O marco xurídico da sinatura electrónica vén determinado pola Lei 59/2003, do 19 de decembro, que regula a súa eficacia xurídica e a prestación de servizos de certificación. Esta norma define a sinatura electrónica recoñecida como aquela sinatura electrónica avanzada baseada nun certificado recoñecido, e xerada mediante un dispositivo seguro. Tamén define o certificado electronico como o documento asinado electronicamente por un prestador de servizos de certificación, que vincula uns datos de verificación de sinatura e actúa en nome propio ou doutra persoa física ou xurídica á que representa.

Mediante o Decreto70/2004, do 25 de marzo, polo que se estableceu o código numérico persoal dos profesionais que interveñen nos procedementos de prestación e xestión de servizos do sistema sanitario público galego, a Consellería de Sanidade estableceu os elementos necesarios para a identificación individualizada daqueles profesionais. Para estes efectos, o código numérico persoal componse de 16 díxitos, é único para cada profesional ao longo da súa relación co sistema sanitario público galego, e non reasignable.

A mesma norma estableceu tamén o sistema de acreditación electrónica, definindo a súa estrutura, e levando asociada a xeración dun certificado dixital susceptible de ser utilizado como sinatura electrónica e chave de acceso seguro aos sistemas informáticos.

Co obxectivo de dispoñer deste tipo de certificados acordouse que a función de prestador de servizos de certificación para todo o ámbito sanitario público galego a realizase a Fábrica Nacional de Moeda e Timbre-Real Casa da Moeda (FNMT-RCM), que expediría os certificados electrónicos cumprindo os requisitos establecidos na Lei 59/2003, do 19 de decembro, para que sexan cualificados como recoñecidos, e proverá os recursos necesarios para poder cmprobar a validez de cada un dos certificados nas operacións de sinatura.

Como consecuencia do anterior, ditouse a Orde do 11 de abril de 2005, pola que se regulou o acceso ao certificado electrónico de identidade polos profesionais que interveñen nos procedementos de prestación e xestión de servizos do sistema sanitario público galego, pero non incluía no seu articulado mención aos documentos en soporte papel.

Por tal motivo cómpre ter en conta que nos escenarios onde o soporte papel siga a ser o vehículo

de comunicación entre facultativos médicos e diferentes axentes, no caso de documentos asinados dixitalmente e susceptibles de seren impresos, débense habilitar técnicas para que tales documentos, en forma impresa, teñan o mesmo valor xurídico que os asinados de xeito manuscrito, así como facilitar os medios para que o receptor deste tipo de documentos poida validar tanto o seu contido como a súa sinatura.

Así, o Servizo Galego de Saúde implementou medios que establecen un vínculo entre o documento asinado electronicamente e a súa réplica impresa, e facilitará mecanismos de validación mediante os cales o receptor dese documento impreso poderá verificar a súa autenticidade, polo que cómpre modificar a anterior Orde do 11 de abril de 2005 para incluír os mecanismos de validación da autenticidade dos documentos impresos en soporte papel.

En consecuencia, e co obxecto de alcanzar estes fins, no uso das facultades que me confire o artigo 34.6º da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 22 de outubro,

DISPOÑO:

Artigo único.-Engádense dous puntos ao artigo único da Orde do 11 de abril de 2005, pola que se regula o acceso ao certificado electrónico de identidade polos profesionais que interveñen nos procedementos de prestación e xestión de servizos do sistema sanitario público galego, co seguinte contido:

«4.-Para que un documento asinado electronicamente teña a mesma validez tras a súa impresión, é obrigado que cada copia en papel teña, ademais dos datos propios del, un código PDF-417 ou de similares características como marca gráfica de autenticación, no que se incluirá integramente o contido dos datos tal e como foron asinados na emisión do documento e a sinatura electrónica do ficheiro anterior. O documento impreso resultante terá a mesma validez que un documento asinado de xeito manuscrito.

5.-Entre os datos dun documento impreso xerado a partir dun documento asinado dixitalmente, atoparanse os identificadores que permitan acceder ao documento dixital mediante os servizos de validación que habilitará o Servizo Galego de Saúde para tal efecto».

Disposición adicional

A implantación dos aplicativos informáticos a que fai referencia a presente orde, efectuarase gradualmente nos centros da Consellería de Sanidade e do Servizo Galego de Saúde.

Disposicións derradeiras

Primeira.-Facúltase o secretario xeral da Consellería de Sanidade para adoptar as medidas axeitadas en relación coa execución e desenvolvemento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 29 de marzo de 2006.

María José Rubio Vidal

Conselleira de Sanidade

CONSELLERÍA DE PRESIDENCIA, ADMINISTRACIÓNS PÚBLICAS

E XUSTIZA