A Lei orgánica 8/1985, do 3 de xullo, reguladora do dereito á educación (BOE do 4 de xullo) establece, no seu artigo primeiro, que todos os españois teñen dereito a unha educación básica que lles permita o desenvolvemento da súa propia personalidade e a realización dunha actividade útil á sociedade.
O Estatuto de autonomía de Galicia, no seu artigo 31, dispón que é competencia plena da Comunidade Autónoma de Galicia o regulamento e administración do ensino en toda a súa extensión, niveis e graos, modalidades e especialidades.
Mediante o Real decreto 1763/1982, do 24 de xullo (BOE do 18 de agosto), procedeuse ao traspaso das funcións e servizos da Administración do Estado á Comunidade Autónoma de Galicia en materia de educación.
A Consellería de Educación e Ordenación Universitaria adquiriu o compromiso ante a sociedade de iniciar, no ano 2003, un proceso que camiñe cara á gratuidade dos libros de texto no ensino obrigatorio e nos centros sostidos con fondos públicos.
Con esta finalidade publicáronse as ordes do 6 de xuño de 2003 (DOG do 12 de xuño) e do 8 de xuño de 2004 (DOG do 10 de xuño), pola que se implantaba o programa de gratuidade de libros de texto, de xeito experimental, nos cursos escolares 2003/2004 e 2004/2005 en 6º curso de educación primaria e en 2º curso de educación secundaria obrigatoria, respectivamente.
No curso escolar 2005/2006, por Orde do 13 de maio de 2005 (DOG do 23 de maio) implantouse a gratuidade en 3º e 4º de educación primaria.
En aplicación das bases programáticas para a acción de goberno e para dar cumprimento aos compromisos adquiridos ante a sociedade galega, neste mesmo curso ampliouse a gratuidade de libros de texto a 1º, 2º e 5º de educación primaria por Orde do 15 de setembro de 2005 (DOG do 20 de setembro), completándose así a gratuidade en toda a educación primaria.
De cara a conseguir a gratuidade total dos libros de texto no ensino obrigatorio, no curso 2006/2007 amplíase o programa a 4º de educación secundaria obrigatoria nos centros sostidos con fondos públicos cos seguintes obxectivos:
a) Enmarcarse dentro do principio de gratuidade nas etapas obrigatorias e favorecer a igualdade de oportunidades, de xeito que o alumnado da nosa comunidade autónoma poida ter acceso a esta ferramenta pedagóxica fundamental.
b) Inculcar no alumnado valores de solidariedade, de conservación do material para a súa reutilización por outros e de coidado do ben colectivo como propio.
De acordo co indicado con anterioridade, esta consellería dispón a implantación progresiva do programa de gratuidade de libros de texto, a través do réxime de préstamo, de acordo coas dispoñibilidades orzamentarias, e con criterios educativos e de organización que permitan un axeitado funcionamento deste servizo educativo.
En exercicio das competencias atribuídas no Decreto 585/2005, do 29 de decembro, polo que se establece a estrutura orgánica da Consellería de Educación e Ordenación Universitaria (DOG do 9 de xaneiro de 2006), esta consellería
DISPÓN:
Primeiro.-Obxecto e ámbito de aplicación.
1. A presente orde ten por finalidade regular o programa de gratuidade de libros de texto e materiais curriculares que se desenvolverá no curso escolar 2006/2007.
2. O programa de gratuidade será de aplicación a todos os centros sostidos con fondos públicos da Comunidade Autónoma de Galicia, para que lle faciliten ao alumnado de ensino obrigatorio, mediante o sistema de préstamo, os libros de texto das distintas áreas do currículo establecidas para os cursos que se citan no punto terceiro desta orde, de acordo coas áreas que curse cada alumno/a e coa relación de libros de texto incluídos no programa de gratuidade publicada no taboleiro de anuncios do centro, segundo o que se estableza na orde pola que se publique o calendario escolar para o curso 2006/2007 nos centros escolares sostidos con fondos públicos.
