Con data do 23 de marzo de 2006 foi publicada no Diario Oficial de Galicia a orde da Consellería de Presidencia, Administracións Públicas e Xustiza, do 1 de marzo de 2006, pola que se clasifica de interese social a Fundación Difogal, adscribíndoa á Consellería de Traballo, que exercerá plenamente o protectorado sobre ela.

O obxecto da fundación, segundo establece o artigo 4 dos seus estatutos, é o seguinte:

Destinar e afectar o seu patrimonio á realización de fins xerais de interese galego, no ámbito sectorial

e territorial a que a súa denominación e fins se contraen.

En xeral son fins desta fundación o apoio ao sector téxtil mediante a impartición de cursos de formación a traballadores activos e desempregados, así como fomentar o estudo e a investigación en materia de formación profesional dos traballadores de Galicia.

Por todo isto, en virtude das competencias que me confire o artigo 34 da Lei 1/1983, do 22 de febreiro, reguladora da Xunta e do seu presidente, e segundo o establecido no artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro e o artigo 32.3º a) do Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de

interese galego, e no Decreto 211/2005, do 3 de agosto, polo que se modifica a estrutura orgánica da Xunta de Galicia,

DISPOÑO:

Primeiro.-Declarar de interese galego a Fundación Difogal, ao cumpriren os seus estatutos as prescricións que, para tal efecto sinala a vixente lexislación en materia de fundacións de interese galego.

Segundo.-Ordenar a inscrición da Fundación Difogal no Rexistro de Fundacións de Interese Galego, sección da Consellería de Traballo, para os efectos constitutivos que sinala o artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro.

Terceiro.-A dita fundación queda sometida ao disposto no resto da normativa de xeral aplicación, en especial, á obriga de dar publicidade suficiente ás súas actividades e á ausencia de ánimo de lucro na prestación dos seus servizos, quedando obrigada ante o protectorado a lle render contas anualmente e xustificar, a través dunha memoria anual, o cumprimento das cargas fundacionais, así como a presentarlle o proxecto de orzamento con anterioridade ao inicio do exercicio económico para o cal se formula, e debendo solicitar as preceptivas autorizacións cando sexan necesarias.

Santiago de Compostela, 19 de abril 2006.

Ricardo Jacinto Varela Sánchez

Conselleiro de Traballo