O artigo 30.1º da Lei 3/1985, do 12 de abril, sinala que os bens patrimoniais inmobles da comunidade autónoma dos que non se xulgue previsible a súa afectación demanial ou aproveitamento pola propia Administración, poderán ser cedidos gratuitamente polo Consello da Xunta de Galicia, por proposta da Consellería de Economía e Facenda, a favor de institucións e corporacións públicas ou sen ánimo de lucro, que deberán destinalos a fins de utilidade pública ou de interese social.

A Fundación Centro Tecnolóxico do Granito, entidade sen ánimo de lucro, solicitou a cesión do uso do inmoble da Comunidade Autónoma de Galicia denominado Centro de Granitos de Galicia, para a súa dedicación aos fins que son propios desta fundación en apoio ao sector graniteiro de Galicia.

Mediante o Decreto 302/2004, do 2 de decembro (DOG nº 251 do 28 de decembro), desafectouse do dominio público o Centro de Granitos de Galicia; pola orde da Consellería de Economía e Facenda do 29 de decembro de 2004 (DOG nº 22, do 2 de febreiro) declarouse a alienabilidade do antedito inmoble.

A Secretaría Xeral e do Patrimonio, dependente da mencionada consellería, tramitou o expediente de cesión do uso de acordo co previsto nos artigos 83 e seguintes do regulamento que desenvolve a Lei 3/1985, do 12 de abril, do patrimonio da Comunidade Autónoma de Galicia.

Por todo o exposto, por proposta do conselleiro de Economía e Facenda e logo de deliberación do Consello da Xunta de Galicia, na súa reunión do día catro de marzo de dous mil cinco,

DISPOÑO:

Artigo 1º

Acórdase a cesión, a título gratuíto, a favor da Fundación Centro Tecnolóxico do Granito do dereito de uso do denominado Centro de Granitos de Galicia, xunto coas súas pertenzas afectas ao servizo, inmoble inscrito no Rexistro da Propiedade de Tui no tomo 861, libro 162, folio 103, predio nº 24.988, inscrición 2ª, descrito como segue:

Edificio nº 1 de planta rectangular composto de baixo de 800 m e andar primeiro de 375 m, aproximadamente, e edificio nº 2 tamén de planta rec

tangular composto de andar baixo de 250 m, aproximadamente, e semisoto de 230 m, asentadas ambas as dúas construcións sobre o seu soar de 6.103 m, no lugar da Gándara, Torneiros e Cataboi, O Porriño (Pontevedra), que linda o conxunto: norte, resto do predio matriz, hoxe dedicado a centro educativo; sur, camiño público, que separa do resto do predio matriz; leste, rúa da urbanización do Polígono de Torneiros; e oeste, estrada do Porriño a Mosende.

Artigo 2º

A devandita cesión de uso queda sometida ás seguintes cláusulas:

a) O fin da cesión será a dedicación do centro a dar apoio ao sector graniteiro de Galicia mediante a formación e investigación tecnolóxica que permitan mellorar o rendemento e a competitividade das explotacións galegas e promocionar a súa comercialización.

b) A cesión do uso outórgase por un período de dez anos, contados desde o outorgamento da correspondente escritura pública, prorrogable por períodos sucesivos da mesma duración, se así o acordase expresamente o Consello da Xunta de Galicia, por proposta da Consellería de Economía e Facenda, logo da petición do cesionario con anterioridade ao vencemento do período anterior, quedando excluída a tácita recondución.

c) Se o dereito cedido non se aplicase ao fin sinalado dentro do prazo de dous anos, contados desde o outorgamento da escritura pública, deixase de estalo con posterioridade, se descoidase ou utilizase con grave quebrantamento ou se incumprisen calquera das outras cláusulas, considerarase resolta a cesión e o dereito reverterá á Comunidade Autónoma de Galicia, de conformidade co disposto no artigo 87 do regulamento da Lei 3/1985, do 12 de abril, do patrimonio da Comunidade Autónoma galega.

d) Serán por conta do cesionario:

-Os gastos de conservación e mantemento do inmoble do que se cede o uso.

-Os gastos polos servizos con que conte o inmoble que se individualicen mediante aparellos contadores.

-As cotas dos tributos que poidan gravar o inmoble.

e) As obras de adaptación, reparación e mellora do inmoble, que serán por conta da entidade cesionaria, requirirán a presentación do proxecto e a súa aprobación pola Secretaría Xeral e do Patrimonio da Consellería de Economía e Facenda. En todo caso, os gastos investidos quedarán en beneficio do inmoble e, en ningún caso, poderán ser reembolsadas pola propietaria Comunidade Autónoma de Galicia.

f) O cesionario suscribirá unha póliza de aseguramento todo risco, de perdas ou danos materiais,

polo importe do valor do inmoble segundo o reflectido no Inventario Xeral do Patrimonio da Comunidade Autónoma. E outra póliza de aseguramento de responsabilidade civil que garanta posibles danos a terceiros por un importe mínimo de cento cincuenta mil douscentos cincuenta e tres euros. A Comunidade Autónoma de Galicia será a beneficiaria e a asegurada, respectivamente, destas pólizas, que se manterán durante todo o período de cesión, prazo inicial e, se é o caso, prórrogas.

Artigo 3º

A devandita cesión de uso formalizarase mediante escritura pública subscrita polo secretario xeral e do Patrimonio ou funcionario en quen delegue, debendo constar nela o acordo de cesión e a aceptación do cesionario; serán de conta deste os custos de formalización.

Disposición derradeira

A Consellería de Economía e Facenda, a través da Secretaría Xeral e do Patrimonio, realizará os trámites necesarios para a efectividade de canto se dispón neste decreto.

Santiago de Compostela, catro de marzo de dous mil cinco.

Manuel Fraga Iribarne

Presidente

José Antonio Orza Fernández

Conselleiro de Economía e Facenda