A Lei 58/2003, do 17 de decembro, xeral tributaria, baséase, entre outros principios, nos de eficacia e limitación de custos indirectos derivados do cumprimento de obrigas formais.
Ata agora determinados ingresos tiñan que se realizar necesariamente no Servizo de Caixa das delegacións territoriais da Consellería de Economía e Facenda e nas oficinas liquidadoras de distrito hipotecario.
Esta mecánica de ingreso ocasionaba dificultades na xestión recadatoria dos tributos e outros ingresos de dereito público, polo que se considera necesario modificar o procedemento de ingreso, de forma que, a partir da entrada en vigor deste decreto, o pagamento das débedas tributarias e outros ingresos de dereito público xestionados pola Consellería de Economía e Facenda se poidan realizar a través das entidades de crédito autorizadas para colaborar na recadación.
No entanto, para que poidan seguir realizándose nas dependencias das delegacións territoriais da Consellería de Economía e Facenda aqueles ingresos que con anterioridade se realizaban no Servizo de Caixa, posibilítase a existencia dunha oficina dunha das entidades autorizadas para colaborar na recadación.
Por todo iso, por proposta do conselleiro de Economía e Facenda, logo de deliberación do Consello da Xunta de Galicia na súa reunión do día vinte e dous de xuño de dous mil seis,
DISPOÑO:
Artigo 1º.-Ingresos da Consellería de Economía e Facenda nas entidades colaboradoras.
O pagamento das débedas tributarias e outros ingresos de dereito público xestionados pola Consellería de Economía e Facenda poderá realizarse a través de calquera das entidades de crédito autorizadas por aquela para colaborar na recadación.
Artigo 2º.-Ingresos nas delegacións territoriais.
Nas delegacións territoriais que determine a Consellería de Economía e Facenda poderá haber unha oficina dunha entidade colaboradora, que asumirá, ademais das propias, as funcións que se determinen no correspondente convenio coa consellería.
Disposición derrogatoria
Derrógase o Decreto 243/1992, do 30 de xullo, polo que se estableceu o Servizo de Caixa das delegacións territoriais da Consellería de Economía e Facenda a través de entidades financeiras.
Disposicións derradeiras
Primeira.-Autorízase o conselleiro de Economía e Facenda para que dite as disposicións necesarias en desenvolvemento do establecido neste decreto e para subscribir os convenios a que se refire o artigo 2º.
Segunda.-Este decreto entrará en vigor o día 6 de xullo de 2006.
Santiago de Compostela, vinte e dous de xuño de dous mil seis.
Emilio Pérez Touriño
Presidente
José Ramón Fernández Antonio
Conselleiro de Economía e Facenda