A Lei 12/1993, do 6 de agosto, de fomento de investigación e desenvolvemento tecnolóxico de Galicia (DOG do 23 de agosto), crea no artigo 14 o Consello Asesor de Investigación e Desenvolvemento Tecnolóxico, e determina que estará composto por un presidente, un secretario e os vogais que representen as universidades, a comunidade autónoma e os axentes sociais do modo que regulamentariamente se determine.
No artigo 15 da Lei 12/1993, establécense entre as funcións do Consello Asesor de Investigación e Desenvolvemento Tecnolóxico, as de propoñerlle obxectivos para a súa incorporación ao Plan Galego de Investigación e Desenvolvemento Tecnolóxico, propoñerlle á Comisión Interdepartamental de Ciencia e Tecnoloxía de Galicia (Cicetga) a incorporación ao plan daqueles programas que considere importantes e a de emitir informe sobre o anteproxecto do plan, así como calquera outro que lle sexa requirido pola Cicetga de cara á elaboración da memoria anual.
A composición do Consello Asesor foi inicialmente establecida polo Decreto 141/1995, do 10 de maio (DOG nº 101, do 29 de maio), e posteriormente polo Decreto 14/1998, do 15 de xaneiro (DOG nº 12, do 20 de xaneiro). Os nomeamentos e cesamentos dos seus membros fixéronse a través de varios decretos (Decreto 416/1996, do 21 de novembro; Decreto 21/1998, do 22 de xaneiro; Decreto 23/1998, do 22 de xaneiro; Decreto 250/1998, do 10 de setembro; Decreto 223/2000, do 29 de setembro).
Os cambios producidos desde o establecemento da última composición do Consello Asesor en 1998, tanto na estrutura da Xunta de Galicia, como noutras institucións que o compoñen, fan necesario que se proceda a renovar a súa composición e proceder a nomear os seus novos membros.
Na súa virtude, por proposta do conselleiro de Innovación e Industria e logo de deliberación do Consello da Xunta de Galicia na súa reunión do día dous de febreiro de dous mil seis,
DISPOÑO:
Artigo 1º
O Consello Asesor de Investigación e Desenvolvemento Tecnolóxico estará composto por un total de 19 membros: un presidente, os tres reitores das universidades de Galicia, tres representantes da Administración autonómica, o delegado do Consello Superior de Investigacións Científicas en Galicia,
seis representantes dos axentes sociais, catro representantes de recoñecido prestixio no ámbito da I+D+I e un secretario; todos eles serán nomeados por orde do conselleiro de Innovación e Industria.
Artigo 2º
O presidente do Consello Asesor de Investigación e Desenvolvemento Tecnolóxico será proposto polo conselleiro de Innovación e Industria entre investigadores de recoñecido prestixio.
Artigo 3º
Vogais:
1. Os reitores das universidades de Galicia ou persoa en quen deleguen.
2. Tres representantes da Administración autonómica:
2.a) O director xeral de Investigación, Desenvolvemento e Innovación.
2.b) O secretario xeral da Consellería de Innovación e Industria.
2.c) O director xeral de Promoción Científica e Tecnolóxica do Sistema Universitario de Galicia.
3. O delegado do Consello Superior de Investigacións Científicas en Galicia.
4. Seis representantes das organizacións empresariais e sindicais:
4.a) Tres serán propostos polas organizacións sindicais que teñan a consideración de máis representativas dentro do ámbito territorial da comunidade autónoma, de conformidade coa normativa vixente.
4.b) Tres serán representantes das organizacións empresariais de maior implantación en Galicia.
5. Catro representantes de recoñecido prestixio no ámbito da I+D+I propostos pola Comisión Interdepartamental de Ciencia e Tecnoloxía de Galicia, dos que dous procederán do ámbito empresarial e dous do académico.
Artigo 4º
Un subdirector xeral da Dirección Xeral de Investigación, Desenvolvemento e Innovación terá o cargo de secretario do Consello Asesor de Investigación e Desenvolvemento Tecnolóxico.
Artigo 5º
O mandato dos vogais sinalados nos puntos 4 e 5 do artigo 3º será de catro anos renovables por unha soa vez. No suposto de cesamento dalgún deles antes de finalizar o dito período, o seu substituto será nomeado para o tempo que reste para a finalización do mandato.
Disposición derrogatoria
Quedan derrogados o Decreto 14/1998, do 15 de xaneiro, e todas aquelas disposicións de igual o inferior rango que se opoñan ao disposto neste decreto.
Disposicións derradeiras
Primeira.-Quedarán sen efecto os nomeamentos dos actuais membros do Consello Asesor de Investigación e Desenvolvemento Tecnolóxico a partir da entrada en vigor deste decreto.
Segunda.-No prazo máximo de tres meses desde a entrada en vigor deste decreto procederase á constitución do Consello Asesor de Investigación e Desenvolvemento Tecnolóxico.
Terceira.-Facúltase o conselleiro de Innovación e Industria para ditar as disposicións necesarias de desenvolvemento e execución deste decreto.
Cuarta.-Este decreto entrará en vigor o día seguinte ao da súa publicación no Diario Oficial de Galicia.
Santiago de Compostela, dous de febreiro de dous mil seis.
Emilio Pérez Touriño
Presidente
Fernando Xabier Blanco Álvarez
Conselleiro de Innovación e Industria
