A Lei galega 5/1999, do 21 de maio, de ordenación farmacéutica, modificada pola Lei 4/2005, do 17 de marzo, establece os principios xerais para a ordenación das oficinas de farmacia dada a súa condición de establecementos sanitarios de interese público e a necesidade de lle garantir á poboación da Comunidade Autónoma de Galicia unha atención farmacéutica conveniente, oportuna e eficiente.

O necesario desenvolvemento regulamentario da Lei 5/1999, do 21 de maio, de ordenación farmacéutica de Galicia, no relativo aos requisitos e condicións que permitan poder utilizar a planificación das oficinas de farmacia como medio de aproximar a atención farmacéutica á poboación e aumentar a súa eficiencia, así como dos diferentes procedementos de autorización administrativa previa aos que estarán suxeitas as oficinas de farmacia, motivou a aprobación do Decreto 146/2001, do 7 de xuño, sobre planificación, apertura, traslado, cerramento e transmisión de oficinas de farmacia.

No título I do devandito decreto establécense os criterios de planificación coa finalidade de que esta se axuste ás características demográficas e xeográficas existentes na actualidade nesta comunidade autónoma. Así mesmo, prevense situacións de planificación que posibiliten a apertura de oficinas de farmacia en zonas e casos especiais e/ou excepcionais que así o aconsellen. Neste mesmo título regúlanse as distancias que deberán gardar as oficinas de farmacia entre elas e cos centros sanitarios públicos, xa sexa por razón de nova apertura ou por traslado, fixándose as pautas para levar a cabo a medición das ditas distancias.

No título II desenvólvese o procedemento de autorización e adxudicación de novas oficinas de farmacia, establecéndose os órganos da Consellería de Sanidade que teñen atribuída a competencia nesta materia, así como o réxime xurídico ao que estará suxeito. No devandito procedemento diferéncianse dúas fases, unha primeira de iniciación do procedemento e autorización de apertura e unha segunda de adxudicación de novas oficinas de farmacia.

Dentro da primeira fase, o artigo 17 do Decreto 146/2001, do 7 de xuño, establece que a Consellería de Sanidade poderá iniciar de oficio o procedemento para a autorización de novas oficinas de farmacia de acordo cos criterios de planificación previstos neste decreto e seguindo o establecido nos seus artigos 18 e seguintes.

Así mesmo, esta primeira fase permitirá a actualización do mapa farmacéutico, aprobado polo

Decreto 278/2002, do 12 de setembro, do mapa farmacéutico e delimitación territorial para a autorización de novas oficinas de farmacia conforme a módulos de poboación.

Por todo o antedito, e co obxecto de alcanzar estes fins, no uso das facultades que me confiren o artigo 36.4º e 38 da Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 22 de outubro,

DISPOÑO:

1. Iníciase de oficio o procedemento para a autorización de novas oficinas de farmacia de acordo cos criterios de planificación establecidos no Decreto 146/2001, do 7 de xuño, e segundo o establecido nos seus artigos 18 e seguintes.

2. As zonas farmacéuticas ou entidades colectivas de poboación para as que se inicia de oficio o expediente de autorización de novas oficinas de farmacia son as que figuran no anexo desta orde.

De acordo co previsto no artigo 19 do Decreto 146/2001, do 7 de xuño, a relación á que se refire o parágrafo anterior farase pública nos taboleiros de anuncios da Consellería de Sanidade e nos das súas delegacións provinciais.

3. De conformidade co artigo 20 do Decreto 146/2001, do 7 de xuño, porase de manifesto o expediente aos farmacéuticos titulares dunha oficina de farmacia existente na mesma zona farmacéutica, ao correspondente colexio oficial de farmacéuticos e ao concello no que se situaría cada oficina de farmacia, no caso de ser autorizada, para que nun prazo de quince días aleguen e presenten os documentos que coiden convenientes.

Todo isto sen prexuízo da posibilidade de consulta do expediente nas dependencias da Consellería de Sanidade.

Disposicións derradeiras

Primeira.-Facúltase o secretario xeral da Consellería de Sanidade para adoptar as medidas adecuadas en relación coa execución e desenvolvemento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 13 de xuño de 2005.

José Manuel González Álvarez

Conselleiro de Sanidade

ANEXO