Dentro do Plan de actividades da Escola Galega de Administración Pública para o 2005 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración coa Dirección Xeral de Protección Civil da Consellería de Presidencia, Administracións Públicas e Xustiza e co Centro de Estudos Xudiciais e Seguridade Pública de Galicia, o I Encontro sobre a economía e xestión dos riscos e as emerxencias conforme as seguintes bases:

1. Obxectivos.

-Analizar os custos/beneficios do investimento público/privado na prevención de riscos da vida cotiá.

-Debater os custos dos desastres naturais ou provocados polo home (incluídos os incendios forestaris), comparándoos cos custos dos sistemas de prevención e/ou dos dispositivos de resposta.

-Analizar o gasto público das comunidades autónomas e administracións públicas locais en materia de prevención e atención aos riscos e/ou desastres naturais e humanos (incendios).

-Avaliar a eficacia e eficiencia dos modelos e sistemas de protección civil e a atención ás emerxencias nas diferentes comunidades autónomas e administracións públicas locais (tipos de xestión/gasto por capítulos, funcións, intervenientes e propostas). Bombeiros.

-Función do 112 das comunidades autónomas na atención e na xestión das emerxencias (modelo de xestión, custos e clientes).

2. Contido.

Trataranse estes temas:

-Análise económica dos desastres en Galicia.

-Riscos extraordinarios: cobertura dos danos provocados. Funcións do consorcio de compensación de seguros.

-Tendencias futuras das grandes emerxencias na fachada atlántica galega.

-Aproximación ao gasto público en Galicia en situacións de emerxencia.

-Sistemas de protección civil e da xestión de emerxencias nas comunidades autónomas.

-O 11 M: Madrid 112 na xestión desta emerxencia. Valores económicos.

3. Destinatarios.

Persoal ao servizo de calquera das administracións públicas existentes en Galicia e interesados en xeral.

4. Desenvolvemento.

-Horario: mañá e tarde.

-Lugar e data: o encontro convocado desenvolverase no salón de actos da Escola Galega de Administración Públicas (EGAP), sita no polígono das Fontiñas, rúa de Madrid, 2-4, en Santiago de Compostela, o 16 de decembro de 2005.

5. Inscrición.

-Prazo: remata o mércores, día 14 de decembro de 2005.

-Tramitación de solicitudes: as solicitudes irán dirixidas ao director da Escola Galega de Administración Pública, polígono das Fontiñas, rúa de Madrid, 2-4 - 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.

-Número de prazas: limitado á capacidade do local.

-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.

Os peticionarios poderán obter confirmación da súa posible admisión, chamando por teléfono, o día 15 de decembro, de 8.30 a 14.30 horas, aos seguintes números: 981 54 62 39/44 ou 981 54 60 40.

6. Modificacións.

A EGAP reserva para si a facultade de interpretar e de resolver as incidencias que puidesen xurdir no desenvolvemento deste encontro, así como o de cancelalo, se o escaso número de solicitudes non xustificase a súa realización.

7. Certificación de asistencia.

Entregaráselles, ao remate do encontro, a aquelas persoas inscritas que concorresen asiduamente a el, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e a data da súa realización.

8. Retransmisión por internet.

As persoas interesadas en seguir o desenvolvemento deste encontro pola internet, poden facelo a través do seguinte enderezo: egap.xunta.es.

Santiago de Compostela, 22 de novembro de 2005.

Antonio Izquierdo Escribano

Director da Escola Galega de Administración

Pública

CONSELLERÍA DE PRESIDENCIA, ADMINISTRACIÓNS PÚBLICAS

E XUSTIZA