O artigo 28.2º da Constitución española recoñece o dereito de folga dos traballadores para a defensa dos seus intereses, malia limitar o seu exercicio para garantir os servizos esenciais da comunidade, entre os que está a vixilancia e extinción de incendios.

O artigo 3 do Decreto 155/1988, do 9 de xuño, faculta o conselleiro competente por razón dos servizos esenciais afectados ante unha situación de folga para que, mediante orde, decida o mínimo de actividade necesaria para asegurar o mantemento deles, así como para determinar o persoal preciso para a súa prestación.

A FSAP-CC.OO. de Galicia convocou folga de carácter temporal que afecta todas as actividades do Servizo de Prevención e Defensa contra Incendios Forestais da Xunta de Galicia, desenvolvidas polo persoal laboral suxeito ao convenio único do persoal laboral da Xunta de Galiza, en todos os centros, dependencias e distritos forestais da Dirección Xeral de Montes e Industrias Forestais, dependente da Consellería do Medio Rural, para os días 25 de xullo de 2006, 15 de agosto de 2006 e 15 de setembro de 2006.

Xa que logo, cómpre determinar os servizos mínimos que deben manter mentres dure a folga convocada nos citados centros de traballo para garantir a continuidade do servizo, tendo en conta que desde o 15 de xuño a 15 de outubro de 2006 está declarada como época de alto risco de incendios forestais, segundo resolución do director xeral de Montes e Industrias Forestais, con data do 12 de xuño de 2006, pola que se modifica a época de máximo perigo de incendio regulada na Resolución do 27 de xaneiro de 2005, sobre medidas para a prevención de incendios forestais, así como, as estatísticas dispoñibles en canto á proliferación de incendios forestais.

Na súa virtude, oído o Comité de Folga e no uso das competencias que teño atribuídas,

DISPOÑO:

Artigo 1º

Os servizos mínimos que se deberán manter mentras dure a folga anunciada con carácter temporal no Servizo de Prevención e Defensa Contra Incendios Forestais para os días 25 de xullo de 2006, 15 de

agosto de 2006 e 15 de setembro de 2006, son os seguintes segundo as categorías especificadas:

1. Operador/codificador: 15 de setembro, o 50% dos efectivos correspondentes a esa categoría, asegurándose cando menos un operador/codificador por centro de traballo.

2. Vixilantes fixos: o 100% do persoal incluído nas quendas de traballo os días da folga.

3. Vixilantes móbiles: o 100% do persoal incluído nas quendas de traballo os días da folga.

4. Emisoristas: o 100% do persoal incluído nas quendas de traballo os días da folga.

5. Oficial 2ª mecánico: o 100% do persoal incluído nas quendas de traballo os días da folga.

6. Xefe de brigada: o 100% do persoal incluído nas quendas de traballo os días da folga.

7. Peóns condutores: o 100% do persoal incluído nas quendas de traballo os días da folga.

8. Peóns: 4 peóns por cada brigada incluída nas quendas de traballo os días de folga.

9. Condutores de motobomba: o 100% do persoal incluído nas quendas de traballo os días da folga.

Artigo 2º

O persoal que debe prestar os servizos mínimos establecidos de conformidade co diposto no artigo anterior será fixado polo director xeral de Montes e Industrias Forestais nos servizos centrais e polos delegados provinciais da Consellería do Medio Rural, facéndose pública a relación nos taboleiros de anuncios da Dirección Xeral de Montes e Industrias Forestais, nas delegacións provinciais e na sede dos distritos forestais e dos centros afectos pola convocatoria da folga durante a xornada laboral inmediatamente anterior á sinalada para a súa celebración.

Artigo 3º

O incumprimento da obriga de atender os servizos mínimos fixados nesta orde sancionarase de conformidade coa lexislación vixente.

Artigo 4º

O establecido nesta orde non suporá ningunha limitación dos dereitos que a normativa reguladora ao dereito de folga lle recoñece aos/ás traballadores/as.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 20 de xullo de 2006.

Alfredo Suárez Canal

Conselleiro do Medio Rural