Cómpre facer as necesarias modificacións na estrutura da Consellería de Sanidade, co fin de reforzar o papel que a Lei 7/2003, do 9 de decembro, de ordenación sanitaria de Galicia (Losga) lle atribúe á Consellería de Sanidade como autoridade sanitaria e como órgano responsable da dirección do sistema sanitario de Galicia, coas funcións estratéxicas de fixar os obxectivos de mellora da saúde, garantir o dereito ás prestacións sanitarias de cobertura pública, delimitar os dispositivos e medios de titularidade pública ou adscritos ao sistema, segundo as necesidades de saúde da poboación, dirixir a Rede Galega de Atención Sanitaria de Utilización Pública e realizar as actuacións de autoridade sanitaria.

Estas funcións desenvólvense de acordo cos principios establecidos na Losga, con especial énfase na orientación cara aos cidadáns e participación social, na concepción integral da saúde, na universalidade do dereito ás prestacións de cobertura pública, na promoción da equidade no acceso aos servizos e prestacións sanitarios e no equilibrio terri

torial, cunha atención de calidade personalizada e humanizada, tanto na vertente clínica e organizativa coma na atención aos cidadáns.

O aseguramento único e público constitúe unha característica da Rede Galega de Atención Sanitaria de atención pública, de cara a garantir o exercicio dos dereitos dos cidadáns definidos polo título VIII da Losga, que afectan tanto o ámbito da promoción e protección da saúde coma as prestacións asistenciais, garantindo a equidade no acceso ás prestacións e servizos sanitarios. Inclúe tamén a definición da carteira de servizos e a incorporación ordenada das novas tecnoloxías sanitarias, establecendo os niveis estándares de calidade; o seguimento da equidade nas listas de espera e o establecemento de tempos de garantía.

A política sanitaria e sociosanitaria concrétanse no Plan de Saúde de Galicia, que determina os seus obxectivos básicos, sendo o instrumento superior de planificación e dirección do sistema sanitario de Galicia, que orienta todas as accións que teñen relación cos factores determinantes da saúde de acordo cos principios que inspiran o sistema sanitario galego.

As actuacións en materia de saúde pública, desde a perspectiva do conxunto da poboación galega, concrétanse na medición do nivel de saúde, na identificación dos problemas de saúde da poboación e na investigación das súas causas e determinantes, no establecemento de medidas de protección da saúde fronte a riscos ambientais, no control e na prevención das enfermidades transmisibles, na promoción de hábitos de vida saudables, no control sanitario e na prevención dos riscos para a saúde derivadas das substancias susceptibles de xerar dependencia.

A política autonómica en relación coa prestación farmacéutica promove o desenvolvemento de programas orientados a racionalizar o emprego dos recursos farmacoterapéuticos nos servizos sanitarios e sociosanitarios, con criterios de efectividade, seguridade e custo. A Consellería de Sanidade garante a prestación farmacéutica na Rede Galega de Atención Sanitaria de Utilización Pública nos termos recollidos na Lei 5/1999, do 21 de maio, de ordenación farmacéutica, e demais normativa reguladora. Tamén desenvolve as funcións de farmacovixilancia, o control das reaccións adversas aos medicamentos e o control sanitario doutros produtos de utilización diagnóstica, terapéutica ou auxiliar.

Para a dirección do sistema sanitario de Galicia é necesario dispor de información veraz que apoie a toma de decisións, tanto no nivel estratéxico coma no operativo. Os sistemas e a tecnoloxía de información son un elemento clave para a dirección e a consecución das políticas sanitarias e para a mellora dos servizos sanitarios, facilitando a accesibilidade da poboación e promovendo a continuidade asistencial e a organización por procesos.

A Consellería de Sanidade complementa as súas funcións mediante a inspección da xestión, do cumprimento da normativa e dos estándares sanitarios de todo o sistema sanitario, co obxecto de detectar e informar as posibles desviacións para que os órganos competentes adopten as correspondentes accións correctoras.

