O pasado mes de novembro producíronse en Galicia novas inundacións que seguen a devastar o territorio da nosa comunidade autónoma.
O Goberno galego, ponderando a magnitude dos feitos e as súas consecuencias, atendendo o principio de solidariedade e en coherencia coas medidas adoptadas en situacións similares precedentes, acordou, na súa reunión do día 7 de decembro, a adopción de novas medidas e axudas para reparar e paliar, na medida do posible, os danos causados.
O devandito acordo, que adoptou a forma de decreto, foi publicado no Diario Oficial de Galicia do día 11 de decembro e recolle entre as medidas urxentes para lles facer fronte aos danos provocados en infraestruturas locais, o establecemento de axudas e a actuación directa sobre os bens afectados.
Por outra parte, o artigo 11 do devandito decreto dispón que as citadas axudas se financiarán con cargo aos orzamentos das respectivas consellerías afectadas, e a disposición derradeira primeira faculta os titulares dos departamentos autonómicos para que, no ámbito das súas competencias, diten as disposicións necesarias para o seu desenvolvemento.
Xa que logo, e no uso das facultades que me confire a Lei 1/1983, do 22 de febreiro, reguladora da Xunta e do seu presidente,
DISPOÑO:
Artigo 1º.-Obxecto e ámbito de aplicación.
1. Esta orde ten por obxecto o desenvolvemento das medidas urxentes, previstas no Decreto 227/2006, do 7 de decembro, para a reparación dos danos que, causados polas inundacións acaecidas en Galicia durante o pasado mes de novembro, afectasen a rede de estradas locais e os seus elementos funcionais e auxiliares de titularidade pública.
2. As medidas previstas nesta orde serán de aplicación para a reparación dos danos que, incluídos no seu obxecto, se producisen no ámbito territorial dos concellos que se relacionan no anexo I.
Artigo 2º.-Actuación directa sobre os bens afectados.
De acordo co previsto no artigo 9 do Decreto 227/2006, do 7 de decembro, a Consellería de Política Territorial, Obras Públicas e Transportes poderá realizar, cos seus propios medios ou acudindo á contratación administrativa, os traballos dirixidos a reparar os danos incluídos no obxecto desta orde.
No suposto de que a execución se faga mediante contrato administrativo será de aplicación o réxime previsto no artigo 4º do devandito decreto.
Será necesario que o correspondente concello se comprometa a poñer á súa disposición os terreos necesarios así como os pertinentes permisos e autorizacións, e manifeste a obriga de asumir, unha vez recibidas as obras e logo da comunicación desta consellería, a súa explotación, mantemento e conservación.
Artigo 3º.-Créditos orzamentarios.
As actuacións realizadas ao abeiro do previsto nesta orde financiaranse con cargo ás seguintes aplicacións dos orzamentos da consellería.
Aplicación orzamentariaCódigo de proxectoContía
08.03.413B.600.12006.006302.000.000 A
08.03.413B.610.12006.006311.000.000 A
Disposición derradeira
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 14 de decembro de 2006.
María José Caride Estévez
Conselleira de Política Territorial, Obras Públicas
e Transportes
ANEXO
Relación dos concellos incluídos no ámbito
de aplicación do Decreto 227/2006
Provincia da Coruña:
Arzúa, Padrón, A Pobra do Caramiñal, Rianxo, Ribeira, Rois.
Provincia de Pontevedra:
Bueu, Caldas de Reis, Cambados, Cangas, Catoira, Cuntis, A Illa de Arousa, Marín, Meaño, Meis, Moaña, O Grove, Poio, Pontevedra, Portas, Ribadumia, Sanxenxo, Valga, Vilaboa, Vilagarcía de Arousa e Vilanova de Arousa.
