Dentro do plan de actividades da Escola Galega de Administración Pública para o 2005 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse as Xornadas sobre a ordenación española da estranxeiría no marco do espazo da liberdade, seguridade e xustiza da Unión Europea, conforme as seguintes bases:
1. Obxectivos.
A LO 14/2003, do 20 de novembro, pola que se aproba a reforma da LO 4/2000, do 11 de xaneiro, sobre o dereito e as liberdades dos estranxeiros en España e a sua integración social, establecía na disposición adicional terceira o mandato ao Goberno para a elaboración do correspondente regulamento de execución. Con evidente atraso, e tras unha longa negociación cos sectores sociais implicados, chegouse ao esperado Real decreto 2393/2004, do 30 de decembro. A dita disposición é o resultado dun
alto grao de concertación entre diferentes forzas políticas, axentes sociais e organizacións non gobernamentais e aproveita a ocasión para incorporarlle ao ordenamento xurídico español numerosas disposicións da Unión Europea. Supón a primeira oportunidade de materializar normativamente un cambio de orientación na política migratoria, co convencemento de que é un asunto de Estado que precisa da unión de todas as forzas políticas. O obxectivo destas xornadas é a exposición e a crítica da actual política española de estranxeiría no marco do novo espazo europeo de liberdade, seguridade e xustiza.
2. Contido.
Trataranse estes temas:
-A incorporación do espazo Schengen no marco xurídico e institucional da Unión Europea.
-Liberdades comunitarias e nacionais de terceiros Estados.
-Acceso e integración dos estranxeiros: a experiencia francesa.
-¿Un modelo coherente de normalización?: Real decreto 2393/2004, do 30 de decembro.
-Problemas derivados do reagrupamento familiar.
-Cara á consolidación dun mercado de traballo integrado en Europa.
-Mesa redonda cos relatores e resumo das conclusións das xornadas.
3. Destinatarios.
Persoal ao servizo da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e data: as xornadas convocadas desenvolveranse no salón de actos da Delegación de Presidencia da Coruña, sita na praza de Pontevedra nº 22, da citada cidade, os días 12 e 13 de maio de 2005.
5. Inscrición.
-Prazo: remata o martes, día 10 de maio de 2005.
-Tramitación de solicitudes: as solicitudes irán dirixidas ao director da Escola Galega de Administración Pública, polígono das Fontiñas, rúa de Madrid, 2-4, 15707 Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscrición fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 11 de maio, das 8.30 ás 14.30 horas, aos seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolver as incidencias que puidesen xurdir no desenvolvemento das xornadas, así como o de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ao remate das xornadas, a aquelas persoas inscritas que concorran asiduamente a elas, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e as datas da súa realización.
Santiago de Compostela, 11 de abril de 2005.
Domingo Bello Janeiro
Director da Escola Galega
de Administración Pública