Ante a convocatoria de folga presentada na empresa Luber, S.L., que terá lugar entre as 00.00 horas e as 24.00 horas dos días: 21, 22, 23, 27, 28, 29 e 30 de setembro e, de xeito indefinido, desde as 00.00 horas do 3 de outubro do ano 2005, procede que, de conformidade co establecido no artigo 3 do Decreto 155/1988, do 9 de xuño, esta consellería determine os servizos mínimos que permitan, en consonancia co establecido no artigo 28.2º da nosa Constitución, compaxinar o exercicio lexítimo do dereito á folga dos traballadores co mantemento dos servizos esenciais á comunidade.
A empresa Luber, S.L. vén prestando na provincia da Coruña dezaoito servizos de transporte público regular de uso especial -escolar-, contratados pola Consellería de Educación e Ordenación Universitaria.
Vista a xustificación achegada pola Consellería de Educación e Ordenación Universitaria referente á imposibilidade de agrupación de liñas que reduzan o número de expedicións contratadas, polo seu carácter de servizos esencialmente rurais, e a ausencia de servizos de transporte regular de uso xeral alternativos, resulta preciso garantir o acceso ao sistema educativo dos alumnos afectados pola presente convocatoria de folga, polo que, con base no establecido no Decreto 61/1985, do 18 de abril,
DISPOÑO:
Artigo 1º
Os servizos mínimos que deberán manterse durante a folga convocada na empresa Luber, S.L. serán os seguintes:
Servizos regulares de uso especial para transporte de escolares e estudantes.
Deberanse manter os servizos de escolares e estudantes nas expedicións normalmente establecidas de luns a venres lectivos.
Artigo 2º
O incumprimento da obriga de atender os servizos mínimos fixados nesta orde será sancionado de conformidade coa lexislación vixente.
Artigo 3º
O disposto na presente orde non suporá ningunha limitación dos dereitos que a normativa reguladora do dereito de folga lles recoñece aos traballadores.
Disposición derradeira
A presente orde entrará en vigor o mesmo día da súa publicación no Diario Oficial de Galicia.
Santiago de Compostela, 19 de setembro de 2005.
María José Caride Estévez
Conselleira de Política Territorial,
Obras Públicas e Transportes