A política de cooperación ao desenvolvemento está experimentando na nosa comunidade autónoma un importante crecemento, que concorre xunto coas executadas polo Reino de España, a Unión Europea, e os organismos internacionais -singularmente os programas das Nacións Unidas-, tanto no relativo a medios e instrumentos financeiros como á extensión xeográfica que abrangue, sendo necesaria a formación de recursos humanos para o desenvolvemento das accións neste campo, especialmente tras a aprobación e publicación da Lei 3/2003, do 19 de xuño, de cooperación para o desenvolvemento, pola que a Comunidade Autónoma de Galicia asume a responsabilidade de cooperar con outros países para propiciar o seu desenvolvemento integral.
Coa aprobación das bases reguladoras para a concesión de bolsas preténdese apoiar a formación de expertos/as en cooperación internacional para o desenvolvemento, coa finalidade de complementar a formación académica dos titulados/as superiores con prácticas na Secretaría Xeral de Relacións coa Unión Europea e Cooperación Exterior, e se é o caso, no exterior.
Na súa virtude, en uso das facultades que teño atribuídas para a debida aplicación dos créditos para o fin para o que foron orzamentados
DISPOÑO:
Artigo único.
1. Aprobar as bases reguladoras para a concesión de bolsas para a formación de expertos/as en cooperación internacional para o desenvolvemento na Secretaría Xeral de Relacións coa Unión Europea e Cooperación Exterior e, se é o caso, complementadas con prácticas no exterior.
2. Convocar a concesión de dúas bolsas de acordo coas bases reguladoras que figuran no anexo I, con cargo á aplicación orzamentaria 04.03.213B.480.0 dos orzamentos xerais da Comunidade Autónoma de Galicia pola contía global de 42.097 euros, da que 23.665 euros se imputarán aos do exercicio 2005 e 18.432 euros aos do exercicio 2006.
Disposición adicional
Única.-Deléganse no secretario xeral de Relacións coa Unión Europea e Cooperación Exterior as atribucións para a resolución dos procedementos de concesión, de revogación e reintegro das bolsas, de modificación destas e dos sancionadores que procedan, de ser o caso, excepto cando a competencia resida no Consello da Xunta de Galicia.
Disposicións derradeiras
Primeira.-Facúltase o secretario xeral de Relacións coa Unión Europea e Cooperación Exterior para ditar cantas disposicións e instrucións sexan precisas para o mellor desenvolvemento e aplicación desta orde.
Segunda.-A todo o non previsto nesta orde, aplicarase o disposto no Decreto lexislativo 1/1999, do 7 de outubro, polo que se aproba o texto refundido da Lei de réxime financeiro e orzamentario de Galicia, a Lei 14/2004, do 29 de novembro, de medidas tributarias e de réxime administrativo e no Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.
Terceira.-Estas bases, a convocatoria e cantos actos administrativos se deriven delas poderán impugnarse na forma e nos prazos establecidos na Lei 30/1992, de réxime xurídico das administracións públicas e do procedemento administrativo común.
Cuarta.-A presente orde entrará en vigor o día seguinte ao da súa publicación no Diario Oficial de Galicia.
Santiago de Compostela, 31 de marzo de 2005.
Jaime Pita Varela
Conselleiro da Presidencia, Relacións
Institucionais e Administración Pública
ANEXO I
Bases reguladoras para a concesión de bolsas para a formación de expertos/as en cooperación internacional para o desenvolvemento na Secretaría Xeral de Relacións coa Unión Europea e, se é o caso, complementadas no exterior.
Primeira.-Obxecto.
Estas bases teñen por obxecto regular a concesión de bolsas para a formación de expertos/as en cooperación internacional para o desenvolvemento na Secretaría Xeral de Relacións coa Unión Europea e Cooperación Exterior e, se é o caso, complementadas no exterior.
Segunda.-Requisitos dos solicitantes.
Os solicitantes deben reunir os seguintes requisitos:
a) Ser español.
b) Ser natural de Galicia ou ter veciñanza administrativa en Galicia ou ter a condición de residente ausente.
c) Non superar a idade de 30 anos na data en que acabe o prazo de presentación de solicitudes.
d) Estar en posesión de título universitario superior.
e) Non ter transcorrido máis de catro anos desde a data de finalización dos estudos superiores.
f) Non manter relación laboral en vigor co organismo que promove a bolsa nin coas entidades colaboradoras.