3. Non se inclúen no programa de gratuidade aqueles libros que, por diversas circunstancias, non poidan ser reutilizados polos/as alumnos/as durante catro cursos escolares, nin outros materiais de uso persoal do alumnado tales como cadernos de idiomas, cadernos de exercicios ou libros nos cales se escriba, pinte ou recorte. Non obstante, os libros de texto de 1º e 2º curso de educación primaria exixen un tratamento diferenciado, incluíndose neste caso todos os libros de texto aínda que non poidan ser reutilizados en cursos posteriores.
Tampouco poderán adquirirse con cargo ao programa dicionarios, atlas, libros de titoría e outros materiais similares.
4. Os centros educativos poderán substituír a adquisición dos libros de texto para unha ou varias áreas por materiais curriculares elaborados polo correspondente departamento do centro, tendo en conta os límites establecidos no punto sexto desta orde, logo da autorización do órgano competente do centro para a aprobación dos libros de texto.
5. Estes materiais deberán ser reutilizables polo alumnado durante catro anos ao igual que os libros de texto, coa excepción de 1º e 2º curso de educación primaria, incluíndose neste caso todos os materiais curriculares aínda que non poidan ser reutilizados en cursos posteriores.
6. O importe destinado á elaboración e posta á disposición do alumnado destes materiais deberá acreditarse mediante factura que deberá ser arquivada no centro.
Segundo.-Beneficiarios.
Será beneficiario do programa todo o alumnado que curse o ensino obrigatorio en centros sostidos con fondos públicos da Comunidade Autónoma de Galicia, segundo o previsto no punto terceiro desta orde.
A participación de cada alumno/a no programa ten carácter voluntario.
Terceiro.-Implantación do programa no curso escolar 2006/2007.
No curso escolar 2006/2007 implantarase o programa de gratuidade de libros de texto en 4º curso de educación secundaria obrigatoria e procederase á reposición dos libros de texto en todos os cursos de educación primaria e de 2º curso de educación secundaria obrigatoria naqueles centros acollidos ao programa nas convocatorias de anos anteriores.
Ademais, poderanse repoñer os libros das áreas impartidas en galego de 5º curso de educación primaria.
Cuarto.-Adhesión ao programa.
Dado o carácter universal da axuda, están adheridos a este programa en 4º curso de educación secundaria obrigatoria todos os centros sostidos con fondos públicos da Comunidade Autónoma de Galicia que o impartan no curso escolar 2006/2007.
Quinto.-Permanencia dos libros de texto.
A elección dos libros de texto que se utilizarán no programa de gratuidade manterase durante un período mínimo de catro cursos e a súa aprobación efectuarase de acordo coa normativa vixente.
Sexto.-Importe da subvención.
A Consellería de Educación e Ordenación Universitaria subvencionará os libros de texto nos seguintes importes máximos por alumno/a acollido ao programa e curso:
Curso
Educación primaria
Importe máximo de reposición por deterioración dos libros Importe máximo de reposición por incremento de alumnado Implantación: importe máximo por alumno/a acollido/a
Primeiro 95 euros 119 euros
Segundo 95 euros 119 euros
Terceiro 7 euros 140 euros
Cuarto 7 euros 140 euros
Quinto 64 euros 145 euros
Sexto 7 euros 145 euros
Educación secundaria obrigatoria
Segundo 11 euros 223 euros
Cuarto 238 euros
A limitación de reposición por deterioración será conxunta para todos os cursos, é dicir, poderá repoñerse un maior importe que o previsto en calquera curso/s sempre e cando se repoña menos no/s outro/s e a suma da reposición por deterioración de todos os cursos non supere a suma das contías establecidas no cadro anterior.
Sétimo.-Procedemento para a adquisición dos libros de texto de 4º curso de educación secundaria obrigatoria.
