A resolución do director do Instituto Enerxético de Galicia do 16 de xuño de 2005 (DOG nº 122, do 27 de xuño) establece as bases reguladoras das axudas encamiñadas ao fomento da enerxía solar e procede á súa convocatoria para o exercicio 2005. No artigo 3 da devandita resolución establécese un importe orzado para o exercicio 2005 de 150.000 euros, con cargo á aplicación orzamentaria 03.01.01.2180107.
Tendo en conta o gran número e dimensión de proxectos de enerxía solar recibidos, unha vez que se comprobou que o importe total solicitado destas axudas supera amplamente o crédito inicialmente establecido, cómpre ampliar a dotación orzamentaria consignada inicialmente, coa finalidade de poder atender ao maior número de solicitudes.
Por todo o exposto, e no uso das facultades que me foron conferidas,
RESOLVO:
Artigo único.
1. Ampliar o importe orzado das axudas encamiñadas ao fomento da enerxía solar para o exercicio 2005 en 200.000 euros adicionais.
2. Esta modificación non afecta os prazos establecidos na Resolución do 16 de xuño de 2005, antes mencionada, no que se refire á presentación de solicitudes, nin supón tampouco alteración do resto do seu articulado.
3. Esta resolución entrará en vigor o mesmo día da súa publicación no Diario Oficial de Galicia.
Santiago de Compostela, 23 de decembro de 2005.
Xoán Ramón Doldán García
Director do Instituto Enerxético de Galicia