Terceira.-Solicitude, documentación e prazo de presentación.
1. Os interesados/as deberán cubrir a solicitude que figura no anexo I dirixida o secretario xeral de Relacións coa Unión Europea e Cooperación Exterior e presentada por calquera das formas previstas no artigo 38.4º da Lei de réxime xurídico das administracións públicas e do procedemento administrativo común.
Xunto coa solicitude presentaranse, ademais, os seguintes documentos:
a) Certificación académica completa ou fotocopia compulsada dela, que inclúa as cualificacións obtidas na licenciatura, xunto co título ou depósito do título.
b) Certificado de inscrición no Padrón de habitantes do concello da súa residencia ou na oficina consular no suposto de residentes ausentes.
c) Fotocopia compulsada do documento nacional de identidade do solicitante, por ambas caras, e do libro de familia.
d) Certificado médico que acredite non padecer enfermidade nin estar afectado/a por limitacións físicas ou psíquicas que sexan incompatibles co desempeño das funcións do posto de traballo.
e) Currículo, acompañado da documentación cotexada acreditativa dos méritos e experiencia alegada ao obxecto da súa avaliación.
f) Memoria explicativa do coñecemento das accións internacionais de cooperación exterior.
g) Declaración do conxunto de todas as axudas solicitadas ou concedidas para as actividades obxecto desta orde das distintas administracións públicas
competentes ou calquera dos seus organismos, entes ou sociedades.
h) Certificación de vida laboral emitida pola Tesouraría da Seguridade Social.
i) Documento acreditativo do coñecemento de galego con especificación do grao.
j) No caso de alegar o coñecemento de idiomas estranxeiros, será necesario acreditalo mediante títulos ou diplomas expedidos por escolas ou centros públicos oficiais, españois ou estranxeiros.
k) Dúas fotografías tamaño carné co seu nome e apelidos ao dorso.
2. O prazo para a presentación da solicitude e a documentación sinalada no parágrafo anterior será de 40 días hábiles a partir do día seguinte ao da publicación da orde no Diario Oficial de Galicia.
No caso de que a solicitude non estivese debidamente cuberta ou que a documentación presentada contivese erros ou fose incompleta, requerirase ao solicitante para que no prazo de dez días enmende a falta ou achegue os documentos necesarios con indicación de que, se así non o fixese, considerarase desistido da súa petición procedendo ao arquivo do seu expediente na forma e termos indicados no artigo 71 da Lei 30/1992, de réxime xurídico das administracións públicas e do procedemento administrativo común.
Cuarta.-Duración das bolsas, contía e obrigas dos bolseiros/as.
1. O período de disfrute das bolsas comezará a contarse a partir do primeiro día do seguinte mes ao da data que se fagan públicos os resultados da convocatoria, sempre que conste a aceptación por parte do beneficiario/a e terá unha duración de doce meses. O cómputo comezará o primeiro día do mes seguinte a aquel no que se declarara a aceptación polo bolseiro/a. A dotación de cada unha delas é de 1.100,00 euros brutos mensuais.
2. A aceptación da bolsa xera a obriga do bolseiro/a de subscribir un seguro de asistencia sanitaria, de accidentes e de repatriación en caso de accidente ou enfermidade, que terá cobertura internacional e vixencia polo período de duración da bolsa, ou ben acreditar por calquera medio admitido en dereito dispoñer da súa susodita cobertura, así como a obriga de asumir os gastos de desprazamento ordinario en Galicia, de ser o caso, que deba realizar no exercicio das funcións que lle sexan encomendadas pola Secretaría Xeral de Relacións coa Unión Europea e Cooperación Exterior (en adiante, secretaría), excepto os desprazamentos ao resto do territorio nacional e ao exterior, nos que percibirá en concepto de viático diario unha cantidade de ata 44 euros
e de ata 96 euros, respectivamente. Os gastos de locomoción de ida e volta, de orixe a destino, correrán por conta da secretaría.
3. O bolseiro/a quedará baixo a dependencia inmediata da secretaría quen lle asignará os traballos atendendo á súa formación e capacidades.
