Dentro do plan de actividades da Escola Galega de Administración Pública para o 2005 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse, unhas Xornadas sobre o seguro de responsabilidade civil das administracións públicas, conforme as seguintes bases:
1. Obxectivos.
A xeneralización do seguro de responsabilidade civil subscrito polas administracións públicas prodúcese nun marco normativo caracterizado pola carencia dunha regulación específica destes seguros e de normas de adecuación do funcionamento dunha institución concibida para as relacións entre suxeitos privados e as peculiaridades das persoas xurídicas públicas.
A modificación da regulación dos contratos das administracións públicas é a máis recente da LOPX e da LXCA, en virtude da Lei orgánica 19/2003, do 23 de decembro, con vistas a atribuír expresamente a competencia para coñecer as accións de responsabilidade patrimonial -ou civil- exercidas conxuntamente contra a Administración asegurada e a súa aseguradora privada aos órganos da orde xurisdicional contencioso-administrativa, determina a oportunidade de celebración desta actividade.
2. Contido.
Trataranse estes temas:
-Responsabilidade patrimonial das administracións públicas e responsabilidade civil: problemas de relación de xurisdición competente.
-O aseguramento da responsabilidade patrimonial das administracións públicas.
-Exercicio da acción directa contra a aseguradora da Administración pública.
-O contrato de seguro de responsabilidade civil das administracións públicas.
-Xurisdición e dereito aplicable en pleitos de responsabilidade civil das administracións públicas: unha visión xurisprudencial.
-A vía de regreso fronte ao persoal ao servizo das administracións públicas no caso da existencia dun seguro de responsabilidade civil.
-A responsabilidade civil e o aseguramento dos contratistas e dos concesionarios das administracións públicas.
3. Destinatarios.
Persoal ao servizo da Xunta de Galicia e da Administración local galega e interesados en xeral.
4. Desenvolvemento
-Horario: mañá e tarde.
-Lugar e data: as xornadas convocadas desenvolveranse no salón de actos do edificio administrativo da Xunta de Galicia en Ferrol, sito na Praza Camilo José Cela s/n, da citada cidade, os días 19 e 20 de maio de 2005.
5. Inscrición.
-Prazo: remata o luns, 16 de maio de 2005.
-Tramitación de solicitudes: as solicitudes irán dirixidas ao director da Escola Galega de Administración Pública, Polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por fax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión chamando por teléfono, o día 18 de maio, das 8.30 ás 14.30 horas, aos seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolver as incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ao remate das xornadas, a aquelas persoas inscritas que concorresen asiduamente a elas, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e as datas da súa realización.
Santiago de Compostela, 18 de abril de 2005.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA