En desenvolvemento das prescricións contidas na Lei 9/1997, do 21 de agosto, de ordenación e promoción do turismo en Galicia, aprobouse o Decreto 143/2006, do 27 de xullo, polo que se establece

a ordenación dos campamentos de turismo en Galicia.

Esta norma supuxo a adecuación da normativa turística á nova realidade dos campamentos de turismo, actualizando tanto os requisitos de instalación, funcionamento e servizos como o réxime administrativo que, ata a súa entrada en vigor, estaban regulamentados polo Decreto 236/1985, do 24 de outubro, agora derrogado.

Aínda que son numerosas as novidades que introduce o Decreto 143/2006, interesa destacar a nova regulamentación disposta para a obtención da preceptiva autorización turística, simplificándose os trámites procedimentais. En concreto, substitúese a obrigatoria consulta sobre as posibilidades legais do campamento por unha potestativa solicitude de informe previo indicativo.

Nesta liña, o artigo 68 ofrécelle ao interesado a posibilidade de solicitar un informe previo indicativo sobre o cumprimento dos requisitos sinalados nesta norma e que determine a viabilidade do proxecto para efectos da administración turística.

Aínda que queda claro ao longo da norma o carácter potestativo do informe previo indicativo, o artigo 73, relativo á documentación exixida para a obtención da autorización de apertura e clasificación turística, fala de preceptivo informe indicativo. Polo tanto, para o principio de seguridade xurídica, parece necesaria unha modificación do dito precepto, co obxecto de reafirmar o carácter potestativo do informe previo indicativo.

Tamén se fai preciso modificar os modelos de solicitude incluídos como anexos II, III e IV da norma para incluír a lexislación aplicable en cada procedemento.

Na súa virtude, por proposta do conselleiro de Innovación e Industria, e no uso das atribucións que me confire a Lei 1/1983, do 22 de febreiro, reguladora da Xunta e do seu presidente, logo de deliberación do Consello da Xunta de Galicia na súa reunión do dez de xaneiro de dous mil sete,

DISPOÑO:

Artigo único.-Modificación do Decreto 143/2006, do 27 de xullo, polo que se establece a ordenación dos campamentos de turismo de Galicia.

O Decreto 143/2006, do 27 de xullo, polo que se establece a ordenación dos campamentos de turismo de Galicia, queda redactado nos seguintes termos:

Un. O artigo 73 h) queda redactado do seguinte xeito:

«No caso de que se tivesen efectuado modificacións sobre o proxecto achegado durante a tramitación do informe indicativo, novo proxecto técnico».

Dous. Os anexos II, III e IV quedan redactados do seguinte xeito:

Tres. Engádese unha disposición adicional, que queda redactada do seguinte xeito:

«Facúltase o/a titular da consellería competente en materia de turismo para ditar as ordes oportunas para a modificación dos anexos II, III e IV desta norma».

Disposición derradeira

Este decreto entrará en vigor ao día seguinte ao da súa publicación no Diario Oficial de Galicia.

Santiago de Compostela, dez de xaneiro de dous mil sete.

Emilio Pérez Touriño

Presidente

Fernando X. Blanco Álvarez

Conselleiro de Innovación e Industria