O Estatuto de autonomía de Galicia, no seu artigo 31, establece como competencia plena da Comunidade Autónoma de Galicia a regulación e administración do ensino en toda a súa extensión, niveis e graos, modalidades e especialidades, no ámbito das súas competencias.
O Real decreto 1754/1987, do 18 de decembro (BOE do 19 de xaneiro de 1988 e DOG do 17 de febreiro) transferiulle á Comunidade Autónoma competencias en materia de universidades. Estas competencias foron asumidas pola Comunidade Autónoma e asignadas á Consellería de Educación no Decreto 62/1988, do 17 de marzo (DOG do 8 de abril). A Lei 11/1989, do 20 de xullo (DOG do 16 de agosto), de ordenación do sistema universitario de Galicia, determina a constitución do sistema universitario de Galicia con tres universidades: a Universidade da Coruña, a de Santiago de Compostela e a de Vigo.
A Consellería de Educación e Ordenación Universitaria, a través da Dirección Xeral de Universidades, está a levar adiante unha política de asistencia económica aos estudantes que queda concretada en diversas accións, co obxecto de favorecer, dentro das limitacións orzamentarias, a calidade, a competencia, a igualdade de oportunidades e a excelencia no rendemento académico.
Por todo isto e no exercicio das facultades conferidas polo artigo 34 da Lei 1/1983, do 22 de febreiro, reguladora da Xunta de Galicia e do seu presidente,
DISPOÑO:
Artigo 1º.-Obxecto.
Convócanse premios fin de carreira da Comunidade Autónoma de Galicia para os alumnos das universidades galegas que rematen os seus estudos no ano 2005.
O obxecto desta acción é facer un recoñecemento expreso da excelencia académica daqueles estudantes matriculados no curso académico 2004/2005 en calquera dos centros pertencentes a algunha das tres universidades galegas.
Artigo 2º.-Orzamento.
A Consellería de Educación e Ordenación Universitaria financiará estas axudas con cargo á partida orzamentaria 07.05.322C.480.2 dos orzamentos xerais da Comunidade Autónoma de Galicia para o ano 2005, cunha contía máxima de 120.200 euros sen prexuízo de poder ser incrementadas de acordo coas dispoñibilidades económicas da consellería.
Artigo 3º.-Contía.
Concederáselle un premio por cada unha das titulacións distintas impartidas no Sistema Universitario de Galicia ao alumno con mellor expediente académico.
Os solicitantes que sexan premiados recibirán:
-Un diploma acreditativo desta distinción.
-Unha contribución en metálico de 2.404 euros.
Artigo 4º.-Período.
As actividades que se subvencionan nesta convocatoria serán realizadas durante o curso académico 2004/2005.
Artigo 5º.-Requisitos.
Poderán solicitar estas axudas os alumnos que cumpran os seguintes requisitos:
-Posuíren a nacionalidade española ou ser nacional dun dos Estados membros da Unión Europea.
-Teren unha puntuación media no seu expediente académico igual ou superior a 2,7 puntos, para alumnos das áreas de ciencias experimentais e da saúde, ciencias sociais e xurídicas e humanidades; e 2 puntos, para alumnos da área de ensinanzas técnicas.
-Teren rematada a carreira no curso 2004/2005.
-Naquelas titulacións para as que sexa necesario realizar o proxecto fin de carreira, será imprescindible que figure na certificación académica a data de avaliación do proxecto e o curso académico en que foi superado.
-En ningún caso un 1º ciclo común poderá servir de base para a concesión de máis dun premio fin de carreira.
Artigo 6º.-Solicitudes e prazo de presentación.
1. As solicitudes segundo modelo ED 415A que se publica como anexo a esta orde, asinada polo interesado, presentaranse no rexistro xeral da Consellería de Educación e Ordenación Universitaria dirixidas á Dirección Xeral de Universidades-Subdirección Xeral de Universidades (edificio administrativo San Caetano, s/n, 15781 Santiago de Compostela), ou ben en calquera dos centros previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común, modificada pola Lei 4/1999 (BOE do 14 de xaneiro) para a presentación de instancias. Se no uso deste dereito a solicitude é remitida por correo, presentarase en sobre aberto para que sexa datada e selada polo funcionario de correos antes de certificala.
2. Para os efectos de información, os interesados tamén poderán consultar a páxina web da Dirección Xeral de Universidades, no portal educativo www.edu.xunta.es.
3. O prazo de presentación de solicitudes será ata o 30 de setembro de 2005 desde o día seguinte ao da publicación desta convocatoria no Diario Oficial de Galicia.
Artigo 7º.-Documentación.
As solicitudes deberán ir xunto coa seguinte documentación:
a) Copia do DNI.
b) Certificación académica persoal ou copia compulsada dela en que se fará constar a nota media simple
do expediente académico, calculada de acordo co artigo 10º destas bases da convocatoria.
c) Breve currículum vitae, no cal se indiquen, se é o caso, os premios, bolsas, etc., que lle fosen concedidos, e outros méritos que queiran alegar, xunto coa documentación correspondente.
d) Documento facilitado pola entidade bancaria, a nome do interesado, en que conste o número de conta do cliente, os códigos que identifican o banco, a oficina e o díxito de control.
Artigo 8º.-Tramitación.
Unha vez comprobado que todas as solicitudes reúnen os requisitos establecidos nesta orde de convocatoria, exporanse as listas provisionais das solicitudes admitidas e excluídas nos taboleiros de anuncios da Consellería de Educación e Ordenación Universitaria, nas súas delegacións provinciais e nos vicerreitorados de estudantes das tres universidades galegas, sinalando, se é o caso, as causas de exclusión.
