No Diario Oficial de Galicia nº 60, do 27 de marzo de 2006 publicouse a Orde do 17 de marzo de 2006 pola que se aproban as bases reguladoras para a concesión de axudas para o sector artesanal galego, en réxime de concorrencia competitiva, no ámbito da Comunidade Autónoma de Galicia, e se procede á súa convocatoria para o ano 2006.
No artigo 15 parágrafo primeiro da devandita orde establécese que a presentación da documentación xustificativa da realización do investimento que fose obxecto da subvención poderá realizarse ata o día 3 de novembro de 2006, inclusive.
Tendo en conta que o elevado número de solicitudes motivou un dilatado proceso de revisión administrativa dos respectivos expedientes, considérase necesario ampliar o prazo de xustificación dos investimentos levados a cabo polos solicitantes.
Na súa virtude, e en uso das facultades que me foron concedidas,
DISPOÑO:
Artigo único.
Modifícase o artigo 15 parágrafo 1º da Orde do 17 de marzo de 2006 pola que se aproban as bases reguladoras para a concesión de axudas para o sector artesanal galego, en réxime de concorrencia competitiva, no ámbito da Comunidade Autónoma de Galicia, e se procede á súa convocatoria para o ano 2006 que queda redactado como a seguir se expón:
«Para o libramento da subvención, o beneficiario deberá presentar na respectiva delegación provincial ou nos servizos centrais da Consellería de Innovación e Industria, ou a través dalgunha das formas recollidas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro, a documentación xustificativa da realización do investimento que fose obxecto de subvención, tendo de prazo ata o 20 de novembro de 2006, inclusive».
Disposición derradeira
Única.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 29 de setembro de 2006.
Fernando Xabier Blanco Álvarez
Conselleiro de Innovación e Industria