Segundo o disposto no artigo 31 do Estatuto de autonomía de Galicia, é competencia da Comunidade Autónoma de Galicia a regulamentación e administración do ensino en toda a súa extensión, niveis e graos, modalidades e especialidades, e de acordo co artigo 1 do Decreto 585/2005, do 29 de decembro (DOG do 9 de xaneiro de 2006), a Consellería de Educación e Ordenación Universitaria é o órgano da Administración da Comunidade Autónoma de Galicia ao cal lle corresponden estas competencias.
Os conservatorios de música de titularidade municipal levan a cabo un importante labor no fomento, difusión e extensión das ensinanzas de música por todo o territorio da Comunidade Autónoma de Galicia, e teñen unha grande importancia para o desenvolvemento integral dos nenos e mozos, contribuíndo así ao enriquecemento da vida cultural dos concellos.
Por Orde do 26 de setembro de 2005 (DOG do 14 de outubro) autorizáronse determinados conservatorios de música de titularidade municipal a impartir, con carácter provisional durante o ano escolar 2005-2006, os graos elemental e/ou medio das ensinanzas de música.
Tendo en conta que os conservatorios que no anexo desta orde se reflicten, non remataron as obras para obter a correspondente autorización definitiva e co obxecto de garantir a continuidade dos seus estudos do alumnado que está a cursar estudos de música nestes conservatorios, e logo do compromiso escrito dos concellos titulares deses centros de levar a cabo as actuacións necesarias para dar cumprimento efectivo aos requisitos mínimos de instalacións e de currículo, co fin de que se lles poida conceder a autorización definitiva, é polo que esta consellería, por proposta da Dirección Xeral de Ordenación e Innovación Educativa
DISPÓN:
Primeiro.-Autorizar os conservatorios de música de titularidade municipal que figuran no anexo a esta orde, para impartir, con carácter provisional durante o ano escolar 2006-2007, os graos elemental e/ou medio das ensinanzas de música.
Segundo.-Os órganos competentes dos concellos titulares destes conservatorios teñen a obriga de cumprir o compromiso adquirido de levar a cabo todas as actuacións necesarias nestes centros educativos para adaptalos aos requisitos mínimos exixidos regulamentariamente e coa antelación suficiente para poder tramitar e conceder a correspondente autorización definitiva antes do inicio do ano escolar 2007-2008.
Disposión derradeira
Facúltanse as direccións xerais de Ordenación e Innovación Educativa e a de Formación Profesional e Ensinanzas Especiais para ditar as normas necesarias para o desenvolvemento desta.
Santiago de Compostela, 5 de outubro de 2006.
Laura Sánchez Piñón
Conselleira de Educación e Ordenación
Universitaria
ANEXO
Provincia: Ourense.
Concello: O Carballiño.
Localidade: O Carballiño.
Código do centro: 32016522.
Titular: Concello do Carballiño.
Centro: conservatorio profesional de música do Carballiño.
Autorización provisional: grao medio.
Concello: Ribadavia.
Localidade: Ribadavia.
Código do centro: 32016546.
Titular: Concello de Ribadavia.
Centro: conservatorio profesional de música de Ribadavia.
Autorización provisional: grao medio.
Concello: Xinzo de Limia.
Localidade: Xinzo de Limia.
Código do centro: 32016534.
Titular: Concello de Xinzo de Limia.
Centro: conservatorio profesional de música de Xinzo de Limia.
Autorización provisional: grao medio.
Provincia: Pontevedra.
Concello: A Guarda.
Localidade: A Guarda.
Código do centro: 36024288.
Titular: Concello da Guarda.
Centro: conservatorio elemental de música da Guarda.
Autorización provisional: grao elemental.
Concello: Ponteareas.
Localidade: Ponteareas.
Código do centro: 36018367.
Titular: Concello de Ponteareas.
Centro: conservatorio profesional de música Reveriano Soutullo de Ponteareas.
Autorización provisional: grao medio.
