Con data do 18 de outubro de 2006 a Vicepresidencia da Igualdade e do Benestar solicitoulle á Secretaría Xeral e do Patrimonio a tramitación do expediente de aceptación da cesión de uso dun inmoble en Ribeira.
O uso do inmoble foi cedido a título gratuíto pola entidade financeira Caixa Galicia mediante acordo do Consello de Administración do 30 de marzo de 2006, posteriormente ratificado en sesión ordinaria pola Asemblea Xeral o 6 de maio de 2006.
A Secretaría Xeral e do Patrimonio tramitou o correspondente expediente de aceptación de cesión, de conformidade co disposto nos artigos 16, 17 e 23 da Lei 3/1985, do 12 de abril, do patrimonio da Comunidade Autónoma de Galicia, e 33, 34 e 38 do Decreto 50/1989, do 9 de marzo, polo que se aproba o regulamento para a execución da dita lei.
Na súa virtude, por proposta do conselleiro de Economía e Facenda, logo da deliberación do Consello
da Xunta de Galicia, na súa reunión de dezaoito de xaneiro de dous mil sete,
DISPOÑO:
Artigo 1º
Acéptase nos termos establecidos por Caixa Galicia a cesión a título gratuíto do dereito de uso dun inmoble situado en Ribeira, na avenida Malecón, dunha superficie útil aproximada de 650 m, que forma parte dun edificio que se estende e linda na súa parte traseira coa rúa Xeneral Franco, pola esquerda coa rúa Cardeal Cisneros, onde ten un acceso, e pola fronte coa avenida do Malecón (anteriormente rúa de José Antonio), onde ten o seu acceso principal.
Figura inscrito no rexistro da propiedade de Noia, no tomo 1070, libro 277, folio 67, predio 10.988.
Artigo 2º
O prazo de duración do dereito de uso será de cinco anos, contados a partir da data da sinatura da correspondente escritura pública.
Artigo 3º
A Consellería de Economía e Facenda, a través da Secretaría Xeral e do Patrimonio, procederá á formalización da cesión no correspondente documento público.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo todos os trámites necesarios para a efectividade deste decreto.
Santiago de Compostela, dezaoito de xaneiro de dous mil sete.
Emilio Pérez Touriño
Presidente
José Ramón Fernández Antonio
Conselleiro de Economía e Facenda