Dentro do plan de actividades da Escola Galega de Administración Pública para o 2006 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, en colaboración coa Consellería de Presidencia, Administracións Públicas e Xustiza e a OCDE as Xornadas internacionais: as conurbacións galegas desde unha perspetiva comparada, conforme as seguintes bases:

1. Obxectivos.

Galicia é unha rexión cun poderoso sistema urbano, cuxas pezas fundamentais se atopan no corredor atlántico. Nesa franxa destacan dúas grandes conurbacións establecidas arredor das cidades da Coruña e Vigo.

A articulación política, administrativa e económica deses espazos metropolitanos funcionais, con respostas institucionais adecuadas á súa realidade, resulta fundamental non só para unha mellor coordinación do planeamento e dos grandes servizos nesas áreas, senón tamén para fortalecer eses territorios urbanos na competencia nacional e internacional.

Estas xornadas diríxense a fomentar a necesaria análise desta cuestión esencial para o futuro inmediato de Galicia, contando coa participación de recoñecidos expertos internacionais na materia e coa inestimable colaboración da Organización para a Cooperación e o Desenvolvemento Económico (OCDE), que vén situando a gobernanza territorial entre os temas centrais das súas análises e preocupacións.

Tamén se especifica que, na terminoloxía da OCDE, son cidades-rexión ou cidades medias con vocación metropolitana aquelas que se atopan por baixo da barreira do millón de habitantes e que articulan un espazo urbano e territorial máis amplo.

2. Contido.

Trataranse estes temas:

-Tendencias e potencial económico das cidades-rexión e das cidades medias con vocación metropolitana.

-A metropolitanización, entre a competencia e a cooperación: ¿que políticas de desenvolvemento económico para as cidades-rexións e as cidades medias con vocación metropolitana?

-¿Que gobernanza para a coordinación e a xestión de servizos nas cidades-rexión e as cidades medias con vocación metropolitana?

-Áreas metropolitanas para cidades medias e cidades-rexión: experiencias comparadas.

-¿Que leccións sacar para a realidade metropolitana de Galicia?

3. Destinatarios.

Persoal ao servizo da Xunta de Galicia e da Administración local galega e interesados en xeral.

4. Desenvolvemento.

-Horario: mañá e tarde.

-Lugar e data: as xornadas convocadas desenvolveranse no salón de actos da Escola Galega de Administración Públicas (EGAP), sita no Polígono das Fontiñas, Rúa Madrid, 2-4, en Santiago de Compostela, o 30 e o 31 de marzo de 2006.

5. Inscrición.

-Prazo: remata o martes, día 28 de marzo de 2006.

-Tramitación de solicitudes: as solicitudes irán dirixidas ao director da Escola Galega de Administración Pública, Polígono das Fontiñas, Rúa Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 29 de marzo, das 8.30 ás 14.30 horas, aos seguintes números: 981 54 62 39 ou 981 54 60 40.

6. Modificacións.

A EGAP reserva para si a facultade de interpretar e de resolver as incidencias que puidesen xurdir no desenvolvemento das xornadas, así como o de cancelalas, se o escaso número de solicitudes non xustificase a súa realización.

7. Certificación de asistencia.

Entregaráselles, ao remate das xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e a data da súa realización.

Santiago de Compostela, 15 de febreiro de 2006.

Antonio Izquierdo Escribano

Director da Escola Galega de Administración Pública

XULGADO DE PRIMEIRA INSTANCIA E INSTRUCIÓN NÚMERO UN

DE PADRÓN