4. O bolseiro/a tamén se obriga pola aceptación a:
* Non desempeñar ningún traballo remunerado durante o período de vixencia da bolsa.
* Manter un comportamento que en ningún caso implique un prexuízo para os intereses da Xunta de Galicia nin para a imaxe exterior de Galicia e España.
* Mencionar a súa condición de bolseiro/a nas teses de doutoramento ou nos traballos de investigación que poida realizar.
* Realizar o plan de traballo baixo as directrices da secretaría e dos responsables das outras institucións onde realice as prácticas e someterse ás normas en canto á xornada laboral e funcionamento que esta determine.
* Desprazarse por instrución da secretaría e da OTC.
* Utilizar os medios dispoñibles no centro de traballo para a realización das actividades que lle sexan encomendadas.
Quinta.-Procedemento de adxudicación das bolsas e baremo.
1. Para a adxudicación das bolsas constituirase unha comisión de avaliación, que adaptará o seu funcionamento ao previsto na presente convocatoria e, supletoriamente, aos regulamentos contidos no capítulo II, título II, artigos 22 e seguintes da Lei 30/1992, do 26 de novembro, de réxime xurídico das administracións públicas e do procedemento administrativo común.
A comisión compoñerase polos seguintes membros:
1. Presidente: o subdirector/a xeral con competencia en materia de cooperación exterior.
2. Secretario: un xefe de servizo da secretaría.
3. Vogais: dous funcionarios da secretaría designados polo presidente da comisión avaliadora con rango de xefe de servizo.
Os membros da comisión non devengarán indemnización por asistencia.
2. A comisión examinará as solicitudes presentadas, valorando os méritos acreditados conforme o seguinte baremo:
A. Formación (de 0 a 6 puntos).
-1 punto por unha licenciatura a maiores da titulación exixida e 0, 50 puntos por unha diplomatura
a maiores da titulación exixida como requisito para acceder á bolsa (máximo 1 punto).
-Por cursos de galego: 0,50 puntos en grao de iniciación e 1 punto en grao de perfeccionamento.
-Por coñecemento de idiomas estranxeiros: 0,50 puntos por cada un ata un máximo de 1,50 puntos.
-Por cada curso de formación relacionado coa cooperación e acción exterior, de máis de 40 horas: 0,10 puntos ata un máximo de 0,50.
-Por cursos de postgrao ou máster en materias relacionadas coa cooperación para o desenvolvemento, Unión Europea, comercio exterior ou relacións internacionais: 1 punto (máximo 1 punto).
-Por cursos relacionados coa informática e/ou internet, de máis de 20 horas: 0,10 puntos por cada un ata un máximo de 0,50 puntos.
-Por outros méritos documentados a valorar pola comisión como contratos laborais, bolsas disfrutadas, outros cursos, etc., (ata 0,50 puntos).
B) Experiencia (ata 4 puntos).
-Experiencia en tarefas de voluntariado social debidamente acreditada: 1 punto por cada seis meses e ata un máximo de 2 puntos.
-Experiencia acreditada en cooperación ao desenvolvemento: 1 punto por cada 6 meses ata un máximo de 2 puntos.
3. Entrevista persoal.
A comisión de selección poderá realizar aos aspirantes que conseguiran na avaliación da formación e da experiencia unha puntuación mínima de 4 puntos, unha entrevista na que se valorarán as aptitudes e actitudes persoais dos aspirantes para a realización das funcións que se van desempeñar, o coñecemento dos temas de cooperación así como a facilidade de expresión oral en lingua inglesa. A entrevista será valorada de 0 a 6 puntos.
A comisión poderá estar asesorada polo persoal técnico ou profesional que considere necesario e que poderá asistir ás sesións con voz pero sen voto.
4. A comisión propoñerá unha listaxe de adxudicatarios/as entre os solicitantes que acaden unha maior puntuación, facéndoa pública mediante a inserción no taboleiro de anuncios da secretaría. Incluirase unha listaxe de reserva, integrada polos solicitantes valorados cun mínimo de 4 puntos na fase de entrevista segundo orde de puntuación consecutiva, que se terán en conta para os supostos de renuncias ou baixas dos adxudicatarios/as.
5. A comisión elevará a súa proposta ao conselleiro competente en materia de cooperación para o desenvolvemento, que resolverá, logo da súa fiscalización, sobre a concesión das bolsas.
