Mediante Resolución do 11 de abril de 2006 (DOG do 21 de abril) convocáronse axudas económicas a favor de emigrantes galegos retornados e aos seus familiares, co obxecto de atender situacións de necesidade ou precariedade económica derivadas do seu retorno á Comunidade Autónoma de Galicia.
No artigo 7.2º da devantida resolución fíxase o prazo de presentación de solicitudes desde a entrada en vigor desta resolución ata o 30 de setembro de 2006.
Faise conveniente ampliar o prazo de presentación de solicitudes para que, deste xeito, se amplíe tamén o período de cobertura para aqueles que retornen desde o 1 de outubro ao 15 de novembro, dada a existencia de crédito axeitado e suficiente. En consecuencia, de conformidade co disposto no artigo 49 da Lei de réxime xurídico das administracións públicas e do procedemento administrativo común,
RESOLVO:
Artigo 1º
Ampliar ata o 15 de novembro de 2006, inclusive, o prazo de presentación das solicitudes previsto no artigo 7.2º da Resolución do 11 de abril de 2006, pola que se regulan axudas extraordinarias a emigrantes galegos retornados e aos seus familiares para o exercicio 2006.
Artigo 2º
A devandita ampliación non supón modificación dos demais condicionantes exixidos na resolución antedita.
Disposición derradeira
Esta resolución entrará en vigor o día seguinte ao da súa publicación no Diario Oficial de Galicia.
Santiago de Compostela, 29 de agosto de 2006.
Manuel Luís Rodríguez González
Secretario xeral de Emigración