Tendo en conta que as bases reguladoras dos distintos programas de apoio ás empresas xestionados polo Igape determinan por regra xeral a competencia do presidente para resolver, modificar ou determinar incumprimentos nos expedientes, considérase conveniente, por razóns de eficiencia na xestión, a delegación das ditas facultades no director xeral en determinados expedientes.

Polo que antecede, en virtude das facultades que teño conferidas mediante o artigo 12 a) da Lei 5/1992, do 10 de xuño, de creación do Instituto Galego de Promoción Económica, e do artigo 11.1º a) do Decreto 317/1992, do 12 de novembro, polo que se aproba o Regulamento do Igape,

RESOLVO:

Primeiro.-Publicar a seguinte delegación de facultades no director xeral, aprobada polo Consello de

Dirección do Igape na súa xuntanza do 31 de outubro de 2005:

1. Delégase no director xeral do Igape a competencia para resolver a concesión ou denegación, a modificación e a determinación da existencia ou non de incumprimentos naqueles expedientes de axudas e subvencións dos programas do Igape cun gasto subvencionable inferior a 300.000 euros e cun importe proposto de subvención inferior a 30.000 euros, nos expedientes relativos ás seguintes axudas:

-Bases reguladoras das axudas para o programa de Emprendedores (Resolución do 13 de xullo de 2001, DOG nº 142, do 23 de xullo).

-Bases reguladoras das axudas de salvamento e reestruturación de empresas en crise (Resolución do 13 de xullo de 2001, DOG nº 142, do 23 de xullo).

-Bases polas que se regulan as axudas aos programas de especialización laboral (Resolución do 13 de xullo de 2001, DOG nº 142, do 23 de xullo).

-Bases reguladoras das axudas para os programas de apoio á continuidade e mellora competitiva da PEME galega (Resolución do 11 de marzo de 2005, DOG nº 58, do 28 de marzo).

-Convenio de apoio financeiro 2004-2006 ás pequenas e medianas empresas (Resolución do 27 de xaneiro de 2004, DOG nº 20, do 30 de xaneiro).

-Convenio de apoio financeiro 2004-2006 aos investimentos das pequenas e medianas empresas financiado mediante contratos de arrendamento financeiro (Resolución do 27 de xaneiro de 2004, DOG nº 20, do 30 de xaneiro).

-Convenio de apoio financeiro ao comercio polo miúdo na Comunidade Autónoma de Galicia 2004-2006 (Resolución do 27 de xaneiro de 2004, DOG nº 20, do 30 de xaneiro).

-Convenio de apoio financeiro 2004-2006 ao sector transporte pùblico por estrada de Galicia para a renovación da frota de vehículos (Resolución do 14 de maio de 2004, DOG nº 100, do 26 de maio).

2. Delégase no director xeral do Igape, nos mesmos termos expresados no punto 1, pero referíndose exclusivamente á competencia para resolver a modificación e o incumprimento naqueles expedientes de axudas e subvencións dos convenios de apoio financeiro anteriores ao 2004-2006.

Segundo.-Esta resolución entrará en vigor o día da súa publicación no Diario Oficial de Galicia.

Santiago de Compostela, 3 de novembro de 2005.

José Antonio Delgado Arce

Director xeral do Instituto Galego de Promoción

Económica