Publicados os decretos 211/2005, do 3 de agosto, polo que se establece a estrutura orgánica da Xunta de Galicia; 231/2005, do 11 de agosto, polo que se establecen os centros directivos dependentes da Xunta de Galicia e 232/2005, do 11 de agosto, polo que se fixa a estrutura orgánica dos departamentos da Xunta de Galicia, faise preciso modificar os estatutos da sociedade Redes de Telecomunicación Galegas Retegal, S.A., para o que, e de conformidade co disposto nos artigos 47 e seguintes da Lei 3/1985, do 12 de abril, de patrimonio da comunidade autónoma e no artigo 111 do Decreto 50/1989, do 9 de marzo, polo que se aproba o regulamento que a desenvolve, por proposta do conselleiro de Economía e Facenda, logo de deliberación do Consello da Xunta de Galicia na súa reunión do día vinte e cinco de agosto de dous mil cinco,
DISPOÑO:
Artigo único.-Modificar os artigos 8 e 16 dos estatutos da sociedade Redes de Telecomunicación Galegas Retegal, S.A., aprobados polo Decreto 58/1997, do 20 de febreiro, que quedan redactados nos seguintes termos:
«Artigo 8º.-Transmisións de accións.
1. As accións son indivisibles.
2. O alleamento de títulos representativos de capital propiedade da Comunidade Autónoma de Galicia requirirá acordo do Consello da Xunta, a iniciativa da Consellería de Presidencia, Administracións Públicas e Xustiza, e por proposta da Consellería de Economía e Facenda, de conformidade, en todo caso, coa Lei 3/1985, do 12 de abril, do patrimonio da Comunidade Autónoma galega e o seu regulamento, aprobado polo Decreto 50/1989, do 9 de marzo.
Artigo 16º.-O Consello de Administración.
1. O Consello de Administración estará integrado por un número de conselleiros que non será inferior a tres nin superior a sete.
2. Será presidente do Consello de Administración o secretario xeral de Comunicación.
3. A elección dos conselleiros que deben compoñer o Consello en cada momento, sempre dentro do mínimo e do máximo a que se refire este artigo, corresponde á Xunta Xeral de Accionistas.
4. O secretario do Consello de Administración será elixido polo Consello, por proposta do presidente, debendo ser licenciado en dereito. En ausencia do mesmo, asumirá as súas funcións o conselleiro de menor idade».
Disposición derradeira
Este decreto entrará en vigor o día seguinte ao da súa publicación no Diario Oficial de Galicia.
Santiago de Compostela, vinte e cinco de agosto de dous mil cinco.
Emilio Pérez Touriño
Presidente
José Ramón Fernández Antonio
Conselleiro de Economía e Facenda