Visto o texto do convenio colectivo para as empresas concesionarias de servizos municipais de inmobilización, retirada da vía pública, traslado e déposito de vehículos da provincia de Ourense, código de convenio número 3200865, subscrito en data 16 de febreiro de 2005, en representación da parte económica, pola Confederación Empresarial de Ourense (CEO), e da parte social, pola central sindical Unión Sindical Obreira (USO), en representación dos traballadores do sector; e de conformidade co disposto no artigo 90.2º e 3º do Real decreto lexislativo 1/1995, do 24 de marzo, polo que se aproba o texto refundido da Lei do Estatuto dos traballadores, no Real decreto 1040/1081, do 22 de maio, sobre rexistro e depósito de convenios colectivos de traballo e no Real decreto 2412/1982, do 24 de xullo, sobre traspaso de funcións e servizos da Administración do Estado á Comunidade Autónoma de Galicia en materia de traballo, esta delegación provincial

ACORDA:

Primeiro.-Ordenar a súa inscrición no libro de rexistro de convenios colectivos de traballo, existente nesta delegación provincial, e notificación ás representacións económica e social da comisión negociadora.

Segundo.-Ordenar o seu depósito no Servizo de Relacións Laborais, Unidade de Mediación, Arbitraxe e Conciliación (UMAC).

Terceiro.-Dispoñer a súa publicación no Diario Oficial de Galicia.

Ourense, 22 de abril de 2005.

José Lage Lage

Delegado provincial de Ourense

Convenio colectivo para as empresas concesionarias de servizos municipais de inmobilización, retirada da vía pública, traslado e depósito de vehículos da provincia de Ourense (anos 2005-2006-2007)

Capítulo I

Disposicións xerais

Artigo 1º.-Ámbito funcional e territorial.

Este convenio regula as relacións laborais nas empresas concesionarias de servizos municipais de inmobilización, retirada da vía pública, traslado e depósito de vehículos da provincia de Ourense.

Artigo 2º.-Ámbito persoal.

Este convenio será de aplicación a todos os empresarios e traballadores incluídos dentro do seu ámbito funcional e territorial. Rexerá igualmente para aquelas empresas que, reunindo tales condicións, se establezan nun futuro na provincia de Ourense.

Os traballadores vinculados por unha relación laboral de carácter especial quedan expresamente excluídos do ámbito de aplicación deste convenio.

Artigo 3º.-Ámbito temporal.

Este convenio entrará en vigor para todos os efectos o 1 de xaneiro de 2005 e a súa vixencia estenderase ata o 31 de decembro de 2007.

Finalizada a súa vixencia inicial e se calquera das partes non o denuncia en tempo e forma, entenderase prorrogado automaticamente por períodos dun ano incrementándose os salarios do mesmo modo, conforme o IPC real do ano anterior.

A denuncia deste convenio deberá efectuarse con tres meses de antelación á data de finalización da súa vixencia, mediante comunicación escrita á outra parte e á autoridade laboral competente.

Denunciado o convenio, se as negociacións dun novo convenio se estenderan máis alá da data de finalización de vixencia, o convenio entenderase prorrogado ata a entrada en vigor do novo texto.

Artigo 4º.-Compensación e absorción.

As condicións pactadas forman un todo orgánico, indivisible e para efectos da súa aplicación práctica serán consideradas globalmente.

Todas as melloras laborais e económicas establecidas en virtude deste convenio serán compensables e absorbibles, en cómputo anual e ata onde alcancen, con aquelas melloras que de calquera clase e forma teñan concedidas as empresas con carácter voluntario en calquera momento, e polas que se establezan nun futuro en disposicións legais a partir da entrada en vigor deste convenio.

Sen prexuízo de que se poidan estender a calquera situación as melloras establecidas neste convenio nin da facultade de amplialas, as empresas que lle estean aboando ao seu persoal salarios superiores aos esixidos non estarán obrigadas a aplicar as elevacións que se fixen nestas estipulacións, agás a contía necesaria para suplir as diferenzas.

Artigo 5º.-Garantía ad personam.

Todas as melloras económicas establecidas neste convenio teñen o carácter de mínimas. Respecta

ranse a título individual as condicións económicas que fosen superiores ás establecidas neste convenio.

Artigo 6º.-Comisión paritaria.

Segundo o disposto nos artigos 85 e 91 do texto refundido do Estatuto dos traballadores, para a interpretación, vixilancia e cumprimento do pactado por ambas as partes neste convenio, créase unha comisión paritaria, integrada por dous representantes da Confederación de Empresarios de Ourense na comisión negociadora deste convenio, pola parte empresarial, e por dous representantes da central sindical USO na comisión negociadora do convenio, pola parte social. Fíxase o domicilio da parte empresarial na rúa Praza de Damas, número 1, de Ourense, e o da parte sindical en parque de San Lázaro, nº 12 de Ourense.

Os acordos alcanzados na comisión paritaria sobre cuestións relacionadas co convenio consideraranse parte del e terán a súa mesma eficacia e obrigatoriedade. Os ditos acordos remitiránselle á autoridade laboral competente para o seu rexistro.

Capítulo II

Condicións de traballo

Artigo 7º.-Período de proba.

A admisión do persoal na empresa considerarase provisional en tanto non transcorrese un período de proba, a duración do cal variará segundo o establecido a continuación:

-Técnicos titulados, seis meses.

-Persoal non titulado, tres meses.

Transcorrido o período de proba sen que mediase denuncia do contrato por ningunha das partes, o traballador continuará na empresa nas condicións establecidas no seu contrato.

Artigo 8º.-Aviso previo en caso de extinción do contrato de traballo.

O traballador que decida finalizar a súa relación laboral coa empresa deberá comunicarllo a ela, por escrito, cunha antelación mínima de quince días. Se incumprise esta obriga, a empresa poderá descontar da liquidación que lle corresponda ao traballador o importe da súa retribución diaria por cada día de atraso no aviso previo.

Artigo 9º.-Contrato para a formación.

Debido ás necesidades formativas impostas polas características dos postos de traballo do sector, as partes asinantes deste convenio, conforme o previsto no artigo 11.2º c) do texto refundido do Estatuto dos traballadores acordan que a duración máxima dos contratos para a formación concertados cos traballadores afectados por este convenio será de tres anos.

