A Orde do 27 de decembro de 2005, publicada no Diario Oficial de Galicia nº 249, do 29 de decembro, establece as bases reguladoras das axudas para a mellora e modernización das estruturas de produción das explotacións agrarias e convócaas para o ano 2006. No seu artigo 18.5º establécese que o prazo de presentación das solicitudes de axudas rematará o 3 de marzo de 2006.
Non obstante, o número de solicitudes presentadas non acada o volume de peticións realizadas en convocatorias anteriores, polo que, tendo en conta a contía da dotación orzamentaria prevista para esta orde, considérase necesario proceder á ampliación do prazo establecido inicialmente para a presentación de solicitudes.
En consecuencia, de acordo co disposto no artigo 30.I.3 do Estatuto de autonomía de Galicia e no uso das facultades que me confire a Lei 1/1983, do 22 de febreiro, reguladora da Xunta e do seu presidente, e no Decreto 50/2002, do 14 de febreiro,
DISPOÑO:
Artigo único.
O prazo previsto no artigo 18.5º da Orde do 27 de setembro de 2005 (DOG nº 249, do 29 de decembro), para a presentación de solicitudes de axudas para a mellora e modernización das estruturas de produción das explotacións agrarias prorrógase ata o 15 de marzo de 2006, inclusive.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 20 de febreiro de 2006.
Alfredo Suárez Canal
Conselleiro do Medio Rural