Para a adquisición dos libros de texto de 4º curso de educación secundaria obrigatoria seguirase o seguinte procedemento:
a) Entrega da autorización para a adquisición dos libros de texto.
Durante o mes de xuño os centros facilitaranlle ao alumnado os impresos orixinais para a adquisición dos libros de texto, por duplicado, segundo o modelo establecido como anexo I a esta orde. Nestes anexos faranse constar unicamente os libros de texto que necesite cada alumno/a de acordo coas áreas do currículo en que vaia estar matriculado no curso escolar 2006/2007.
b) Adquisición dos libros de texto nas librarías.
Os pais, nais ou titores, así como as persoas ou institucións que teñan a garda e protección dos menores deberán presentar, na libraría da comunidade autónoma que libremente decidan, antes do 31 de xullo, os dous exemplares orixinais do anexo I, debidamente asinados por eles.
Se a libraría entrega os libros no centro quedará cos dous exemplares do anexo I.
No caso de que a libraría non entregue os libros no centro, quedará en posesión de un dos exemplares e o outro será devolto ás familias, coa sinatura e o selo da libraría, xunto cos libros de texto.
c) Entrega dos libros de texto nos centros.
As librarías que se comprometeran a levar os libros aos centros, deberán entregalos entre o 1 e o 5 de setembro no centro, xunto con un exemplar do anexo I de cada un dos/as alumnos/as.
Os pais, nais ou titores que adquiriran os libros en librarías que non entreguen os libros no centro, deberán entregalos eles, xunto co exemplar do anexo I que lle devolveu a libraría asinado, no mesmo prazo que as librarías, é dicir, entre o 1 e o 5 de setembro.
Unha vez recibidos os libros de texto o centro procederá ao seu inventario e identificación.
d) Entrega das facturas por parte das librarías nos centros.
O prazo para que as librarías entreguen as facturas nos centros remata o 30 de setembro.
Quedarán baixo a custodia da secretaría dos centros, á disposición dos órganos de fiscalización e control competentes, os anexos I, as facturas orixinais e os xustificantes de pagamento, así como calquera outra documentación que derive da aplicación do establecido nesta orde.
Oitavo.-Procedemento para a reposición de educación primaria e de 2º curso de educación secundaria obrigatoria.
1. Os centros adheridos ao programa en cursos anteriores poderán repoñer os exemplares de libros de texto de educación primaria e de 2º curso de educación secundaria obrigatoria que sexan necesarios para o curso escolar 2006/2007, como consecuencia de:
a) Incremento de alumnado acollido ao programa neste nivel educativo con respecto aos acollidos no/s curso/s anterior/es.
b) Exemplares que, debido ao seu grao de deterioración, non poidan ser utilizados polo alumnado no curso escolar 2006/2007, sempre que esta deterioración non sexa imputable ao alumno/a, coas limitacións establecidas no artigo sexto desta orde.
2. Os exemplares de reposición serán adquiridos polo director do centro, debendo utilizar o anexo II por duplicado, cubrindo os datos do centro e os dos libros de texto, facendo constar, así mesmo, o número de exemplares de cada área. Un dos exemplares do anexo II deberá ser devolto ao director do centro asinado e selado pola libraría e o outro quedará en posesión desta.
3. O prazo para que as librarías presenten as facturas correspondentes á reposición nos centros remata o 30 de setembro.
4. As facturas dos exemplares de reposición, o/s anexo/s II e calquera outra documentación que derive do disposto nesta orde, deberán quedar arquivados na secretaría do centro.
Noveno.-Procedemento para o aboamento do importe do programa de gratuidade de libros de texto.
Os centros públicos de titularidade da consellería recibirán, antes do mes de setembro, o 100% do importe para o programa de gratuidade de libros de texto, que será estimado de acordo co número de alumnos/as matriculados/as no ano escolar 2005/2006 nos cursos inmediatamente anteriores a aqueles que se implanten por primeira vez ou se repoñan, excepto en 1º de educación primaria, onde se tomarán os datos deste mesmo curso no ano escolar anterior.
