A xestión das augas ten como obxectivo fundamental e básico o de compatibilizar e harmonizar esta coas principais directrices do desenvolvemento sustentable, coa ordenación do territorio e coa conservación e protección da natureza, contando co instrumento da planificación hidrolóxica, que ten o fin primordial do aproveitamento óptimo e eficiente dos recursos dispoñibles para a satisfacción das demandas e, en particular, do abastecemento de auga ás poboacións dos núcleos rurais e urbanos, considerado este uso prioritario na utilización dos recursos hídricos.

O artigo 58 do Real decreto lexislativo 1/2001, do 20 de xullo, polo que se aproba o texto refundido da Lei de augas, e o artigo 31 da Lei 8/1993, do 23 de xuño, reguladora da Administración hidráulica de Galicia, permiten adoptar, en casos de secas extraordinarias, sobreexplotación de acuíferos ou en similares estados de necesidade ou de concorrencia de situacións anómalas, medidas para a superación das devanditas situacións, mediante norma con rango de decreto en relación coa utilización de dominio público hidráulico, mesmo cando xa fose obxecto de concesión.

O novo marco ambiental, xurídico e técnico xurdido desde a transposición da Directiva Marco da Auga afecta dun xeito directo aos plans hidrolóxicos de bacía, o que obriga estes a adoptaren nos seus presupostos os criterios da directiva, xerando así a necesidade da correspondente modificación e revisión dos plans.

Consecuentemente, ante este escenario de novos obxectivos, a Administración hidráulica está a elaborar os estudos e traballos que permitan, atendendo á crecente presión que supón o continuo crecemento das demandas, conseguir a protección das augas, tanto en termos cualitativos coma cuantitativos, e garantir así a sustentabilidade do recurso.

Neste sentido, cómpre salientar que estes estudos implican, por unha banda, modificacións e cambios de carácter substancial no Plan hidrolóxico de Galicia-Costa e, por outra, unha influencia directa no documento técnico Plan de abastecemento que está, neste momento, en elaboración.

Estas actuacións prioritarias e a nova análise das necesidades en materia de administración hidráulica existentes en Galicia, así como o feito de que determinadas zonas do dominio público hidráulico están en risco de sobreexplotación, obrigan e motivan unha reformulación e adaptación do Plan sectorial hidroeléctrico das bacías hidrográficas de Galicia-Costa.

En virtude do anterior, por proposta do conselleiro de Medio Ambiente e Desenvolvemento Sostible e logo de deliberación do Consello da Xunta de Galicia na súa reunión do día dez de novembro de dous mil cinco,

DISPOÑO:

Artigo 1º

Acordar a iniciación dos trámites para a revisión do Plan sectorial hidroeléctrico das bacías hidrográficas de Galicia-Costa, de conformidade co disposto no Decreto 80/2000, do 23 de marzo, polo que se regulan os plans e proxectos sectoriais de incidencia supramunicipal.

Artigo 2º

Suspender a tramitación administrativa das solicitudes de concesións de aproveitamentos hidroeléctricos de augas públicas ata a aprobación da revisión do Plan sectorial hidroeléctrico das bacías de Galicia-Costa para os efectos de adaptación das necesidades de utilización do dominio público hidráulico á revisión do devandito plan sectorial.

Artigo 3º

Quedan excluídas da suspensión as concesións de aproveitamentos hidroeléctricos outorgados con anterioridade a este acordo, sen prexuízo dos recursos que legalmente procedan.

Disposicións derradeiras

Primeira.-Autorízase o conselleiro de Medio Ambiente e Desenvolvemento Sostible a ditar as disposicións necesarias para o desenvolvemento e aplicación deste decreto.

Segunda.-Este decreto entrará en vigor o día seguinte ao da súa publicación no Diario Oficial de Galicia.

Santiago de Compostela, dez de novembro de dous mil cinco.

Emilio Pérez Touriño

Presidente

Manuel Vázquez Fernández

Conselleiro de Medio Ambiente

e Desenvolvemento Sostible