Na estrutura sepáranse o financiamento, planificación e avaliación da xestión, que lle corresponden á consellería, respecto da execución, que lle corresponde ao Sergas. Este organismo, ao que lle corresponde a dobre función de compra e provisión de servizos sanitarios, está adscrito á Consellería de Sanidade, que exerce sobre el as funcións de dirección, vixilancia e tutela.

Polo tanto, en virtude do disposto na Lei 1/1983, do 22 de febreiro, reguladora da Xunta e do seu presidente, modificada pola Lei 11/1988, do 20 de outubro, por proposta do conselleiro de Sanidade, cos informes previos da Consellería de Presidencia, Relacións Institucionais e Administración Pública, e da Consellería de Economía e Facenda e logo de deliberación do Consello da Xunta de Galicia na súa reunión do día tres de febreiro de dous mil cinco

DISPOÑO:

Artigo 1º.-A Consellería de Sanidade.

1. A Consellería de Sanidade é o órgano da Administración autonómica responsable da superior dirección e control do desenvolvemento das funcións e competencias que, en materia de sanidade, lle corresponden á Xunta de Galicia de acordo co establecido nos artigos 27.23º, 28.8º e 33 do Estatuto de autonomía de Galicia e que lle foron asignadas polo Decreto 28/1980, do 15 de outubro, polo artigo 21 da Lei 7/2003, do 9 de decembro, de ordenación sanitaria de Galicia e pola Lei 5/1999, do 21 de maio, de ordenación farmacéutica.

2. Así mesmo, correspóndelle o exercicio das competencias que para situacións sanitarias urxentes ou de necesidade se recollen na Lei orgánica 3/1986, do 14 de abril, de medidas especiais en materia de saúde pública.

Capítulo I

Servizos centrais

Artigo 2º.-Estrutura.

1. A Consellería de Sanidade, para o cumprimento das súas funcións, contará coa seguinte estrutura nos seus servizos centrais:

* O conselleiro.

* A Secretaría Xeral.

* A Dirección Xeral de Saúde Pública.

* A Dirección Xeral de Farmacia e Produtos Sanitarios.

* Órganos asesores, consultivos e de coordinación.

2. O Servizo Galego de Saúde, organismo autónomo de carácter administrativo creado pola Lei 1/1989, do 2 de xaneiro, de creación do Servizo Galego de Saúde, estará adscrito á Consellería de Sanidade.

Artigo 3º.-O conselleiro.

O conselleiro de Sanidade é a superior autoridade da consellería e con tal carácter desempeña e exerce as competencias que lle confiren a Lei 1/1983, do 22 de febreiro, reguladora da Xunta e do seu presidente, reformada pola Lei 11/1988, do 20 de outubro; a Lei 7/2003, do 9 de decembro, de ordenación sanitaria de Galicia; e a Lei 2/1996, do 8 de maio, de Galicia sobre drogas, en relación co Decreto 254/1997, do 10 de setembro e a Lei 5/1999, do 21 de maio, de ordenación farmacéutica.

Artigo 4º.-A Secretaría Xeral.

1. A Secretaría Xeral exercerá as funcións e competencias establecidas no Decreto 119/1982, do 5 de outubro, en relación con todas as unidades e servizos dependentes da Consellería de Sanidade e a inspección dos servizos, centros e organismos dependentes ou adscritos á consellería, sen prexuízo das funcións que se lle atribúan á Inspección Xeral de Servizos da Consellería da Presidencia, Relacións Institucionais e Administración Pública.

2. Correspóndelle ademais o desenvolvemento e a coordinación da política sanitaria e a sociosanitaria, á que se refire o capítulo IV do título VI da Losga.

3. Con respecto ao aseguramento único e público, correspóndelle a garantía do exercicio dos dereitos dos cidadáns definidos no título VIII da Losga, o seguimento da equidade nas listas de espera e o establecemento de tempos de garantía, a definición das prestacións do Sistema Sanitario Público Galego, o establecemento dos criterios xerais para asegurar a equidade no acceso ás prestacións e servizos sanitarios; garante uns niveis de calidade homoxéneos nas prestacións da Rede Galega de Atención Sanitaria de Utilización Pública, a autorización da incorporación de novos procedementos, técnicas e outros medios sanitarios na Rede Galega de Atención Sanitaria de Utilización Pública e a formulación da metodoloxía e criterios xerais de compra de servizos.