Esta duración máxima será aplicable tanto aos contratos que se celebren a partir da entrada en vigor deste convenio como aos xa vixentes con anterioridade.

Artigo 10º.-Contrato eventual por circunstancias da produción, acumulación de tarefas ou exceso de pedidos.

O contrato de duración determinada na súa modalidade de eventual por circunstancias da produción, acumulación de tarefas ou exceso de pedidos, regulado no artigo 15.1º b) do texto refundido do Estatuto dos traballadores, segundo redacción dada pola Lei 12/2001, do 9 de xullo, de medidas urxentes de reforma do mercado de traballo para o incremento do emprego e mellora da súa calidade, poderá ter unha duración máxima de doce meses e medio nun período de dezaoito meses.

Esta duración máxima será aplicable tanto aos novos contratos asinados a partir da entrada en vigor deste convenio como ás prórrogas dos contratos vixentes con anterioridade.

Artigo 11º.-Fomento da contratación indefinida.

Durante a vixencia deste convenio a conversión en indefinidos dos contratos de duración determinada ou temporais, incluídos os formativos, acollerase ao previsto na Lei 12/2001, do 9 de xullo, de medidas urxentes para a mellora do mercado de traballo para o incremento do emprego e a mellora da súa calidade, en virtude da cal os ditos contratos quedarán incluídos no réxime previsto para os contratos para o fomento da contratación indefinida.

As empresas incluídas no ámbito de aplicación deste convenio deberán ter polo menos o 40% do seu cadro de persoal con contrato indefinido.

Artigo 12º.-Xornada.

A xornada máxima para as empresas e traballadores afectados por este convenio será 1.768 horas durante 2005 e 1.760 durante os anos 2006 e 2007. Respectando esta xornada anual as empresas poderán acordar a súa distribución irregular.

Cando a empresa determine a distribución irregular, que será de obrigado cumprimento para todos os traballadores, a xornada poderá alcanzar unha duración máxima de doce horas diarias, respectando sempre o mínimo legal de descanso entre xornadas. O exceso de horas traballadas compensarase con descanso en igual número de horas nos períodos de menor produción que determine a empresa.

A xornada diaria poderá ser partida ou continuada. Os traballadores que realicen xornada continuada terán dereito a desfrutar dun período de descanso de 30 minutos.

Entre o final dunha xornada e o comezo da seguinte deberán transcorrer como mínimo 12 horas.

A organización e ordenación do traballo é competencia da empresa, se ben esta dará a coñecer aos seus traballadores os cuadrantes de traballo, mediante anuncio exposto no taboleiro de cada centro, cunha antelación mínima de quince días.

Artigo 13º.-Vacacións.

Todo o persoal terá dereito a desfrutar dun período de vacacións retribuídas. A súa duración será de 34 días no 2005 e 35 días no 2006 e 2007. Se ben, para o desfrute das vacacións será presuposto necesario a previa prestación de servizos, polo que a súa duración será proporcional ao tempo traballado.

O calendario anual de vacacións fixarase, segundo as necesidades do servizo, de común acordo entre a empresa e a representación legal dos traballadores.

Artigo 14º.-Permisos retribuídos.

Os traballadores poderán desfrutar dos permisos retribuídos nos casos que se establece, así como naqueles casos que determine a lexislación vixente:

a) Por matrimonio do traballador, 16 días.

b) Por nacemento de fillo/a, 4 días.

c) Por enfermidade grave ou falecemento do cónxuxe, parella estable ou parentes ata segundo grao de consanguinidade ou afinidade, 4 días.

d) Por falecemento de parente de terceiro grao de consanguinidade ou afinidade, 1 día.

e) Por matrimonio de fillos ou pais, 1 día.

f) Cando nalgún dos casos anteriores sexa necesario realizar un desprazamento de máis de 200 km, terase de 1 día máis.

g) Por consulta médica nos servizos sanitarios da Seguridade Social, e sempre que se xustifique a visita, a empresa concederá o tempo necesario para ela.

h) Por asuntos propios, 6 días. No caso particular dos condutores, intentará que o desfrute destes días coincida con aqueles en que exista un condutor de reforzo.

O traballador que desexe desfrutar de permiso retribuído deberá avisar á empresa, cunha antelación mínima de 48 horas, por medio de escrito en que exprese a causa da súa ausencia e a xustificación dela, agás imposibilidade obxectivamente acreditada de efectuar este aviso en tempo e forma.

Cando coincidan as solicitudes de desfrute, de calquera tipo de permiso, de máis dun 10% do cadro de persoal do centro de traballo, a empresa e a representación legal dos traballadores abordarán as condicións adecuadas para permitir o desfrute do permiso polo maior número de traballadores.

Artigo 15º.-Excedencias.

a) A excedencia poderá ser voluntaria ou forzosa. A forzosa, que dará dereito á conservación do posto, concederase para a designación ou elección para un cargo público que imposibilite a asistencia ao traballo. O reingreso deberá ser solicitado dentro do mes seguinte ao cesamento como cargo público.

b) O traballador, con polo menos unha antigüidade na empresa dun ano, ten dereito a que se lle recoñeza a posibilidade de situarse en excedencia voluntaria por un prazo non menor de dous anos e non maior de cinco. Este dereito só poderá ser exercido outra vez polo mesmo traballador se transcorreron catro anos desde o final da anterior excedencia.

c) Os traballadores terán dereito a un período de excedencia, non superior a tres anos, para atender ao coidado de cada fillo, contando desde a data do nacemento deste. A excedencia para a nai empezará a contar tras a décimo sexta semana de baixa por maternidade, sempre que lle notifique á empresa a súa intención de situarse en situación de excedencia con polo menos un mes de antelación ao vencemento do período de baixa.

Os sucesivos fillos darán dereito a un novo período de excedencia, que se é o caso poñerá fin ao que se viñese desfrutando. Cando o pai e a nai traballen, só un deles poderá exercitar este dereito. Todo isto exercitarase de acordo co disposto na Lei 39/1999, do 5 de novembro, para promover a conciliación da vida laboral e familiar das persoas traballadoras.

d) Así mesmo, poderán solicitar o seu paso á situación de excedencia na empresa os traballadores que exerzan as súas funcións sindicais de ámbito provincial ou superior mentres dure o exercicio do seu cargo representativo.

e) O traballador en excedencia voluntaria conservará un dereito preferente de reingreso na empresa en vacantes de igual ou similar categoría á súa que houbese ou se producisen. Deberá avisar á empresa por escrito con polo menos dous meses de antelación á data de reincorporación a ela por conclusión do período de excedencia, perdendo o seu dereito en caso de non facelo en tempo e forma.

