Con data do 18 de novembro de 2005 foi publicada no Diario Oficial de Galicia a orde da Consellería de Presidencia, Administracións Públicas e Xustiza, do 9 de novembro de 2005, pola que se clasifica de interese social a Fundación Ceo para el Desarrollo Empresarial, adscribíndoa á Consellería de Traballo, que exercerá plenamente o protectorado sobre ela.
O obxecto da fundación, segundo establece o artigo 6 dos seus estatutos, é o seguinte:
Fomentar a economía social, desenvolvendo actividades destinadas á creación de emprego, promover a innovación das empresas, fomentando a modernización das estruturas produtivas das empresas e a prestación de servizos e auxilios necesarios para fomentar a mellora da súa xestión e organización, facilitando o acceso ás novas ferramentas de xestión e formando e reciclando os seus traballadores. Actividades enmarcadas dentro do propósito de colaborar no desenvolvemento económico e no progreso e cohesión sociais mediante o fomento, promoción e asistencia da iniciativa privada empresarial.
Por todo isto, en virtude das competencias que me confire o artigo 34 da Lei 1/1983, do 22 de febreiro, reguladora da Xunta e do seu presidente, e segundo o establecido no artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro, e o artigo 32.3º a) do Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de interese galego, e no Decreto 8/2003, do 18 de xaneiro, polo que se modifica a estrutura orgánica da Xunta de Galicia,
DISPOÑO:
Primeiro.-Declarar de interese galego a Fundación Ceo para el Desarrollo Empresarial, ao cumpriren os seus estatutos as prescricións que, para tal efecto, sinala a vixente lexislación en materia de fundacións de interese galego.
Segundo.-Ordenar a inscrición da Fundación Ceo para el Desarrollo Empresarial no rexistro de fundacións de interese galego, sección da Consellería de Traballo, para os efectos constitutivos que sinala o artigo 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro.
Terceiro.-A dita fundación queda sometida ao disposto no resto da normativa de xeral aplicación, en especial, á obriga de darlles publicidade suficiente ás súas actividades e á ausencia de ánimo de lucro na prestación dos seus servizos, quedando obrigada ante o protectorado a lle render contas anualmente e xustificar, a través dunha memoria anual, o cum
primento das cargas fundacionais, así como a presentarlle o proxecto de orzamento con anterioridade ao inicio do exercicio económico para o que se formula, debendo solicitar as preceptivas autorizacións cando sexan necesarias.
Santiago de Compostela, 14 de febreiro de 2006.
Ricardo Jacinto Varela Sánchez
Conselleiro de Traballo