4. Con respecto á planificación sanitaria, correspóndelle a determinación dos criterios xerais de planificación sanitaria e sociosanitaria, a elaboración, difusión, seguimento, vixilancia e avaliación do cumprimento do Plan de saúde, a determinación dos plans, programas, directrices e criterios de actuación a que deben someterse os centros, servizos e establecementos incluídos na Rede Galega de Atención Sanitaria de Utilización Pública, o establecemento dos criterios xerais e a coordinación dos plans e actuacións en calidade da consellería e dos organismos adscritos ou dependentes. Correspóndelle tamén a planificación e desenvolvemento da formación sanitaria especializada.

5. Con respecto aos sistemas e tecnoloxías de información, correspóndelle o deseño da estrutura básica do sistema de información do sistema sanitario de Galicia, a normalización e mantemento e explotación dos sistemas e tecnoloxías de información e a definición, coordinación e supervisión dos plans de información e sistemas da Consellería de Sanidade e do Servizo Galego de Saúde, sen prexuízo das funcións atribuídas ás comisións de Informática e Central de Racionalización administrativa e á Consellería da Presidencia, Relacións Institucionais e Administración Pública.

6. Correspóndelle tamén á Secretaría Xeral o exercicio da inspección dos servizos sanitarios que se exercerá sobre todos os centros, servizos, establecementos e prestacións sanitarias de titularidade pública ou privada da Comunidade Autónoma de Galicia. Os efectivos que desenvolvan esta función dependerán orgánica e funcionalmente da Secretaría Xeral.

7. Correspóndelle o exercicio das potestades disciplinarias en relación ao persoal estatutario, agás a separación do servizo, sen prexuízo das competencias atribuídas ao conselleiro de Presidencia, Relacións Institucionais e Administración Pública.

8. Tamén lle corresponde a autorización e acreditación de centros, servizos e establecementos sanitarios, a avaliación de tecnoloxías sanitarias e de novas fórmulas organizativas, o soporte metodolóxico para a elaboración de guías de práctica clínica e de estándares clínicos, así como a protección radiolóxica. Así mesmo correspóndelle a ordenación e avaliación das actividades de formación e investigación en materia sanitaria, a promoción da formación continuada dos profesionais sanitarios e o exercicio das relacións institucionais de carácter sanitario cos órganos da Administración central do Estado e demais administracións públicas.

9. Correspóndelle igualmente iniciar, de oficio ou por proposta da Dirección de Farmacia e Produtos Sanitarios, os procedementos sancionadores a establecementos farmacéuticos, así como as funcións que á consellería lle atribúen as seguintes normas: Decreto 146/2001, do 7 de xuño, sobre planificación, apertura, traslado, cerramento e transmisión de oficinas de farmacia; Decreto 176/2001, do 12 de xullo, sobre creación, apertura e funcionamento dos servizos de farmacia e depósitos de medicamentos nas estruturas de atención primaria; e na Orde do 20 de novembro de 2001, pola que se establecen os requisitos e procedemento de autorización das boticas anexas.

10. Ademais corresponderanlle as competencias que lle atribúa a normativa en vigor e exercer aqueloutras funcións que lle sexan singular ou especificamente encomendadas ou delegadas polo conselleiro de Sanidade.

11. A Secretaría Xeral, para o exercicio das súas funcións, contará coa seguinte estrutura:

a) A vicesecretaría xeral.

b) A Subdirección Xeral de Réxime Administrativo.

c) Subdirección Xeral de Aseguramento e Planificación Sanitaria.

d) Subdirección Xeral de Sistemas e Tecnoloxías de Información.

e) A Subdirección Xeral de Inspección de Servizos Sanitarios.

f) A Subdirección Xeral de Documentación, Estudos e Informes.

g) A asesoría xurídica, organicamente integrada na Secretaría Xeral.

h) A intervención delegada, organicamente integrada na Secretaría Xeral.

