No Diario Oficial de Galicia nº 111, do 12 de xuño de 2006, publicouse a Orde do 1 de xuño de 2006 pola que se establecen as bases e se procede á convocatoria para o ano 2006, en réxime de concorrencia competitiva, de axudas para a realización de actuacións e estratexias de promoción e internacionalización das empresas galegas.

No artigo 15 punto 1º da devandita orde establécese que o beneficiario terá de prazo para proceder á xustificación do investimento ata o 3 de novembro de 2006, inclusive.

Tendo en conta que o elevado número de solicitudes motivou un dilatado proceso de revisión administrativa dos respectivos expedientes, considérase necesario ampliar o prazo de xustificación dos investimentos levados a cabo polos solicitantes.

Na súa virtude, e en uso das facultades que me foron concedidas,

DISPOÑO:

Artigo único.

Modifícase o artigo 15 punto 1º da Orde do 1 de xuño de 2006 pola que se establecen as bases e se procede á convocatoria para o ano 2006, en réxime de concorrencia competitiva, de axudas para a realización de actuacións e estratexias de promoción e internacionalización das empresas galegas que queda redactado como a seguir se expón:

«O beneficiario terá de prazo para proceder á xustificación do investimento ata o 20 de novembro de 2006, inclusive».

Disposición derradeira

Única.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 29 de setembro de 2006.

Fernando Xabier Blanco Álvarez

Conselleiro de Innovación e Industria