Normativa reguladora do proceso extraordinario de dotación de prazas de axudante vinculadas a necesidades docentes e á calidade investigadora. (Aprobada por acordo do Consello de Goberno da Universidade da Coruña do 10 de febreiro de 2005).
Unha das premisas imprescindibles da calidade docente e investigadora da nosa universidade é a existencia dun cadro de persoal docente axeitado.
Os orzamentos para o ano 2005 recollen a creación dun total de 20 prazas de profesorado en formación, cunha dupla finalidade: en primeiro lugar, crear prazas de profesorado en formación naquelas áreas que utilizaron conxunturalmente a figura de profesor asociado e soliciten a súa reconversión; en segundo lugar, estimular o traballo daqueles grupos de investigación cuxa produción atinxa cotas de excelencia.
Esta normativa ten por obxecto regular a asignación desas prazas de axudante en condicións de publicidade, transparencia, obxectividade, concorrencia competitiva e non discriminación.
Artigo 1º.-Obxecto.
Esta convocatoria ten por obxecto establecer as bases que van rexer o proceso de asignación de axudantías de nova creación a áreas ou grupos de investigación de calidade.
Artigo 2º.-Modalidades.
Establécense dúas modalidades de asignación:
-Modalidade A, por reconversión de profesores asociados.
-Modalidade B, por excelencia investigadora.
Artigo 3º.-Requisitos das persoas solicitantes.
-Modalidade A.
Poderán solicitar unha axudantía de nova creación aquelas áreas de coñecemento que propoñan a minoración da dedicación de profesores asociados da área. Un 80% da (*)capacidade docente da área deberá estar cuberta con docencia de 1º e 2º ciclo.
Modalidade B.
Poderán solicitar unha axudantía aqueles grupos de investigación da Universidade da Coruña inscritos na OTRI. A área de coñecemento para a que se solicita a praza debe ter cuberto o 70% da súa capacidade docente con docencia de primeiro e segundo ciclo. Cada grupo só poderá solicitar unha praza de axudante.
(*) A capacidade docente dunha área de coñecemento calcúlase multiplicando o número de profesores da área pola dedicación máxima de cada tipo de praza.
Artigo 4º.-Criterios de selección.
Na modalidade A, serán criterios para ponderar na concesión de axudantías:
a) A participación da área en procesos de anovación pedagóxica, especialmente a vinculada ao Espazo Europeo de Educación Superior.
Na modalidade B, serán criterios para ponderar:
a) A media dos sexenios concedidos nos últimos 8 anos aos integrantes do grupo de investigación que reúnan os requisitos para poder solicitalos.
b) Os recursos externos obtidos polo grupo nos últimos 6 anos mediante axudas oficiais, convenios ou contratos de investigación.
Artigo 5º.-Procedemento de concesión.
As solicitudes serán remitidas á reitoría polos departamentos antes do 19 de marzo, mediante instancia formalizada dirixida ao vicerreitor de profesorado e acompañada dunha memoria xustificativa da petición.
Reunidas todas as solicitudes, o vicerreitor comprobará que estas presentan toda a documentación, requirindo en caso contrario a súa reparación nun prazo máximo de dez días. De non se corrixir a falta de documentación, declararase arquivada a solicitude por desistimento da persoas solicitante.
O vicerreitor de profesorado poderá solicitar os informes que considere oportunos para acreditar os requisitos ou méritos alegados.
Unha vez instruídas as solicitudes, remitiranse á COAP e á Comisión de Investigación, que elaborarán a proposta de resolución con base nos criterios que previamente establezan respectando o disposto nesta normativa.
A resolución final será adoptada polo Consello de Goberno.
O reitor convocará os concursos de provisión das prazas no prazo máximo dun mes desde a realización do Consello de Goberno.
A Coruña, 16 de febreiro de 2005.
José María Barja Pérez
Reitor da Universidade da Coruña
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA