O recente proceso de modernización da Administración parlamentaria, na procura da mellora do funcionamento dos servizos da Cámara que desenvolven as funcións e apoio aos deputados, leva consigo certos cambios nos procesos administrativos e nas estruturas que os sustentan.

En concreto, un aspecto que tradicionalmente tiña un alcance meramente instrumental e de colaboración material na función parlamentaria, como era a telefonía, ten adquirido unha nova dimensión coa informatización das convocatorias dos órganos parlamentarios e co plan de progresiva implantación da sinatura electrónica na Cámara.

Xa que logo, a Mesa, na súa reunión do 13 de outubro de 2005,

DISPÓN:

Artigo único.-Servizo de Tecnoloxías da Información.

Engádeselle unha nova alínea j) ao número 1 do artigo 9 do Regulamento de organización e funcionamento da Administración do Parlamento de Galicia, que queda redactada da seguinte maneira:

«j) A xestión e operación de todas as redes de comunicación do Parlamento, telefónicas, de datos e calquera outra que se poida crear».

Disposición derrogatoria

Única.-Supresión da alínea i) do artigo 31.

Queda derrogado o precepto contido na alínea i) do artigo 31 do Regulamento de organización e funcionamento da Administración do Parlamento de Galicia.

Disposición derradeira

Única.-Entrada en vigor.

Esta norma entrará en vigor o día seguinte ao da súa publicación no Boletín Oficial do Parlamento de Galicia.

Santiago de Compostela, 13 de outubro de 2005.

Dolores Villarino Santiago

Presidenta do Parlamento de Galicia