Coa finalidade de crear un marco organizativo axeitado para o desenvolvemento das competencias da Comunidade Autónoma de Galicia en materia de seguridade e saúde laboral ditouse o Decreto 200/2004, do 29 de xullo, polo que se crea o Instituto Galego de Seguridade e Saúde Laboral e se regula o Consello Galego de Seguridade e Saúde Laboral.

Este organismo naceu pois, co obxectivo non só de promover a mellora das condicións de traballo, senón tamén de elevar o nivel de protección da saúde e seguridade das traballadoras e traballadores galegos nos seus respectivos ámbitos laborais.

Ademais, perseguía unha maior presenza e participación institucional das organizacións galegas empresariais e sindicais máis representativas, ao tempo que establecía a coordinación eficaz entre as distintas administracións competentes na materia, tal e como reza o seu propio preámbulo.

A estrutura organizativa creada ao abeiro do Decreto 200/2004, lonxe de permitir un mellor desenvolvemento das funcións competenciais da Administración laboral e de coordinación interadministrativa, xerou unha duplicidade de titularidade orgánica e funcional que impediu a súa operatividade e funcionamento, segundo criterios técnicos e de independencia desde o mesmo momento da súa creación.

Ademais, a oportunidade de dotar dun corpo técnico propio e de medios materias suficientes o instituto para sustentar a súa actividade, demanda a urxente necesidade de reformular a súa configuración xurídica actual.

Por todo o anterior, e no convencemento de que a sociedade galega o demanda, cómpre suprimir o Instituto Galego de Seguridade e Saúde Laboral facéndose cargo a Dirección Xeral de Relacións Laborais dos cometidos do instituto mentres non se proceda, a través dun proceso de negociación cos axentes económicos e sociais galegos, á elaboración dun proxecto de lei cun novo modelo de instituto que, con orzamento de seu, se configure como organismo autónomo de carácter administrativo, con personalidade xurídica propia e plena capacidade de obrar para o cumprimento dos seus fins.

Seguen en vigor o resto das disposicións do capítulo II referidas ao Consello Galego de Seguridade e Saúde Laboral e aos comités provinciais, en canto órganos colexiados asesores da Xunta de Galicia na formulación de políticas de prevención e de participación institucional en materia de seguridade e saúde laboral, nos seus respectivos ámbitos de actuación.

Na súa virtude, oído o Consello Galego de Seguridade e Saúde Laboral e consultado o Consello Galego de Relacións Laborais, por proposta do conselleiro de Traballo e logo da deliberación do Consello da Xunta na súa reunión do día vinte de outubro de dous mil cinco,

DISPOÑO:

Artigo primeiro.-Supresión do Instituto Galego de Seguridade e Saúde Laboral.

Un.-Queda suprimido o Instituto Galego de Seguridade e Saúde Laboral creado polo Decreto 200/2004, do 29 de xullo, polo que se crea o Instituto Galego de Seguridade e Saúde Laboral e se regula o Consello Galego de Seguridade e Saúde Laboral.

Dous.-O cumprimento dos fins encomendados ao instituto, así como o exercicio das funcións que lle son atribuídas no artigo 4 do capítulo I do Decreto 200/2004, do 29 de xullo, serán desenvolvidos pola Dirección Xeral de Relacións Laborais da Consellería de Traballo a través das súas unidades administrativas centrais e periféricas de conformidade co establecido no Decreto 536 /2005, do 6 de outubro, polo que establece a estructura orgánica da Consellería de Traballo.

Tres.-Corresponde á Dirección xeral de Relacións Laborais mentres non se proceda á creación do organismo que substitúa o Instituto Galego de Seguridade e Saúde Laboral, a dirección, coordinación, control e execución das competencias da comunidade autónoma en materia de seguridade e saúde laboral.

Artigo segundo.-Modificación do Decreto 200/2004, do 29 de xullo, polo que se crea o Instituto Galego de Seguridade e Saúde Laboral e se regula o Consello Galego de Seguridade e Saúde Laboral.

O Decreto 200/2004, do 29 de xullo, polo que se crea o Instituto Galego de Seguridade e Saúde Laboral e se regula o Consello Galego de Seguridade e Saúde Laboral modifícase do seguinte xeito:

Un.-Queda suprimido o punto 1 letra b) do artigo 15 e o punto 2 do mesmo artigo.

Dous.-Modificase o punto 2, letra a) do artigo 16 que queda redactado como segue:

«2. Cada comité provincial estará integrado por dezaoito membros:

O presidente, cargo que recaerá no titular da delegación provincial da consellería que teña en cada momento atribuídas as competencias en materia de relacións laborais e, por tanto, en seguridade e saúde laboral.

Vogais:

a) Pola Administración, cinco vogais: os titulares das dúas delegacións provinciais das consellerías con competencia en materia de sanidade e industria ou as persoas que designen, o xefe da Inspección Provincial de Traballo e Seguridade Social, o titular do Centro Provincial de Seguridade e Saúde Laboral e un funcionario do centro designado polo delegado provincial, que actuará como secretario».

Disposición adicional

As referencias feitas ao director do instituto e á dirección do instituto no artigo 14 do capítulo II do Decreto 200/2004, do 29 de xullo, polo que se crea o Instituto Galego de Seguridade e Saúde Laboral e se regula o Consello Galego de Seguridade e Saúde Laboral entenderanse feitas ao titular da Subdirección Xeral de Seguridade e Saúde Laboral.

Disposición derrogatoria

Derróganse os artigos 1, 2, 3, 5, 6, 7, 8, 9, 10, 11, 12, 13 do capítulo I do Decreto 200/2004, do 29 de xullo, polo que se crea o Instituto Galego de Seguridade e Saúde Laboral e se regula o Consello Galego de Seguridade e Saúde Laboral.

Disposición derradeira

Primeira.-O Consello da Xunta e a Consellería de Traballo, no ámbito das súas respectivas competencias, adoptarán cantas disposicións sexan necesarias para o desenvolvemento e a aplicación desta norma.

Segunda.-Esta disposición entrará en vigor o día seguinte ao da súa publicación no Diario Oficial de Galicia.

Santiago de Compostela, vinte de outubro de dous mil cinco.

Emilio Pérez Touriño

Presidente

Ricardo Jacinto Varela Sánchez

Conselleiro de Traballo

CONSELLERÍA DE POLÍTICA TERRITORIAL, OBRAS PÚBLICAS

E TRANSPORTES