Vista a solicitude presentada pola Asociación Ferrolana de Drogodependencias (Asfedro), con domicilio en Ferrol, a través da que insta a súa declaración de interese para a Comunidade Autónoma galega en materia de drogodependencias, e tendo en conta os seguintes

Supostos de feito

Primeiro.-A Asociación Ferrolana de Drogodependencias desenvolve as súas actividades no territorio

da comunidade autónoma, levando a cabo exclusivamente programas de prevención e incorporación social así como de tratamento de drogodependencias non exclusivamente alcohólicas.

Segundo.-Esta asociación á entrada en vigor do Decreto 74/2002, do 28 de febreiro, polo que se crea o Rexistro de Entidades Colaboradoras do Plan de Galicia sobre Drogas e se regula a súa declaración de interese, modificado polo Decreto 58/2005, do 24 de febreiro, xa viña desenvolvendo actividades no ámbito das drogodependencias.

Terceiro.-O funcionamento dos programas desenvolvidos nos centros e servizos dos que é titular a citada asociación é coordinado dentro do Plan de Galicia sobre Drogas.

Cuarto.-Dado o anterior, esta asociación figura inscrita no Rexistro de Entidades Colaboradoras do Plan de Galicia sobre Drogas e ten asignado o número 2003/27.

Fundamentos de dereito

Primeiro.-O artigo 20.2º da Lei 2/1996, do 8 de maio, de Galicia sobre drogas, establece que a Xunta de Galicia poderá declarar de interese para a Comunidade Autónoma galega aquelas entidades sen ánimo de lucro que estean levando a cabo programas ou servizos no ámbito das distintas drogodependencias e que cumpran os requisitos que regulamentariamente se establezan.

Segundo.-Así mesmo, o Decreto 58/2005, do 24 de febreiro, polo que se modifica o Decreto 74/2002, do 28 de febreiro, polo que se crea o Rexistro de Entidades Colaboradoras do Plan de Galicia sobre Drogas e se regula o procedemento para a súa declaración de interese, establece no seu artigo 8 que a Xunta de Galicia, tras a solicitude do interesado, poderá declarar de interese para a Comunidade Autónoma galega, mediante orde da conselleira de Sanidade, as entidades sen ánimo de lucro inscritas no Rexistro de Entidades Colaboradoras do Plan de Galicia sobre Drogas. Para estes efectos, as devanditas entidades deberán estar levando a cabo exclusivamente programas ou servizos no campo das drogodependencias, sempre e cando se adecuen aos criterios e contidos dos programas recollidos no documento do Plan de Galicia sobre Drogas vixente en cada momento.

Na súa virtude,

DISPOÑO:

Declarar de interese para a Comunidade Autónoma galega a Asociación Ferrolana de Drogodependencias.

Santiago de Compostela, 15 de novembro de 2005.

Mª José Rubio Vidal

Conselleira de Sanidade

CONSELLERÍA DE PRESIDENCIA, ADMINISTRACIÓNS PÚBLICAS

E XUSTIZA