A Orde do 8 de febreiro de 2006 (DOG nº 38, do 23 de febreiro) establece o procedemento e requisitos a que se suxeitará, no ámbito da Comunidade Autónoma de Galicia, a expedición do carné profesional de operador de guindastre torre, en execución do previsto na disposición transitoria primeira do Real decreto 836/2003, do 27 de xuño.

Igualmente, mediante a mencionada orde regúlase o procedemento para a acreditación da experiencia profesional que faculta para optar á obtención do referido carné profesional de conformidade co previsto no punto 4.2 do anexo VI da instrución técnica complementaria MIE-AEM-2 aprobada polo referido real decreto.

Debido ao elevado número de persoas afectadas que non presentaron a documentación dentro dos prazos establecidos, e á importancia deste trámite para o desenvolvemento da súa actividade profesional, faise necesaria a ampliación dos prazos de presentación de solicitudes.

Por todo o exposto, e en uso das competencias que a Consellería de Innovación e Industria ten atribuídas na materia,

DISPOÑO:

Artigo único.

1. Modifícanse os prazos de presentación de solicitudes establecidos nos artigos 3 e 4 da Orde do 8 de febreiro de 2006, que se amplían ata o día 15 de xuño de 2006 inclusive.

2. As solicitudes formuladas logo de rematados os prazos establecidos nos referidos artigos teranse por validamente presentadas ao abeiro desta orde.

Disposicións derradeiras

Primeira.-Facúltase o director xeral de Industria, Enerxía e Minas para ditar cantos actos sexan necesarios para a aplicación e desenvolvemento desta orde.

Segunda.-A presente orde entrará en vigor o día seguinte ao da súa publicación no Diario Oficial de Galicia.

Santiago de Compostela, 2 de maio de 2006.

Fernando Xabier Blanco Álvarez

Conselleiro de Innovación e Industria