A actividade administrativa da consellería de Presidencia, Administracións Públicas e Xustiza leva consigo unha concentración de funcións ao redor do seu titular que aconsella, dado o seu volume, recorrer á delegación de competencias na Dirección Xeral de Administración Local, sen esquecer o debido respecto aos principios que informan a actividade administrativa e que a nosa Constitución recolle no seu artigo 103.1º.
A delegación de competencias permite a axilización administrativa necesaria que redunda en beneficio tanto da Administración como dos administrados, dentro do máis rigoroso respecto das garantías xurídicas que a tutela dos intereses públicos exixe.
Na súa virtude, facendo uso das facultades que me confire o artigo 43.3º da Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro; e o artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, modificado pola Lei 4/1999, do 13 de xaneiro, e demais disposicións de xeral aplicación,
DISPOÑO:
Artigo 1º
Deléganse na Dirección Xeral de Administración Local as competencias atribuídas ao conselleiro de Presidencia, Administracións Públicas e Xustiza polo artigo 13.bis da Lei 4/1988, do 26 de maio, da función pública de Galicia, que a continuación se relacionan:
a) As competencias que lle correspondan ao conselleiro en materia de funcionarios de Administración local con habilitación de carácter nacional.
b) A designación de representantes da Comunidade Autónoma nos tribunais cualificadores de procesos selectivos de persoal para as entidades locais.
Artigo 2º
O exercicio destas competencias delegadas axustarase ao disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, e na Lei 1/1983, do 22 de febreiro, reguladora da Xunta e do seu presidente.
Disposicións derrogatorias
Primeira.-Queda derrogada a Orde do 31 de outubro de 2003, pola que se modifica a do 12 de febreiro
de 2003, de delegación de competencias en órganos centrais e periféricos da Consellería de Xustiza, Interior e Administración Local.
Segunda.-Quedan derrogados os puntos h) e i) do artigo 1 da Orde do 12 de febreiro de 2003 de delegación de competencias en órganos centrais e periféricos da Consellería de Xustiza, Interior e Administración Local.
Terceira.-Quedan derrogadas cantas disposicións de igual ou inferior rango se opoñan ao disposto nesta orde.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 12 de setembro de 2005.
José Luis Méndez Romeu
Conselleiro de Presidencia, Administracións
Públicas e Xustiza