xestión e dirección laboral Máster en xestión e dirección laboral: esp. en seguridade social, xestión de recursos humanos, xestión sociolaboral UVigo, UDC, USC
Fotónica e tecnoloxías do láser Máster en fotónica e tecnoloxías do láser UVigo, UDC, USC
Doutor
Estatística e investigación operativa Máster en técnicas estatísticas USC, UDC, UVigo
Doutor
Ciencia e tecnoloxía química Máster en química avanzada (transformación en interuniv. incorporación UVI) USC, UVigo
Doutor
ANEXO II
PROGRAMAS OFICIAIS DE POSGRAO INTERUNIVERSITARIOS
INTERCOMUNITARIOS
POP Título Univ.
Lóxica e filosofía da ciencia Máster en lóxica e filosofía da ciencia USAL, UAM, USC, UVA, UCM, UV, ULL, UMA
Doutor
Ciencias da visión Máster de investigación das ciencias da visión:-Esp. biomédica-Esp. físico-óptica UVA, USC, UM, U. Coimbra, UCM, UMH
Doutor
Tecnoloxías da información e comunicacións en sistemas de telecomunicación Máster en tecnoloxías da información e comunicacións en redes móbiles UNIZAR, UDC, UPV, UNIOVI, UNICAN
Doutor
Ciencia e tecnoloxía química Máster interuniversitario en química orgánica UB, UAM, UCM, USC
Química teórica e modelización computacional Máster en Theoretical chemistry and computational modelling UAM, UVigo
ANEXO III
PROGRAMAS DE DOUTORAMENTO ENMARCADOS EN PROGRAMAS
OFICIAIS DE POSGRAO PRESENTADOS O ANO ANTERIOR
POP Título Univ.
Xerontoloxía Doutor USC, UDC
Neurociencia Doutor USC, UDC, UVigo
Estudos de xénero Doutor UVigo
Historia contemporánea Doutor UAM, USC, UAB, UIMP
Urbanismo: plans e proxectos. Do territorio á cidade Doutor UDC
Ciencia e tecnoloxía agroalimentaria Doutor UVigo
Enxeñaría biotecnolóxica Doutor USC
Métodos matemáticos e simulación numérica en enxeñaría e ciencias aplicadas Doutor USC, UDC, UVigo
Física aplicada Doutor UVigo, UDC
Química ambiental e fundamental Doutor UDC
USAL: UNIVERSIDADE DE SALAMANCA
UCM: UNIVERSIDADE COMPLUTENSE DE MADRID
UVA: UNIVERSIDADE DE VALLADOLID
UB: UNIVERSIDADE DE BARCELONA
UNIZAR: UNIVERSIDADE DE ZARAGOZA
USC: UNIVERSIDADE DE SANTIAGO DE COMPOSTELA
UV: UNIVERSIDADE DE VALENCIA
UNIOVI: UNIVERSIDADE DE OVIEDO
ULL: UNIVERSIDADE DE LA LAGUNA
UM: UNIVERSIDADE DE MURCIA
UIMP: UNIVERSIDADE INTERNACIONAL MENÉNDEZ PELAYO
UAB: UNIVERSIDADE AUTÓNOMA DE BARCELONA
UAM: UNIVERSIDADE AUTÓNOMA DE MADRID
UPV: UNIVERSIDADE DO PAÍS VASCO
UNICAN: UNIVERSIDADE DE CANTABRIA
UMA: UNIVERSIDADE DE MÁLAGA
UDC: UNIVERSIDADE DA CORUÑA
UVigo: UNIVERSIDADE DE VIGO
UMH: UNIVERSIDADE MIGUEL HERNÁNDEZ
U COIMBRA: UNIVERSIDADE DE COIMBRA