Artigo 16º.-Subrogación empresarial.

Cando unha empresa perda a adxudicación da concesión do servizo municipal de inmobilización, retirada da vía pública, traslado e depósito de vehículos, calquera que sexa a causa, a nova empresa concesionaria estará obrigada a subrogarse nos contratos de todos os traballadores que nese momento estivesen destinados pola empresa saínte á realización do dito servizo, nas condicións que establece o artigo 44 do Estatuto dos traballadores, independentemente da modalidade dos contratos de traballo e aínda que non haxa transmisión patrimonial ningunha entre ambas as dúas empresas.

Os traballadores afectados, calquera que sexa o ámbito territorial da nova empresa concesionaria, quedan obrigatoriamente adscritos ao servizo municipal de inmobilización, retirada da vía pública, traslado e depósito de vehículos nos que viñan prestando o seu traballo.

En caso de que por motivos extraordinarios a empresa adxudicataria perdera a concesión e se procedera a facer unha adxudicación provisional, a empresa que asumira esa adxudicación provisional subrogarase nos mesmos termos ata que se proceda á adxudicación definitiva, a partir da cal os traballadores afectados pasarán a formar parte da empresa adxudicataria definitiva.

No caso de que o cliente rescinda o contrato concertado cunha empresa para realizar o servizo de inmobilización, retirada da vía pública, traslado e depósito de vehículos co seu propio persoal, e posteriormente contrate con outra empresa o mencionado servizo, a nova empresa concesionaria incorporará ao seu cadro aquel persoal afectado da primeira empresa, sempre que non transcorrese máis dun ano desde a nova contratación.

Estas mesmas condicións se aplicarán en caso de que sexa unha Administración pública a que asuma o servizo, e independentemente da natureza xurídica da empresa que se constitúa en nova concesionaria do servizo.

A empresa saínte, con polo menos 48 horas de antelación ao inicio do servizo, fará entrega á entrante da seguinte documentación, baixo a obriga de confidencialidade sobre a información á que ten acceso:

a) Certificado do organismo competente de estar ao día de pago á Seguridade Social, ou no seu defecto xustificante acreditativo de telo solicitado.

b) Fotocopia das seis últimas nóminas mensuais do persoal afectado.

c) Fotocopia dos boletíns de cotización á Seguridade Social correspondente aos seis últimos meses.

d) Relación do persoal afectado contendo as seguintes especificacións:

1. Nome e dous apelidos.

2. Número do NIF.

3. Domicilio do traballador.

4. Antigüidade na empresa.

5. Modalidade de contrato e fotocopias deles.

6. Se posúe a condición de representante dos traballadores e data do seu nomeamento.

8. Número de afiliación á Seguridade Social.

9. Estado civil e número de fillos ao seu cargo.

10. Calendario de vacacións especificado por traballadores e referente ao ano.

Con carácter previo á adxudicación da concesión, a empresa saínte poñerá á disposición da representación legal dos traballadores na empresa, a documentación que referente ao cadro de persoal, vai ser entregada a quen resulte ser a nova concesionaria.

Nos contratos que subscriban as empresas cos seus clientes, constará unha cláusula que recorde a vixencia deste artigo do convenio colectivo para as empresas concesionarias de servizos municipais de inmobilización, retirada, traslado e depósito de vehículos da vía pública da provincia de Ourense.

Capítulo III

Clasificación profesional

Artigo 17º.-Clasificación profesional.

A clasificación dos traballadores incluídos dentro do ámbito de aplicación deste convenio ten un carácter simplemente enunciativo, sen que as empresas estean obrigadas a establecer na súa estrutura organizativa todos e cada un dos grupos e categorías profesionais.

Non obstante, desde o mesmo momento en que exista na empresa un traballador que realice as funcións correspondentes a unha determinada categoría profesional, deberá de ser retribuído con relación ao que a ela lle corresponda dentro da empresa.

Artigo 18º.-Grupos e categorías profesionais.

O persoal que presta os seus servizos nalgunha das actividades ás que se refire este convenio atoparase comprendido dentro dalgún dos grupos xenéricos e categorías seguintes en razón das funcións que desempeña:

Grupos	Categorías

Grupo I	Xefe de servizo Técnico
Grupo II	Condutor-mecánico Condutor Mecánico Oficial administrativo
Grupo III	Auxiliar mecánico Condutor de segunda
Grupo IV	Recepcionista-vixilante de depósito Auxiliar administrativo Axudante de guindastre
Grupo V	Operario de limpeza Peón de servizos múltiples

Grupo I. Están encadrados dentro deste grupo aqueles traballadores que cun alto grao de autonomía, a partir das normas ditadas pola dirección ou polos seus superiores xerárquicos, exerce funcións de carácter técnico e/ou de mando, planificación, organización e coordinación das diversas actividades propias da empresa. Non se inclúe a quen polas características do seu contrato e/ou do desempeño do seu cometido, corresponda a cualificación de persoal de alta dirección.

Grupo II. Están comprendidos neste grupo aqueles traballadores que desenvolvan unha actividade baixo as instrucións xerais dun superior e con certo grao de autonomía, podendo, se é o caso, coordinar o traballo dun equipo. A actividade que desempeñan require unha pericia ou habilidade sistemática en tarefas e/ou procesos técnicos, estean ou non sistematizados.

Grupo III. Están comprendidos neste grupo aqueles traballadores que desenvolven unha actividade baixo as instrucións xerais dun superior e con certo grao de autonomía. Os traballadores encadrados neste grupo carecen da formación ou titulación necesaria para realizar as tarefas descritas no grupo II.

Grupo IV. Dentro deste grupo inclúense todos os traballadores que, baixo as especificacións precisas dun superior, realizan traballos para os que se require iniciativa e razoamento, podendo ser axudados na execución deles por outros traballadores.

Grupo V. Están encadrados dentro deste grupo aqueles traballadores que realizan tarefas que se executan seguindo instrucións concretas claramente establecidas, cun alto grao de dependencia, tarefas que requiren preferentemente esforzo físico e/ou atención, e que normalmente non necesitan de formación específica.

Artigo 19º.-Polivalencia e plena ocupación.

A mobilidade funcional no seo da empresa non terá outras limitacións cás exixidas polas titulacións académicas ou profesionais precisas para exercer a prestación laboral e pola pertenza ao grupo profesional. A falta de definición de grupos profesionais, a mobilidade funcional poderá efectuarse entre categorías profesionais equivalentes.

Artigo 20º.-Cobertura de novos postos e vacantes.

As vacantes, agás amortización do posto de traballo, e os novos postos que se orixinen na empresa, cubriranse preferentemente con traballadores que estivesen no cadro de persoal e realizasen estas funcións; ou con aqueles que presten os seus servizos na empresa e estean interesados en ocupar a dita vacante, aínda que iso implique traballar noutro centro de traballo da propia empresa.

Se o traballador que pasa a ocupar a vacante, tras un período de 3 meses non se adaptase ao seu novo posto de traballo, volverá a realizar a súa anterior ocupación, debendo a empresa suplir a vacante con base nos criterios indicados.

O traballador que, como consecuencia da mobilidade funcional, realice funcións superiores ás do grupo profesional ou ás de categorías equivalentes, por un período superior a seis meses durante un ano ou a oito durante dos anos, terá dereito a que se lle recoñeza a categoría profesional correspondente ás funcións efectivamente desenvolvidas durante ese período de tempo.

Artigo 21º.-Promoción e formación profesional.

Os traballadores terán dereito ao desfrute dos permisos necesarios para concorrer a exames, logo de aviso á empresa cunha antelación de 48 horas, de modo que esta poida adaptar a súa organización ás necesidades do servizo. Estes permisos serán retribuídos, non excedendo un máximo de 8 días naturais ao ano.

Os traballadores que realicen estudos en centros oficiais para a obtención dun título académico ou profesional terán dereito á adaptación da xornada ordinaria de traballo ou preferencia para elixir quenda adecuada á eles, sempre que as necesidades do servizo o permitan.

Capítulo IV

Condicións económicas

Artigo 22º.-Salarios.

Os salarios para os traballadores incluídos dentro do ámbito de aplicación deste convenio serán os que se establezan para cada categoría nas táboas salariais recollidas no anexo.

Establécense dúas táboas salariais diferenciadas en función de que o concello co que a empresa contrate a prestación do servizo de inmobilización, retirada da vía pública, traslado e depósito de vehículos teña máis ou menos de 80.000 habitantes, posto que as circunstancias técnicas e condicións económicas que a concesión do servizo presenta son distintas.

No primeiro ano de vixencia do convenio, o incremento será o IPC real de 2004+1, é dicir o 4,2% para aqueles traballadores que presten os seus servizos en municipios de máis de 80.000 habitantes, A respecto dos municipios con menos de 80.000 habitantes o incremento salarial será igual ao IPC real do ano anterior, é dicir, 3,2%. A respecto do incremento para

o segundo e terceiro ano de vixencia, publicado o IPC, reunirase a comisión paritaria para pactar os incrementos que hai que aplicar ese ano.

Artigo 23º.-Pagas extraordinarias.

Os traballadores incluídos no ámbito de aplicación deste convenio desfrutarán anualmente de dúas pagas extraordinarias, que se denominarán paga de verán e paga de Nadal, e que estarán integradas por 30 días de salario base. Estas pagas faranse efectivas, unha durante os primeiros quince días do mes de xullo, e a outra, durante os primeiros quince días do mes de decembro.

Xunto con cada unha destas pagas, en concepto de bolsa de vacacións, as empresas aboaranlles aos seus traballadores a cantidade de 156,56 euros nos municipios de máis de 80.000 habitantes e 150,25 euros nos municipios de menos de 80.000 habitantes, non actualizable en anos sucesivos, que será igual para todas as categorías.

A empresa poderá ratear o importe das gratificacións extraordinarias ao longo dos meses do ano. Nos casos de nova incorporación, reingreso ou cesamento, a contía das pagas extraordinarias calcularase en proporción ao tempo traballado durante o ano.

Artigo 24º.-Antigüidade.

A partir do momento da entrada en vigor deste convenio non se xerarán dereitos por este concepto. Os traballadores que nese momento estivesen percibindo algunha cantidade en concepto de antigüidade, conservarana conxelada para anos sucesivos, como complemento de antigüidade consolidado (CAC), que se fará figurar en columna á parte na nómina.

Artigo 25º.-Complemento de produtividade.

Cada traballador, independentemente da categoría á que pertenza, percibirá a cantidade de 22,71 euros en concepto de complemento por produtividade, sendo 22,05 euros nos municipios de menos de 80.000 habitantes.

Artigo 26º.-Paga de compensación social.

A empresa aboará unha paga de compensación social, que se devengará por anos naturais e se aboará no mes de marzo do seguinte ano. Se o traballador non permanecese na empresa todo o ano, percibirá a parte proporcional. A súa contía será de 570,90 euros, e en municipios de menos de 80.000 habitantes 540,91 euros.

Artigo 27º.-Incentivo.

Os traballadores percibirán mensualmente, en concepto de incentivo ao traballo, as seguintes cantidades, segundo o grupo en que se encadre o traballador:

Municipios	Grupo I	Grupo II	Grupo III	Grupo IV	Grupo V

+80.000 habit.	212,94 A	160,02 A	140,00 A	107,09 A	54,49 A
-80.000 habit.	204,07 A	153,82 A	130,20 A	102,94 A	52,36 A

Artigo 28º.-As empresas aboarán mensualmente como complemento de actividade o seguinte complemento salarial:

Municipios	Grupo I	Grupo II	Grupo III	Grupo IV	Grupo V

+80.000 habit.	143,76 A	85,34 A	70,00 A	28,13 A	6,24 A
-80.000 habit.	138,19 A	82,03 A	65,10 A	27,06 A	6,01 A

Artigo 29º.-Complemento de nocturnidade.

Os traballadores que presten os seus servizos entre as dez da noite e as seis da mañá do día seguinte, percibirán un complemento de 9 euros por día traballado neste horario.

Artigo 30º.-Complemento de festivos e domingos.

Os traballadores que realicen o seu traballo en domingos e festivos cobrarán 12,52 nos municipios de máis de 80.000 habitantes e 12,40 nos municipios de menos de 80.000 habitantes.

Artigo 31º.-Quebranto de moeda.

Como compensación para resarcir ao traballador dos desaxustes de saldo derivados do manexo miúdo e abundante de numerario, as empresas aboarán mensualmente polo quebranto de moeda a cantidade seguinte:

Municipios	Grupo I	Grupo II	Grupo III	Grupo IV	Grupo V

+80.000 habit.	32,30 A	44,81 A	44,81 A	59,39 A	68,77 A
-80.000 habit.	31,99 A	44,37 A	50,10 A	58,82 A	62,11 A

Artigo 32º.-Complemento de transporte.

Establécese un complemento de transporte para todos os traballadores incluídos dentro do ámbito de aplicación deste convenio, segundo as cantidades que se detallan na táboa salarial.

Artigo 33º.-Cláusula de desvinculación.

O réxime salarial contido neste convenio non será de aplicación para aquelas empresas que acrediten descensos, en termos reais, da facturación ou dos resultados dos tres últimos exercicios.

Trasladaráselles ás partes a decisión da aplicación da cláusula de desvinculación, valorando a situación a través do estudo da documentación acreditativa que faga fe que xustifique un tratamento salarial diferenciado, documentación que poderá comprender o balance, a conta de perdas e ganancias e a memoria dos correspondentes exercicios.

Os traballadores e os seus representantes legais estarán obrigados a tratar e manter a maior reserva e confidencialidade sobre as informacións recibidas e sobre os datos aos que tiveran acceso como consecuencia do establecido nos parágrafos anteriores.

Capítulo V

Prestacións non salariais

Artigo 34º.-Incapacidade temporal.

As empresas aboaranlles aos traballadores que estean en situación de incapacidade temporal derivada de accidente de traballo ou enfermidade laboral e aos traballadores que estean hospitalizados en todo caso, un complemento das prestacións a cargo da Seguridade Social ata o 100% do salario real que estivesen percibindo, ata un máximo de 100 días, período que empezará a computarse desde que finalice a hospitalización.

Igualmente, durante as dúas primeiras baixas do ano e logo de recoñecemento do facultativo que a empresa designe, aqueles traballadores que estean en situación de incapacidade temporal derivada de baixa por enfermidade común ou accidente non laboral percibirán o complemento ata o 100% do salario real que estivesen percibindo, sempre e cando o traballador non estivera en situación de IT máis de 90 días nese ano. A partir da terceira baixa, a empresa unicamente aboará esta compensación despois do décimo primeiro día de incapacidade temporal.

Artigo 35º.-Seguro colectivo.

As empresas deberán concertar coa entidade aseguradora da súa elección unha póliza a favor de todos os traballadores do seu cadro de persoal, en virtude da cal se lles garantan as seguintes indemnizacións:

-Por accidente laboral ou común con resultado de incapacidade permanente absoluta ou gran invalidez 24.040,48 euros.

-Por accidente laboral ou común con resultado de morte, 30.050,61 euros.

No suposto de que a compañía aseguradora non aceptase incluír a algún dos traballadores, a empresa comunicarallo ao interesado e á representación legal dos traballadores, e aboaralle a aquel unha cantidade igual ao importe da correspondente prima anual.

A empresa terá á disposición dos representantes dos traballadores copia das pólizas do seguro.

As pólizas deberanse actualizar no prazo máximo dun mes desde a sinatura deste convenio, aplicándose o mesmo período cando se contrate un novo traballador. A contía destas indemnizacións non terá carácter retroactivo, xerándose unicamente o dereito ao seu cobramento desde a sinatura do convenio.

Artigo 36º.-Indemnizacións por falecemento.

En caso de falecemento dun traballador, a empresa aboaralles aos seus herdeiros legais, unha cantidade equivalente a tres mensualidades de salario base.

Así mesmo, a empresa aboaralles aos herdeiros, en concepto de loito, unha cantidade única de 300 euros.

As empresas incluídas dentro do ámbito de aplicación deste convenio poderán cumprir estas obrigas exteriorizándoas a través dun contrato de seguro ou ben segundo calquera das demais formas descritas na lexislación vixente.

Artigo 37º.-Xubilación anticipada.

Os traballadores poderán xubilarse á idade de 64 anos sempre que reúnan os requisitos xerais para causar dereito á pensión por xubilación, sen aplicación de coeficiente redutor e cos beneficios que terían de ter cumpridos os 65 anos. Para tal efecto, e conforme o previsto no Real decreto 1194/1985, as empresas obríganse á súa substitución simultánea por un traballador desempregado inscrito na oficina de emprego.

Os traballadores que se xubilen anticipadamente na empresa terán dereito a vacacións retribuídas, de acordo coa seguinte escala. O desfrute destas vacacións farase efectivo coa correspondente antelación ao seu cesamento efectivo, debendo comunicar o traballador de forma fidedigna á empresa a súa decisión. A empresa faralle entrega ao traballador que solicite o premio de vacacións un certificado acreditativo do seu desfrute, no que constará o número de meses a que ten dereito:

-Aos 60 anos: 5 meses de vacacións.

-Aos 61 anos: 4 meses de vacacións.

-Aos 62 anos: 3 meses de vacacións.

-Aos 63 anos: 2 meses de vacacións.

-Aos 64 anos: 1 mes de vacacións.

Os traballadores contratados con posterioridade á entrada en vigor deste convenio deberán permanecer un mínimo de 15 anos ininterrompidos na empresa para poder desfrutar desta compensación.

Artigo 38º.-Asistencia xurídica.

As empresas afectadas por este convenio asumirán a asistencia legal daqueles traballadores que, en calidade de parte, se vexan incursos en procesos xudiciais instruídos con ocasión de actuacións realizadas no cumprimento das funcións encomendadas pola empresa, sempre que o traballador non incorrese nun comportamento doloso, culposo ou neglixente.

Capítulo VI

Seguridade e hixiene no traballo

Artigo 39º.-Normas xerais.

Observaranse as normas sobre seguridade e hixiene no traballo contidas na Lei 31/1995, do 8 de novembro, de prevención de riscos laborais, e demais disposicións de desenvolvemento que a complementen, así como as que puideran promulgarse en substitución delas.

Artigo 40º.-Recoñecementos.

Todas as empresas incluídas no ámbito de aplicación deste convenio estarán obrigadas a efectuar unha revisión médica anual a todos os seus traballadores dentro da xornada laboral.

Artigo 41º.-Roupa de traballo.

As empresas adoptarán as medidas necesarias para que os equipos de traballo sexan adecuados para o traballo que deba realizarse e convenientemente adaptados para tal efecto, de modo que garantan a seguridade e saúde dos traballadores ao utilizalos.

As empresas facilitaranlles aos seus traballadores como roupa de traballo as seguintes pezas:

-Unha peza para a auga.

-Un xersei de inverno.

-Dúas camisas ou polos de manga longa para o inverno.

-Un chaleco con reflector para o inverno.

-Unha peza de abrigo para os recepcionistas. (Entregarase cada tres anos a partir de 2006).

-Dous pantalóns de entretempo, con reflectores.

-Un par de botas con protección para o inverno.

-Dous polos de manga curta para o verán.

-Un chaleco con reflector para o verán.

-Un par de zapatos con protección para o verán.

-Guantes e guantes de auga segundo as necesidades.

-Protección lumbar e chaqueta facendo xogo cos pantalóns en inverno para os condutores.

As roupas e calzado de traballo serán renovables cada ano excepto a peza de auga e os chalecos, que serán renovables cada dous anos.

Serán por conta da empresa as modificacións na roupa de traballo impostas por necesidades físicas do traballador, tras prescrición facultativa.

Artigo 42º.-Protección do embarazo.

A traballadora xestante terá dereito a ocupar durante o seu embarazo, sempre que sexa posible, un posto de traballo e/ou unha quenda distinta á súa, con garantía do seu soldo e os seus dereitos, se a prescrición do facultativo que atenda o embarazo así o aconsellase. Finalizada a causa que motivou o cambio, procederase á reincorporación ao seu destino orixinal. Todo isto de acordo co disposto para os riscos durante o embarazo pola Lei 39/1999, do 5 de novembro, para a conciliación da vida profesional e familiar das persoas traballadoras.

A traballadora embarazada terá dereito a ausentarse do traballo, con dereito a remuneración, para a realización de exames prenatais e técnicas de preparación ao parto, logo de aviso ao empresario e xustificación de que é imposible a súa realización fóra da xornada de traballo. Así mesmo, terá un dereito preferente na elección da data das vacacións que lle correspondan.

Capítulo VII

Dereitos sindicais

Artigo 43º.-Competencias da representación legal dos traballadores.

Os representantes dos traballadores, delegados de persoal ou membros do comité de empresa, terán as competencias de información, participación, vixilancia e control, recoñecidas no artigo 64 do vixente Estatuto dos traballadores.

Artigo 44º.-Garantías dos representantes legais dos traballadores.

Os representantes dos traballadores verán garantidas as súas actuacións nos termos previstos no arti

go 68 do Real decreto lexislativo 1/1995, polo que se aproba o texto refundido da Lei do Estatuto dos traballadores.

Artigo 45º.-Modificación substancial das condicións de traballo.

A modificación substancial das condicións de traballo recoñecidas en virtude deste convenio será consultada pola empresa coa representación legal dos traballadores. A empresa non terá esta obriga cando se trate da modificación substancial de condicións de traballo recoñecidas a un traballador a título individual, ou cando se trate de modificacións substanciais das condicións funcionais e de horario de traballo recoñecidas en virtude do convenio, sempre que nun período de noventa días afecten a un número de traballadores inferiores a: 10 traballadores nas empresas que ocupen menos de 100 traballadores, o 10% de traballadores nas empresas que ocupen entre 100 e 300 traballadores, 30 traballadores en empresas con 300 ou máis traballadores.

Capítulo VIII

Réxime disciplinario

Artigo 46º.-Principios de ordenación.

Estas normas de réxime disciplinario perseguen o mantemento da disciplina laboral, que é un aspecto fundamental para a normal convivencia, ordenación técnica e organización da empresa, así como a garantía e defensa dos dereitos e intereses lexítimos de traballadores e empresarios.

As faltas, sempre que sexan constitutivas de incumprimentos contractuais e culpa do traballador, poderán ser sancionadas pola dirección da empresa de acordo coa graduación que se establece neste capítulo.

Toda falta cometida polos traballadores clasificarase en leve, grave ou moi grave.

As faltas, sexa cal sexa a súa cualificación, requirirán comunicación escrita e motivada da empresa ao traballador, e a imposición de sancións por estas faltas seralles notificada aos representantes legais dos traballadores, se os houbese.

Artigo 47º.-Faltas leves.

Consideraranse como faltas leves as seguintes:

a) Dúas faltas de puntualidade, sen xustificación, no período dun mes.

b) O incumprimento dos horarios de chegada ou saída do traballo.

c) Efectuar un cambio de quenda, de servizo, día de traballo ou día de descanso, sen previa autorización expresa da empresa.

d) A falta de notificación con carácter previo da razón da ausencia ao traballo, a non ser que se probe a imposibilidade de facelo.

e) O abandono do servizo sen causa xustificada, aínda por un espazo breve de tempo. Se como consecuencia disto se lle ocasionase prexuízo á empresa aínda que fose mínimo, ou se o dito abandono fora causa de accidente dos compañeiros de traballo, esta falta poderá ser considerada como grave ou moi grave segundo a entidade do dano causado.

f) Os descoidos na conservación do material que se tivera a cargo ou do que se fora responsable que produzan deterioracións leves a este.

g) A falta dalgún dos utensilios accesorios para desenvolver o cometido asignado, así como a utilización de utensilios que non sexan os asignados polo encargado do servizo.

h) A falta de aseo ou limpeza persoal.

i) Non atender o público coa corrección e dilixencia debida, cando non prexudique a imaxe da empresa.

j) Discutir violentamente cos compañeiros dentro da xornada de traballo.

k) A falta de comunicación á empresa dos cambios de residencia ou domicilio.

l) O uso de pezas de roupa distintas ás que compoñen o uniforme ou non levar uniforme regulamentario na súa totalidade estando de servizo.

m) Non usar a roupa con reflectores nas quendas necesarias.

n) Non atender as chamadas que se produzan pola emisora.

o) Non cubrir os partes de servizo correctamente, omitindo datos. A omisión dalgún dano en vehículo propio ou alleo será considerada como falta grave ou moi grave.

p) Non cubrir o parte de servizo ao terminar a quenda ou deixalo fóra da carpeta correspondente.

q) Introducir dentro do depósito vehículos alleos á empresa e ao servizo. Neste caso cometerá falta o que introduza o vehículo e o recepcionista-vixilante do depósito que o autorice.

r) Non usar o tacógrafo nos casos indicados, ou facer un deliberado mal uso del.

s) Manter os vehículos guindastre acendidos dentro do depósito sen necesidade.

t) Non encher combustible segundo directrices de traballo.

u) Non revisar o material e os niveis do vehículo-guindastre antes de cada quenda.

v) Non realizar as tarefas de limpeza (externa-interna) e comprobación de niveis, segundo directrices de traballo.

w) Saír co guindastre fóra do depósito se non é por necesidade do servizo.

x) A condución de vehículos da empresa fóra da xornada de traballo, e o transporte do persoal fóra de servizo ou de persoas alleas a el.

y) Permanecer no recinto do depósito fóra da quenda de servizo.

Artigo 48º.-Faltas graves.

Consideraranse como faltas graves:

a) Máis de dúas faltas inxustificadas de puntualidade na entrada ou saída do traballo cometidas nun período de trinta días.

b) A inasistencia por un día ao traballo, nun período de trinta días, sen causa que o xustifique.

c) Non comunicar coa puntualidade debida os cambios experimentados na situación familiar que poidan afectar á correspondente retención fiscal ou á Seguridade Social. Falsear ou subministrar estes datos incorrectamente considerarase como falta moi grave.

d) Entregarse a xogos durante a xornada de traballo, se perturbasen o servizo.

e) A desobediencia aos superiores en calquera materia de traballo, incluída a resistencia e/ou obstrución a novos métodos de racionalización do traballo. Se implicase quebranto manifesto da disciplina ou dela se derivase prexuízo notorio para a empresa, poderá ser considerada como falta moi grave.

f) Encubrir a ausencia ao traballo dun compañeiro, asinando ou fichando por el.

g) A desidia ou neglixencia no traballo que afecte á boa marcha del.

h) A imprudencia en acto de traballo. Se implicase risco de accidente para o traballador, para os seus compañeiros ou perigo de dano para as instalacións poderá ser considerada como moi grave.

En todo caso, considerarase imprudencia en acto de servizo a falta de utilización da roupa, equipamentos e aparellos de seguridade de carácter obrigatorio.

i) Realizar sen o oportuno permiso traballos particulares durante a xornada, así como o emprego para usos propios ou alleos dos utensilios da empresa.

j) Manipular nas pertenzas dos compañeiros de traballo sen a debida autorización.

k) Causar dano tanto nas pertenzas da empresa, como nos vehículos dos usuarios públicos.

l) A manipulación do equipamento de traballo destinado a evitar o control dos superiores.

m) A entrada en establecementos de hostalaría por motivo e prazo de duración distinto aos seguintes:

-Para tomar café, cun tempo máximo de dez minutos.

-Por necesidades fisiolóxicas, polo tempo imprescindible.

n) Non gardar a discreción debida respecto aos asuntos que se coñezan por razóns de traballo cando isto poida causarlle prexuízos á empresa, ao servizo, aos demais traballadores ou cando se empreguen en proveito propio.

o) A simulación de enfermidade ou accidente.

p) A falta de comunicación á empresa dos desperfectos ou anormalidades observados nos utensilios, ferramentas e vehículos, cando disto se lle derivase un prexuízo grave á empresa.

q) A embriaguez no traballo.

r) Durmir en horas de traballo.

s) A falta de aseo e limpeza persoal cando lle poida afectar ao proceso produtivo ou á prestación do servizo e sempre que, previamente, mediase a oportuna advertencia da empresa.

t) As ofensas de palabras proferidas, ou de obras cometidas, contra as persoas, dentro da xornada laboral, cando revistan gravidade.

u) Non recoller na ficha de cada quenda de traballo as incidencias no horario correspondente, tales como atrasos, abandonos de servizo e saídas antes da hora.

v) Deixar o servizo sen que chegase o substituto.

w) Non cubrir na ficha a hora de saída, en todo caso.

x) Negarse a efectuar a retirada dun vehículo da vía pública, cando sexa ordenado polos axentes da policía local ou outras autoridades con competencia na materia, sen que exista motivo xustificado para isto.

y) A reincidencia na comisión de catro faltas leves, aínda que sexa de distinta natureza dentro do trimestre, e mediando sanción que non sexa a amoestación verbal.

Artigo 49º.-Faltas moi graves.

Consideraranse como faltas moi graves as seguintes:

a) A comisión de máis de cinco faltas non xustificadas de puntualidade, cometidas nun período de seis meses, ou de dez nun ano.

b) As faltas inxustificadas ao traballo durante dous días consecutivos ou tres alternos, nun período dun mes.

c) A fraude, deslealdade ou abuso de confianza nas xestións encomendadas, e o furto ou roubo, tanto aos compañeiros de traballo como á empresa ou a calquera outra persoa dentro das dependencias da empresa, ou durante o traballo en calquera outro lugar.

d) A simulación de enfermidade ou accidente ou a prolongación da baixa por enfermidade ou accidente. Tamén se comprenderá nesta letra toda manipulación feita para prolongar a baixa por accidente ou enfermidade.

e) A habitual falta de aseo e limpeza que produza queixas dos compañeiros de traballo.

f) A embriaguez ou o consumo de substancias tóxicas, estupefacientes ou psicotrópicos durante o servizo ou fóra del, con habitualidade e de forma que afecte o desempeño do seu posto de traballo.

g) Violar o segredo de correspondencias ou documentos reservados da empresa, ou revelarlle terceiros datos dela que sexan de reserva obrigada.

h) Realización de actividades que impliquen competencia desleal á empresa.

i) Os malos tratos de palabra ou obra, abuso de autoridade ou falta grave de respecto e consideración a xefes, compañeiros e subordinados, familiares destes, ou usuarios do servizo.

j) Causar accidentes graves por imprudencia, neglixencia ou dolo.

k) Abandonar o traballo sen previo aviso.

l) A reiterada negativa a utilizar os elementos de protección fronte a posibles riscos en materia de seguridade e hixiene.

m) Diminución non xustificada no rendemento no traballo que supoña inhibición no cumprimento das tarefas asignadas.

n) Non acudir á prestación dun servizo reclamado pola policía local ou autoridade competente dentro do horario de traballo.

o) A reincidencia ou reiteración na comisión de faltas graves, considerando como tal aquela situación na que, con anterioridade ao momento da comisión do feito, o traballador fose sancionado dúas ou máis veces por faltas graves, aínda de distinta natureza, durante o período de seis meses.

Artigo 50º.-Prescrición.

Respecto dos traballadores, as faltas leves prescribirán aos dez días, as graves aos vinte días e as moi graves aos sesenta días, a partir da data en que a empresa tivo coñecemento da súa comisión e, en todo caso, aos seis meses de cometerse.

Artigo 51º.-Sancións.

As sancións máximas que poderán impoñerse pola comisión de faltas enumeradas nos artigos anteriores son as seguintes:

a) Por falta leve, amoestación escrita e suspensión de emprego e soldo de ata dous días.

b) Por falta grave, amoestación escrita, e suspensión de emprego e soldo de dous a vinte días.

c) Por falta moi grave, traslado a centro de traballo de localidade distinta durante un período de ata un ano, suspensión de emprego e soldo de vinte a sesenta días e despedimento disciplinario.

En caso de sancións de trinta ou máis días de suspensión de emprego e soldo, o interesado poderá solicitar o fraccionamento en dous ou tres prazos, cun intervalo entre eles de quince días, para cumprir a sanción.

As anotacións desfavorables que como consecuencia das sancións impostas puideran facerse constar nos expedientes persoais quedarán canceladas ao cumprirse os prazos de un, tres ou cinco anos, segundo se trate de falta leve, grave ou moi grave.

Artigo 52º.-Graduación das sancións.

Á hora da imposición das sancións teranse en conta as seguintes circunstancias:

a) Como circunstancias atenuantes:

-Non ter sido obxecto de sancións, durante os últimos tres meses.

-Non ter tido intención de causar mal, dano o prexuízo.

-Ter tratado por todos os medios de evitar as consecuencias da falta cometida.

-A espontánea confesión da falta.

-A retractación, reconciliación e presentación de explicacións sobre malos tratos fronte a superiores, compañeiros ou usuarios.

b) Como circunstancias agravantes:

-A utilización de armas ou outros utensilios nas agresións ou discusións.

-A reincidencia.

-A premeditación.

Capítulo IX

Disposicións varias

Artigo 53º.-Retirada do carné de conducir.

Todo condutor ao que, por causa dalgunha diminución física, lle fose denegada a renovación do carné de conducir, pasará a prestar servizos noutra categoría, sempre que existan vacantes dispoñibles na empresa. O seu salario será determinado pola categoría e posto de traballo que lle sexan asignados na súa nova situación.

Todo condutor ao que lle fose retirado o permiso de conducir como consecuencia de levar un vehículo da empresa por orde e conta dela, seguirá percibindo o salario que tivera asignado na súa categoría no momento da retirada do carné de conducir, e poderá ser asignado á realización doutro tipo de servizos en tanto non poida volver a conducir. Non obstante, o anteriormente exposto, non será de aplicación nos casos nos que medie un comportamento imprudente ou embriaguez.

Cando ao condutor lle fose retirada a licenza para conducir como consecuencia dunha infracción de tráfico cometida fóra do horario laboral poderá optar

entre, ou computar o período que dure a suspensión do permiso de conducir como vacacións, ou solicitar excedencia voluntaria non retribuída con reserva de posto de traballo.

Artigo 54º.-Partes asinantes.

Este convenio foi concertado pola Confederación de Empresarios de Ourense (CEO) e pola Central Sindical Unión Sindical Obrera (USO).

Artigo 55º.-Submisión ao AGA.

As partes asinantes deste convenio acordan durante a súa vixencia someterse ás disposicións contidas no Acordo interprofesional galego sobre procedementos extraxudiciais de solución de conflitos colectivos de traballo (AGA) nos propios termos nos que está formulado, para resolver de modo pacífico os conflitos laborais que poidan xurdir da aplicación deste convenio.

Artigo 56º.-Dereito supletorio.

Para o non previsto neste convenio as partes remítense ao disposto no Real decreto lexislativo 1/1995, polo que se aproba o texto refundido da Lei do Estatuto dos traballadores.

ANEXO

Táboas salariais

Táboa salarial para o servizo en municipios de máis de 80.000 ou máis habitantes

Grupo	Salario base	Complemento product.	Incentivo	Complemento actividade	Quebranto moeda	Complemento transporte	Salario anual

Grupo I Xefe de servizo Técnico	739,71	22,71	212,94	143,76	32,30	84,77	17.347,96
Grupo II Condutor-mecánico Condutor Mecánico Oficial administrativo	701,09	22,71	160,02	85,34	44,81	96,01	15.756,20
Grupo III Aux. administrativo condutor de segunda	680	22,71	140	70	44,81	96,01	15.036,62
Grupo IV Recepcionista-vixilante de depósito Auxiliar administrativo Axudante de guindastre	662,41	22,71	107,09	28,13	59,39	98,40	14.096,64
Grupo V Operario de limpeza Peón de servizos múltiples	620,51	22,71	54,49	6,24	68,77	104,79	12.805,40

Táboa salarial para o servizo en municipios de menos de 80.000 habitantes

Grupo	Salario base	Complemento product.	Incentivo	Complemento actividade	Quebranto moeda	Complemento transporte	Salario anual

Grupo I Xefe de servizo Técnico	581,9	22,05	204,7	138,19	31,99	81,48	14.877,85
Grupo II Condutor-mecánico Condutor Mecánico Oficial administrativo	559,87	22,05	153,82	82,03	44,37	93,02	13.571,99

Grupo	Salario base	Complemento product.	Incentivo	Complemento actividade	Quebranto moeda	Complemento transporte	Salario anual

Grupo III Aux. administrativo condutor de segunda	540,20	22,05	130,20	65,10	50,10	93,02	12.729,85
Grupo IV Recepcionista-vixilante de depósito Auxiliar administrativo Axudante de guindastre	527,36	22,05	102,94	27,06	58,82	94,55	12.038,29
Grupo V Operario de limpeza Peón de servizos múltiples	509,17	22,05	52,36	6,01	68,11	100,74	11.109,83

O salario anual compóñeno ademais dos conceptos económicos indicados, que son de cobro mensual, dúas pagas extras, dúas bolsas de vacacións e a paga de compensación.