Dentro do programa de actividades que o Centro de Estudos Xudiciais e Seguridade Pública de Galicia ten previsto realizar no ano 2005, e conforme as funcións atribuídas pola Lei 1/2005, do 4 de xaneiro, do Centro de Estudos Xudiciais e Seguridade Pública de Galicia, anúnciase a celebración dun curso sobre estratexias de mitigación do risco de inundacións en Galicia, que deberá desenvolverse conforme as seguintes bases:
Primeira.-Obxectivos.
Dar a coñecer as medidas e estratexias posibles para facerlles fronte e previr os danos causados polas inundacións en Galicia e adquirir os coñecementos básicos para poder dar respostas locais ante o risco de inundacións, a través das novas ferramentas de xestión e planificación.
Segunda.-Destinatarios.
-Técnicos da subdirección e dos servizos provinciais de Protección Civil da Xunta de Galicia.
-Técnicos en materia de protección civil, tendo prioridade aqueles que están en concellos afectados por este risco.
-Responsables de AVPC, tendo prioridade aqueles que están en concellos afectados por este risco.
Terceira.-Desenvolvemento.
1. Prazas: o número de prazas ofertadas é de 27.
2. Duración e datas: o curso desenvolverase os días 3, 4, 10 e 11 de maio de 2005, cunha duración de 32 horas lectivas.
O horario será o seguinte:
-Das 9.30 ás 14.00 horas e das 16.00 ás 20.00 horas.
3. Lugar: o curso realizarase na sede do Centro de Estudos Xudiciais e Seguridade Pública de Galicia no concello da Estrada, con visitas a distintos encoros da comunidade.
Cuarta.-Solicitudes e prazo de inscrición.
1. A inscrición dos participantes é totalmente gratuíta.
2. O persoal que desexe participar nestes cursos deberá presentar, cuberta á máquina ou con letra moi clara, a instancia que figura no anexo.
3. O prazo para a presentación de instancias rematará o día 22 de abril de 2005.
4. As instancias deberán vir asinadas polo xefe do organismo ao que estea adscrito e seladas, e no caso de haber máis dunha solicitude da mesma entidade, relacionalas en orde prioritaria. Este será requisito indispensable para ser admitido no curso.
5. As instancias deberán enviarse por correo á sede do Centro de Estudos Xudiciais e Seguridade Pública de Galicia avenida da Cultura, s/n, 36680 A Estrada ou ao fax 986 59 09 88, ou ben poden entregarse en calquera dos lugares previstos no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
Quinta.-Contido.
-Hidroloxía e climatoloxía de Galicia, tipo de inundacións en Galicia.
-Xestión de zonas inundables.
-Estratexias e medidas de mitigación do risco
de inundacións.
-Xestión de emerxencias hidráulicas.
-Lexislación e planificación.
-Encoros, presas e centrais hidráulicas.
-Visitas a lugares de interese.
Sexta.-Relación de admitidos.
A relación de participantes admitidos para a realización do curso esporase no taboleiro de anuncios do Centro de Estudos Xudiciais e Seguridade Pública de Galicia, sen prexuízo da oportuna notificación aos seleccionados con antelación á celebración do curso. Tamén poden confirmar a súa admisión chamando ao teléfono 986 59 00 21.
Sétima.-Asistencia.
É obrigatoria a asistencia e puntualidade en todas as actividades do curso. A falta de asistencia, mesmo cando sexa xustificada, a máis dun 10% das horas lectivas programadas determinará a cualificación de non apto no curso.
Oitava.-Certificado de aproveitamento.
Ao remate do curso entregaráselles un certificado de asistencia e aproveitamento a aquelas persoas que acrediten a súa asistencia continuada e superen as correspondentes probas de coñecementos.
Novena.-Modificacións.
O Centro de Estudos Xudiciais e Seguridade Pública de Galicia poderá modificar o desenvolvemento dos cursos para adaptalos ás necesidades da Administración e ás continxencias que poidan xurdir.
A Estrada, 2 de marzo de 2005.
José Antonio Vázquez Taín
Director do Centro de Estudos Xudiciais
e Seguridade Pública de Galicia
