O conxunto mínimo básico de datos de hospitalización de agudos (CMBDH) é unha colección de parte dos datos de que dispoñen os establecementos sanitarios con réxime de internamento sobre cada paciente atendido e que se recollen, no momento da alta, do informe clínico e/ou historia correspondente. O informe de alta hospitalaria é o documento básico de información para o paciente hospitalizado e para os profesionais dos distintos niveis asistenciais.

Respecto da utilidade do CMBDH, como é ben coñecido, resulta un elemento fundamental na información a nivel asistencial, de xestión do propio hospital, de planificación, epidemiolóxico e de investigación.

Son requisitos imprescindibles para a operabilidade do conxunto mínimo básico de datos a exhaustividade e a normalización dos criterios de codificación, que implican codificación centralizada, persoal especificado con formación homoxénea e a utilización dun sistema de clasificación axeitado.

O sistema de clasificación máis utilizado internacionalmente é a Clasificación Internacional de Enfermidades, 9ª revisión, modificación clínica (CIE-9-MC), que sofre modificacións periódicas para adaptarse aos cambios e avances das ciencias biomédicas.

O conxunto mínimo básico de datos de alta hospitalaria regúlase en Galicia por orde da Consellería de Sanidade do 7 de abril de 1993 (Diario Oficial de Galicia número 77, do 26 de abril).

A Resolución do 16 de xullo de 2004, da Secretaría Xeral da Consellería de Sanidade, establece o uso da CIE-9-MC, 4ª edición en castelán reactualizada para a codificación diagnóstica en Galicia (Diario Oficial de Galicia número 145, do 28 de xullo) e alude ao conxunto mínimo básico de datos de hospitalización de agudos (CMBDH).

Na Comunidade Autónoma de Galicia realízase o esforzo de transformar o histórico de CMBDH autonómico á última edición da CIE que estea en vigor, co fin de permitir a explotación de series temporais de grande importancia tanto para a planificación como para a xestión.

En consecuencia, e en virtude das facultades que me confire a disposición derradeira primeira da orde da Consellería de Sanidade do 7 de abril de 1993,

RESOLVO:

1. Todos os centros sanitarios galegos con réxime de internamento quedan obrigados a utilizar, para a elaboración do conxunto mínimo básico de datos (CMBDH) a que se refire a orde da Consellería de Sanidade do 7 de abril de 1993, a Clasificación Internacional de Enfermidades, 9ª revisión, modificación clínica (CIE-9-MC) na súa quinta edición en castelán.

2. O histórico do CMBDH autonómico correspondente ao ano 2006 transformarase á CIE-9-MC, 5ª edición en castelán, por parte da Subdirección Xeral de Información e de Servizos Tecnolóxicos da Secretaría Xeral da Consellería de Sanidade.

3. Esta resolución deixa sen efecto a do 16 de xullo de 2004, da Secretaría Xeral da Consellería de Sanidade, que establecía o uso da CIE-9-MC, 4ª edición en castelán reactualizada, para a codificación diagnóstica en Galicia.

Santiago de Compostela, 13 de decembro de 2006.

José Manuel Peña Penabad

Secretario xeral da Consellería de Sanidade