Dentro do programa de actividades que o Centro de Estudos Xudiciais e Seguridade Pública de Galicia ten previsto realizar no ano 2006, e conforme coas funcións atribuídas pola Lei 1/2005, do 4 de xaneiro, de creación do Centro de Estudos Xudiciais e Seguridade Pública de Galicia en colaboración co proxecto Cofroem (fomento e optimización dos recursos materiais e de formación dos servizos de emerxencias e de salvamento), anúnciase a convocatoria dunha xornada sobre os servizos contra incendios e salvamento da eurorrexión Galicia-Norte de Portugal, que deberá desenvolverse conforme coas seguintes bases:
Primeira.-Obxectivos.
Coñecer por parte dos bombeiros dos parques participantes no proxecto Cofroem e do resto dos parques interesados, a situación e medios humanos e materiais dos servizos urbanos contra incendios e de salvamento da Comunidade Autónoma de Galicia e do norte de Portugal, facendo especial incidencia na zona transfronteiriza Galicia-norte de Portugal, así como os mecanismos de coordinación e de colaboración en intervencións conxuntas por distintos servizos.
Segunda.-Destinatarios.
-Bombeiros dos parques participantes no proxecto Cofroem, tanto de Galicia como de Portugal.
-Bombeiros doutros parques galegos e portugueses.
-Responsables das agrupacións de voluntarios de protección civil.
Terceira.-Desenvolvemento.
1. Prazas: o número de prazas ofertadas é de 150.
2. Duración e datas: a xornada terá lugar o día 20 do mes de outubro de 2006, en horario de mañá e tarde.
3. Horario: das 9.00 hora ás 13.30 horas e das 16.30 ás 19.30 horas (hora portuguesa).
4. Lugar: a xornada realizarase no auditorio do castelo de Santiago da Barra en Viana do Castelo (Portugal).
Cuarta.-Solicitudes e prazo de inscrición.
1. A inscrición dos participantes é gratuíta.
2. O persoal que desexe participar nesta xornada deberá presentar, cuberta a máquina ou con letra moi clara, a instancia que figura no anexo.
3. O prazo para a presentación de instancias rematará o día 17 de outubro de 2006.
4. As instancias deberán estar asinadas polo responsable de persoal e co selo da entidade a que pertenza o solicitante.
5. As instancias deberán enviarse por correo á sede do Centro de Estudos Xudiciais e Seguridade Pública de Galicia: Avenida da Cultura, s/n, 36680 A Estrada, ao fax nº 986 59 09 88, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Quinta.-Contido.
* O Proxecto Cofroem, obxectivos e desenvolvemento.
* Os servizos contra incendios na Comunidade Autónoma de Galicia e no norte de Portugal.
* Colaboración transfronteiriza e materia de emerxencias e incendios urbanos.
* Órganos de coordinación de emerxencias: 112 Galicia/112 Portugal.
* As intervencións en lumes forestais e a súa incidencia en núcleos urbanos, vivendas e instalacións.
* Protocolos de actuación e colaboración entre bombeiros do norte de Portugal e Galicia.
Sexta.-Relación de admitidos.
A relación de participantes admitidos para a realización da xornada exporase no taboleiro de anuncios do Centro de Estudos Xudiciais e Seguridade Pública de Galicia, sen prexuízo da oportuna notificación aos seleccionados con antelación suficiente á celebración da xornada. Tamén poden confirmar
a súa admisión chamando ao teléfono 986 59 02 46 ou consultando a páxina web http://cexesga.xunta.es.
Sétima.-Asistencia.
É obrigatoria a asistencia e puntualidade en todas as actividades da xornada. A falta de asistencia, mesmo cando sexa xustificada, en máis dun 10% das horas lectivas programadas determinará a cualificación de non apto na xornada.
Oitava.-Certificado de asistencia.
Ao remate da xornada entregaráselles un certificado de asistencia a aquelas persoas que acrediten a súa participación continuada nela.
Novena.-Financiamento.
Esta xornada de formación forma parte do proxecto Fomento e optimización de recursos materiais e de formación dos servizos de emerxencia e de salvamento Cofroem/SPI.E42/02, contando para estes efectos co cofinanciamento europeo de fondos Feder, no marco do programa Interreg IIIA.
Novena.-Modificacións.
O Centro de Estudos Xudiciais e Seguridade Pública de Galicia poderá modificar o desenvolvemento da xornada para adaptala ás necesidades da Administración e ás continxencias que poidan xurdir.
A Estrada, 14 de setembro de 2006.
Carlos Suárez-Mira Rodríguez
Director xeral do Centro de Estudos Xudiciais e
Seguridade Pública de Galicia