6. O prazo máximo para resolver será de tres meses. De non ditarse resolución no indicado prazo, as solicitudes entenderanse desestimadas.
7. No suposto de que, unha vez adxudicadas as bolsas, os beneficiarios/as que non declarasen a súa aceptación ou a súa renuncia unha vez aceptada, poderase adxudicar a bolsa ao seguinte aspirante con maior puntuación procedéndose, do mesmo xeito, no caso de inaceptación ou renuncias sucesivas.
8. De non presentarse solicitudes, ou non acadasen as rexistradas na fase de avaliación da formación e da experiencia a puntuación mínima exixida, a convocatoria será declarada deserta mediante resolución da secretaría que se publicará no Diario Oficial de Galicia.
Sexta.-Aceptación, renuncia e reintegro.
1. Unha vez recibidas as notificacións de concesión das bolsas polos beneficiarios/as, estes, no prazo máximo de cinco días naturais, comunicarán á secretaría a súa aceptación ou renuncia. No caso de aceptación, achegarase con ela certificación bancaria da conta onde deberá ser aboada a bolsa e acreditación de dispoñer da cobertura asistencial exixida na base cuarta, parágrafo dous. Transcorridos os sinalados cinco días, se os beneficiarios/as non se declararan en ningún sentido, entenderase que renuncian á bolsa, procedéndose a adxudicala ao seguinte solicitante que figure por orde de puntuación na listaxe de reserva confeccionada inicialmente.
Seguirase este mesmo procedemento cando durante o tempo de vixencia da bolsa se producira algunha vacante por calquera circunstancia, incluída a renuncia.
2. A renuncia durante a vixencia da bolsa dará lugar ao reintegro das cantidades percibidas, previa instrución do correspondente procedemento de reintegro, excepto supostos de enfermidade, de accidente ou derivados do cumprimento de obrigas legais ou outras debidamente xustificadas.
Sétima.-Natureza xurídica da relación.
A aceptación da bolsa non xera ningún tipo de vínculo laboral, administrativo nin de calquera outra natureza contractual ou legal entre a Administración autonómica ou a Administración xeral do Estado e o beneficiario/a, nin supoñerá a súa alta en réxime algún da Seguridade Social. Os dereitos e as obrigas
cínguense en exclusiva aos estipulados nestas bases reguladoras.
Oitava.-Pagamento das bolsas.
As bolsas serán aboadas por mensualidades vencidas despois da correspondente certificación da subdirección xeral competente en materia de cooperación exterior do bo aproveitamento das prácticas. Os viáticos seran aboados previa xustificación documental dos gastos de aloxamento, que poderán incluír o almorzo. Segundo a duración do desprazamento poderanse conceder anticipos de ata o 35% do importe estimado por este concepto.
Novena.-Causas de extinción e revogación da bolsa.
1. A condición de bolseiro/a extínguese por:
* Expiración do período de duración da bolsa.
* Renuncia.
* Enfermidade ou accidente que o incapacite para o desenvolvemento das prácticas.
2. Darán lugar a revogación da bolsa, previa instrución de procedemento contraditorio:
* O incumprimento por parte do bolseiro/a das obrigas relacionadas na base cuarta, contraídas coa aceptación da bolsa.
* A ausencia inxustificada.
* Obtención da bolsa sen reunir os requisitos exixidos para a súa concesión ou destinala para finalidades distintas para a que foi concedida.
3. A revogación da bolsa obrigará ao beneficiario/a ao reintegro das cantidades percibidas incluídos os xuros de demora, previa instrución do procedemento de reintegro previsto na normativa de aplicación.
Décima.-Memoria final.
No prazo dun mes desde que finalice o período de formación, os bolseiros/as presentarán á secretaría unha memoria resumo das actividades realizadas no seu destino así como certificación dos responsables das outras institucións colaboradoras, que será avaliada pola subdirección xeral competente en materia de cooperación exterior, expedíndose, a súa proposta, polo secretario xeral de Relacións coa Unión Europea e Cooperación Exterior, diploma acreditativo do bo aproveitamento das prácticas e aptitude con indicación da súa duración, de ser estas avaliadas positivamente en función do grao de cumprimento das tarefas encomendadas.