Os centros concertados e os centros públicos de titularidade doutras administracións públicas acollidos ao programa de gratuidade recibirán, no mesmo prazo, un anticipo do 80% do importe estimado calculado como se indica no parágrafo anterior.
Os centros educativos, recibidos os importes enviados pola consellería para este programa, procederán, á maior brevidade posible, ao aboamento das facturas unha vez presentadas polas librarías.
Décimo.-Presentación da xustificación.
1. Os centros deberán dirixir a xustificación, segundo o anexo III, á Consellería de Educación e Ordenación Universitaria, Dirección Xeral de Ordenación e Innovación Educativa, edificio administrativo San Caetano, bloque II, 2º andar, 15781 Santiago de Compostela (A Coruña).
2. Os centros concertados poderán presentar a citada documentación en calquera dos rexistros a que se refire o artigo 38.4 da Lei 30/1992, do 26 de novembro, de réxime xurídico das administracións públicas e do procedemento administrativo común (BOE do 27 de novembro), modificada pola Lei 4/1999, do 13 de xaneiro (BOE do 14 de xaneiro). Se a solicitude fose remitida por correo certificado, presentarase en sobre aberto para que sexa datada e selada polo funcionario de correos.
3. Para os efectos de cómputo de prazos os rexistros dos centros docentes non son válidos, de conformidade co disposto no Decreto 164/2005, do 16 de xuño, polo que se regulan e determinan as oficinas de rexistro propias ou concertadas da Administración da Comunidade Autónoma de Galicia, se crea o Rexistro Telemático da Xunta de Galicia e se regula a atención ao cidadán (DOG do 24 de xuño).
4. Os centros concertados e os centros públicos de titularidade doutras administracións públicas dispoñen de prazo ata o 31 de outubro para presentar a citada xustificación.
5. Os centros públicos de titularidade da consellería dispoñen de prazo ata o 31 de marzo de 2007 para presentar a xustificación de todo o programa de gratuidade de libros de texto, debendo incluír nela as novas incorporacións que se produzan ata esa data.
6. Se o importe xustificado polos centros supera o enviado, e sempre coas limitacións dos importes máximos previstos no artigo sexto desta orde, a consellería asignaralle un pagamento complementario pola diferenza entre o ingresado e o importe da adquisición dos libros de texto.
7. No caso de que o importe recibido da consellería fose superior ao xustificado, os centros deberán reintegrar o importe sobrante na conta operativa do Tesouro da Xunta de Galicia nº 2091-0300-47-3110063172, facendo constar no concepto devolución programa de
gratuidade libros de texto 2006/2007, e xuntar copia compulsada do xustificante da operación co anexo III (xustificación).
Décimo primeiro.-Incorporación de novos/as alumnos/as ao longo do curso.
A adquisición dos libros de texto para as incorporacións ao centro de novos/as alumnos/as que se acollan ao programa, en calquera dos cursos obxecto de gratuidade, serán tramitadas polo director do centro empregando o anexo II, segundo o procedemento establecido no punto oitavo.2 desta orde, e poderán presentarse ata o 31 de marzo de 2007.
Os centros públicos de titularidade da consellería xustificarán os gastos dos libros das novas incorporacións coa xustificación total do programa, segundo o anexo III.
Os centros concertados e os centros públicos de titularidade doutras administracións públicas deberán xustificar estas novas incorporacións no anexo IV desta orde.
Décimo segundo.-Alumnado con necesidades educativas específicas.
Co obxecto de incluír no programa de gratuidade o alumnado que, estando matriculado no curso obxecto de gratuidade, presenta necesidades educativas específicas, poderán adquirirse con cargo a este programa os libros de texto que utilicen estes/as alumnos/as, aínda que non se correspondan cos aprobados polo órgano competente do centro para o citado nivel educativo, logo de informe motivado ao respecto do departamento de orientación ou órgano equivalente dos centros privados concertados, que quedará arquivado na secretaría do centro xunto co resto da documentación do programa. Deberanse ter en conta os límites por alumno/a e curso establecidos no artigo sexto desta orde.