Así mesmo, estas listas tamén poderán ser consultadas na páxina web da Xunta de Galicia-Consellería de Educación e Ordenación Universitaria. www.edu.xunta.es. As listas provisionais estarán expostas desde o día 11 ao 21 de outubro de 2005. Os interesados poderán, durante ese mesmo prazo, formular as reclamacións para emendar erros e faltas de documentación ante a Dirección Xeral de Universidades presentando, se é o caso, a documentación necesaria.
Transcorrido este prazo sen que se emenden as causas de exclusión considerarase que o interesado desiste da súa petición, segundo o disposto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común.
Artigo 9º.-Comisión avaliadora.
A selección dos candidatos será realizada por unha comisión avaliadora integrada por:
Presidente: o director xeral de Universidades ou, por delegación, o subdirector xeral de Universidades.
Vogais:
Vicerreitor de Estudantes da Universidade da Coruña.
Vicerreitora de Estudantes da Universidade de Santiago de Compostela.
Vicerreitor de Extensión Universitaria e Estudantes da Universidade de Vigo.
Un funcionario do Servizo de Apoio e Orientación aos Estudantes Universitarios.
Un funcionario da Dirección Xeral de Universidades, que actuará como secretario con voz e voto.
Artigo 10º.-Selección.
1. A selección farase tendo en conta a nota media simple calculada cos parámetros reflectidos no Protocolo de Colaboración subscrito o 21 de febreiro de 2005, entre a Consellería de Educación e Ordenación Universitaria e as universidades de Santiago de Compostela, A Coruña e Vigo, publicado no DOG o día 23 de marzo de 2005 (resolución da Secretaría Xeral da Consellería de Educación e Ordenación Universitaria do 15 de marzo de 2005).
2. En caso de empate na nota media do expediente académico, a comisión avaliadora poderá ter tamén en
conta para matizar a proposta o curriculum vitae dos solicitantes e os méritos acreditados. Naqueles casos en que a comisión avaliadora o considere oportuno, poderá propoñer a concesión de accésit (sen dotación económica), ou deixar o premio deserto.
Artigo 11º.-Resolución.
Efectuada a selección pola comisión, esta elevaralle, a través da Dirección Xeral de Universidades, un informe-proposta ao conselleiro de Educación e Ordenación Universitaria, quen resolverá. Contra esta resolución, que esgota a vía administrativa, os interesados poderán interpoñer recurso potestativo de reposición perante o conselleiro de Educación e Ordenación Universitaria no prazo dun mes a partir do día seguinte ao da publicación da resolución no DOG, segundo o disposto nos artigos 116 e 117 da Lei 4/1999 (BOE do 14 de xaneiro), de modificación da Lei 30/1992, de réxime xurídico das administracións públicas e do procedemento administrativo común, ou ben directamente o recurso contencioso-administrativo no prazo de dous meses perante o Tribunal Superior de Xustiza de Galicia.
Artigo 12º.-Pagamento.
Para o aboamento das axudas convocadas nesta orde, e de acordo co estipulado no artigo 16 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia, farase un pagamento único do premio concedido.
Disposicións adicionais
Primeira.-A concesión de axudas reguladas nesta orde terá como límite global o crédito asinado nos orzamentos para este fin.
Segunda.-O incumprimento total ou parcial de calquera das condicións establecidas nesta orde constituirá causa determinante de revogación da axuda e do seu reintegro polo beneficiario ou solicitante segundo o disposto no artigo 78.10º do Decreto lexislativo 1/1999, do 7 de outubro, de acordo coa redacción dada pola Lei 14/2004, do 29 de decembro.
Toda alteración das condicións que se tiveron en conta para a concesión da subvención poderá dar lugar á modificación da resolución de concesión.
Terceira.-Se por calquera causa, no momento en que a comisión avaliadora, teña que examinar as solicitudes, algún dos compoñentes non puidese asistir, será substituído pola persoa que para o efecto se nomee. Este nomeamento deberá recaer noutra persoa da dirección xeral, ou da universidade correspondente, en virtude da súa representación.
Cuarta.-Para os efectos establecidos no artigo 10 do Decreto 287/2000, do 21 de novembro (DOG do 11 de decembro), polo que se desenvolve o réxime de axudas e subvencións públicas da Comunidade Autónoma de Galicia, o prazo máximo para resolver as solicitudes correspondentes ás accións especificadas nesta orde, será de seis meses, contados a partir da publicación desta convocatoria no Diario Oficial de Galicia.
As solicitudes entenderanse desestimadas de non ditarse resolución expresa no prazo sinalado no parágrafo anterior.
Quinta.-Os beneficiarios teñen a obriga de facilitar toda a información que lles sexa requirida pola Intervención Xeral da Comunidade Autónoma, o Tribunal
de Contas e o Consello de Contas, no exercicio das súas funcións de fiscalización e control do destino das axudas.
Disposicións derradeiras
Primeira.-Autorízase o director xeral de Universidades para ditar as disposicións necesarias para o desenvolvemento desta orde.
Segunda.-Esta orde adáptase ás normas básicas do texto articulado da Lei 38/2003, do 17 de novembro (BOE do 18 de novembro), xeral de subvencións e
ás do seu desenvolvemento, igualmente aos artigos 78 e 79 do Decreto lexislativo 1/1999, do 7 de outubro, de acordo coa redacción dada pola Lei 14/2004, do 29 de decembro.
Terceira.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 3 de maio de 2005.
Celso Currás Fernández
Conselleiro de Educación e Ordenación Universitaria
CONSELLERÍA DE FAMILIA, XUVENTUDE, DEPORTE
E VOLUNTARIADO