Con data do 1 de agosto de 2006, a Consellería de Pesca e Asuntos Marítimos remitiu á Consellería de Economía e Facenda o expediente de doazón de dúas embarcacións propiedade de Remolcadores Nosa Terra, S.A.
A Secretaría Xeral e do Patrimonio tramitou o expediente de aceptación, logo da solicitude da Consellería de Pesca e Asuntos Marítimos.
De acordo co disposto no artigo 17.1º da Lei 3/1985, do 12 de abril, do patrimonio da Comunidade Autónoma de Galicia e 34.1º do Regulamento aprobado polo Decreto 50/1989, do 9 de marzo, a adquisición pura e simple de bens, a título gratuíto ou lucrativo requerirá decreto do Consello da Xunta, por proposta da Consellería de Economía e Facenda.
Na súa virtude, por proposta do conselleiro de Economía e Facenda, feita nos termos nos que Remolcadores Nosa Terra, S.A. realizou a oferta de doazón e logo de deliberación do Consello da Xunta de Galicia na súa reunión do día catorce de setembro de dous mil seis,
DISPOÑO:
Artigo 1º
Aceptar a doazón de dúas embarcacións feitas por Remolcadores Nosa Terra, S.A., e que se describen como segue:
1. Embarcación modelo Delta do 1995 con dous motores yamaha de 70 cv: nº de bastidor do motor de babor 486209, e do motor de estribor 486211.
2. Embarcación modelo Delta do 1995 con dous motores yamaha de 70 cv: nº de bastidor do motor de babor 486301, e do motor de estribor 486305.
Artigo 2º
Corresponderá á Consellería de Pesca e Asuntos Marítimos as facultades de administración, xestión e conservación das dúas embarcacións.
Disposición derradeira
A Consellería de Economía e Facenda, a través da Secretaría Xeral e do Patrimonio, levará a cabo todos os trámites para a efectividade do presente decreto.
Santiago de Compostela, catorce de setembro de dous mil seis.
Emilio Pérez Touriño
Presidente
José Ramón Fernández Antonio
Conselleiro de Economía e Facenda