Décimo terceiro.-Da propiedade e conservación dos libros.
1. O centro, ao recibir os libros de texto do alumnado, procederá ao seu inventario, debendo ser convenientemente identificados e conservados, podendo dispoñer deles os/as alumnos/as en calidade de préstamo.
2. Concluído o período lectivo os libros de texto serán reintegrados e depositados polo alumnado nos centros, coa finalidade de ser revisados e determinar o seu grao de conservación e a súa posible reutilización durante o curso seguinte, segundo o procedemento establecido polo centro.
3. Se ao longo do curso escolar un/unha alumno/a se traslada de centro, deberá devolverlle ao centro de orixe os libros de texto. Unha vez que se incorpore ao novo centro, o director do centro de destino tramitará a correspondente reposición de libros por incremento de alumnado, segundo o previsto no artigo décimo primeiro desta orde.
4. O alumnado beneficiario das presentes axudas quedará obrigado a conservar en perfecto estado os libros de texto entregados e a devolvelos ao centro ao finalizar o período lectivo. Non obstante, os/as alumnos/as de educación secundaria obrigatoria que estean pendentes da realización dos exames de setembro teñen de prazo ata o 8 dese mes para devolver os libros. Se os libros están estragados e a deterioración é imputable directamente ao alumno/a, o centro requirirá os pais ou titores para que aboen o importe dos libros ou ben os repoñan.
5. O incumprimento destas obrigas quedará suxeito ao establecido no Real decreto 732/1995, do 5 de maio, polo que se establecen os dereitos e deberes dos alumnos e as normas de convivencia nos centros (BOE do 2 de xuño) e poderá dar lugar á non concesión da correspondente axuda para o curso seguinte.
Décimo cuarto.-Información sobre o programa.
1. Esta orde, así como toda a información relativa ao programa, poderá consultarse na epígrafe de gratuidade de libros de texto do portal educativo da Consellería de Educación e Ordenación Universitaria, no enderezo http://www.edu.xunta.es. Tamén se poderán descargar os anexos I e II en formato PDF.
2. Os anexos III e IV do programa de gratuidade de libros de texto deberán ser cubertos nesta páxina, accedendo á aplicación informática deseñada pola consellería para estes efectos, que estará dispoñible a partir do 1 de setembro, co nome de usuario e contrasinal do correo electrónico de edu.xunta.es do director ou do secretario. Esta aplicación permitirá introducir os datos necesarios e a impresión dos anexos que deberán ser asinados polo director e selados para ser enviados á consellería.
Décimo quinto.-Financiamento do programa.
1. A Consellería de Educación e Ordenación Universitaria financiará o programa con cargo á aplicación orzamentaria 09.02.323A.480.0 por importe de 10.366.471 euros para o ano 2006 e na contía de 518.323,55 euros para 2007.
2. O importe do ano 2006 poderá incrementarse cos importes remanentes do programa de gratuidade de libros de texto do curso 2005/2006, unha vez que se conclúa a súa execución e se peche este.
3. O importe do programa tamén poderá incrementarse se, antes da resolución de concesión, se recibise transferencia do Ministerio de Educación e Ciencia para esta mesma finalidade, e así se publique no Diario Oficial de Galicia.
4. Non obstante, dado o carácter universal da axuda, se os importes anteriores non fosen suficientes, a Consellería de Educación e Ordenación Universitaria establecerá as medidas necesarias para garan
tir a gratuidade dos libros para todo o alumnado acollido ao programa, dentro das dispoñibilidades orzamentarias.
5. Os centros privados concertados recibirán os importes correspondentes, en calidade de entidades colaboradoras, de acordo co establecido nos artigos 28 a 32 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia (DOG do 11 de decembro) e no artigo 78 e 79 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia (DOG do 5 de novembro).
