O Concello de Marín conta con normas complementarias e subsidiarias municipais, aprobadas definitivamente pola Comisión Provincial de Urbanismo o 9-6-1978.
A documentación remitida consta de expediente administrativo e proxecto técnico da modificación proposta.
O obxecto desta modificación puntual é a reclasificación duns terreos situados nunha travesía á avda. Jaime Janer, cunha superficie de 2.612 m clasificados nas NN.SS. como solo urbano de desenvolvemento previsible, en equipamento sanitario-asistencial exclusivo.
De conformidade co sinalado no artigo 93.4º da Lei 9/2002, as modificacións de calquera dos elementos dos plans, proxectos, normas e ordenanzas suxeitaránse ás mesmas disposicións enunciadas para a súa tramitación e aprobación.
Terminada a fase de elaboración da modificación puntual, e inmediatamente antes da súa aprobación inicial, o concello remitiu o expediente a informe preceptivo desta consellería, que foi emitido en data 5-10-2004, de conformidade co disposto no artigo 85.1º da Lei 9/2002.
O Pleno do Concello o 11-2-2005 acordou a aprobación inicial, publicada en prensa e no DOG do 9-3-2005, co resultado da fase de información pública que consta no expediente tramitado e aprobado provisionalmente polo Pleno do Concello o 13-5-2005.
Revisado o documento relativo ao proxecto de modificación puntual nº 5 das NN.SS. para a construción dun novo centro de saúde, e analizados os aspectos sinalados no artigo 85.7º da Lei 9/2002 (LOUG), procede sinalar que cos informes achegados o 7 de setembro enténdense cumpridas todas as observacións sinaladas nos anteriores informes.
De conformidade co disposto no artigo 89.1º da Lei 9/2002, a competencia para a aprobación definitiva dos plans xerais de ordenación municipal correspóndelle ao conselleiro competente en materia de urbanismo e ordenación do territorio.
En consecuencia, de conformidade co establecido na Lei 9/2002, de 30 de decembro, de ordenación urbanística e protección do medio rural de Galicia, e por proposta da Dirección Xeral de Urbanismo, desta mesma data,
DISPOÑO:
Artigo 1º
Aprobar definitivamente o proxecto da modificación puntual nº 5 das NN.SS. para a construción dun novo centro de saúde do Concello de Marín.
Artigo 2º
De conformidade co disposto polos artigos 92 da Lei 9/2002, e 70 da Lei 7/1985, do 2 de abril, reguladora das bases de réxime local, o concello deberá publicar a normativa e ordenanzas da modificación aprobada definitivamente no BOP.
Disposición derradeira
Contra esta orde cabe interpor recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses contados desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.
Santiago de Compostela, 27 de setembro de 2005.
María José Caride Estévez
Conselleira de Política Territorial,
Obras Públicas e Transportes