6. Para os efectos do convenio previsto no artigo 78 do Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, os centros privados concertados, que actúan como entidades colaboradoras, asinan os anexos III e IV e asumen todas as obrigas e compromisos establecidos nesta lei, aceptando a consellería esta sinatura.
Décimo sexto.-Recursos.
Contra esta orde, que esgota a vía administrativa, os interesados poderán interpoñer recurso potestativo de reposición no prazo dun mes, contado a partir do día seguinte ao da publicación desta orde no Diario Oficial de Galicia, perante a conselleira de Educación e Ordenación Universitaria, segundo o disposto na Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común, ou ben poderán presentar directamente recurso contencioso-administrativo, perante o Tribunal Superior de Xustiza de Galicia, no prazo de dous meses contados a partir do día seguinte ao da publicación, conforme se establece na Lei 29/1998, do 13 de xullo, reguladora da xurisdición contencioso-administrativa (BOE do 14 de xullo).
Disposicións adicionais
Primeira.-Incompatibilidades.
As axudas concedidas a través do programa de gratuidade de libros de texto establecidas na presente orde serán incompatibles con calquera outra axuda que se conceda para o mesmo fin, comprometéndose os beneficiarios ao reintegro á Administración de calquera outro importe recibido para a mesma finalidade.
Segunda.-Centros privados concertados cun mesmo número de identificación fiscal como centro educativo e como libraría.
Aqueles centros privados concertados que estean dados de alta cun mesmo número de identificación fiscal para a actividade docente e como libraría pode
rán acreditar a adquisición dos libros de texto mediante as facturas emitidas polas editoriais subministradoras dos libros. Neste caso, o director do centro engadiralles ás correspondentes facturas das editoriais certificación na cal se faga constar que os importes destas se corresponden co importe dos libros de texto para o programa de gratuidade. Esta documentación quedará arquivada na secretaría do centro.
Terceira.-Superación dos importes máximos.
En casos excepcionais, por causas de forza maior e debidamente xustificadas, poderase autorizar a superación dos importes máximos establecidos no artigo sexto desta orde.
Cuarta.-Constitución da comisión de seguimento.
Cada centro educativo incorporará ao seu Regulamento de réxime interior os criterios básicos para o funcionamento deste programa. No seo do Consello Escolar de cada centro poderá, así mesmo, constituírse unha comisión de seguimento, integrada por representantes de distintos sectores da comunidade educativa, coa finalidade de coordinar todas as actuacións necesarias para o desenvolvemento do programa.
Quinta.-Lexislación aplicable.
No non previsto nesta orde observarase o disposto nos artigos 78 e 79 da Lei de réxime financeiro e orzamentario de Galicia, aprobada polo Decreto lexislativo 1/1999, do 7 de outubro (DOG do 5 de novembro), no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia (DOG do 11 de decembro), na Lei 38/2003, do 17 de novembro, xeral de subvencións (BOE do 18 de novembro), e no Decreto 201/2003, do 20 de marzo, polo que se desenvolve a autonomía na xestión económica dos centros docentes públicos non universitarios (DOG do 4 de abril).
Disposicións derradeiras
Primeira.-Atribúenselle ao director do centro docente e ao seu equipo directivo, no ámbito das súas competencias, as funcións e responsabilidades propias da prestación do programa de gratuidade de libros de texto para que se estenda ao alumnado.
Segunda.-Autorízase a Dirección Xeral de Ordenación e Innovación Educativa para ditar as resolucións necesarias para a aplicación e o desenvolvemento do establecido nesta orde.
Terceira.-A presente orde entrará en vigor o día seguinte ao da súa publicación no Diario Oficial de Galicia.
Santiago de Compostela, 23 de maio de 2006.
Laura Sánchez Piñón
Conselleira de Educación e Ordenación Universitaria