Artigo 5º.-A vicesecretaría xeral.

Á vicesecretaría xeral, con nivel orgánico de subdirección xeral, correspóndelle como órgano de apoio ao secretario xeral, o exercicio das seguintes funcións:

a) O apoio administrativo e de xestión no seguimento e coordinación dos obxectivos e accións das distintas unidades da consellería.

b) Prestarlle asistencia técnica, xurídica e administrativa ao secretario xeral en todos os asuntos que este lle encomende.

c) A elaboración de estudos e propostas nas materias de estrutura, organización, deseño de procedementos administrativos, tanto nos servizos centrais como periféricos da consellería e demais entidades adscritas.

d) Substituír o secretario xeral da consellería nos casos de ausencia, enfermidade ou vacante deste.

Artigo 6º.-A Subdirección Xeral de Réxime Administrativo.

1. É a unidade encargada do asesoramento técnico-xurídico da consellería e da coordinación dos servizos de carácter xeral, do réxime interior dos rexistros e arquivos xerais.

2. Contará, a nivel orgánico de servizo, coas seguintes unidades:

2.1. Servizo Técnico Xurídico.

Correspóndenlle as seguintes funcións:

a) Desenvolvemento e tramitación dos proxectos de disposicións de carácter xeral da consellería e do Sergas.

b) Tramitación e arquivo de circulares e instrucións da consellería e do Sergas.

c) O estudo, preparación e tramitación dos expedientes da consellería, do Sergas e demais centros ou entidades dependentes dela, que teñan que levarse ao Consello da Xunta de Galicia e á Comisión de Secretarios Xerais, así como o traslado dos seus acordos.

d) O estudo, a tramitación e a formulación, se é o caso, de propostas de resolución de recursos ou reclamacións interpostos contra os actos e resolucións emanados dos distintos órganos da consellería ou do Sergas.

e) A tramitación e a coordinación das resolucións dos expedientes de reclamación de responsabilidade patrimonial, sen prexuízo das funcións encomendadas a outras unidades.

f) Actuacións de coordinación co seguro de responsabilidade patrimonial derivada de asistencia sanitaria.

g) Estudo e tramitación das resolucións relativas á apertura, traslado, transmisión, modificación ou peche das oficinas de farmacia e boticas anexas.

h) O estudo e a tramitación de convenios de colaboración nos cales interveña a Consellería de Sanidade ou o Servizo Galego de Saúde.

i) Coordinación en materia de políticas de prevención de riscos laborais, no ámbito da Consellería de Sanidade.

j) Informar as propostas de resolución dos expedientes disciplinarios do persoal facultativo estatutario.

k) Preparar compilacións das disposicións vixentes que afecten a consellería e propoñer refundicións e revisións dos textos legais.

l) En xeral, a elaboración de estudos xurídicos, resolucións, informes e demais asuntos, que por razón da súa competencia, lle sexan encomendados pola Secretaría Xeral.

2.2. Servizo de Réxime Interior.

Correspóndenlle as seguintes funcións:

a) Réxime interior da consellería, o rexistro e os arquivos xerais, xestión dos libros de rexistro e restantes funcións no relativo ás fundacións de interese galego sobre as que a consellería exerza o protectorado.

b) A coordinación da publicación no Diario Oficial de Galicia e demais diarios ou boletíns oficiais das disposicións ou actos ditados polos órganos da consellería e do Sergas.

c) A harmonización da organización e funcionamento dos servizos administrativos da consellería e do Sergas.

d) A proposta de iniciación e tramitación da resolución, se é o caso, dos expedientes disciplinarios do persoal con destino na consellería e no Sergas, con excepción do persoal facultativo estatutario.

e) A xestión do parque móbil da Consellería de Sanidade e do Servizo Galego de Saúde.

f) A xestión da subministración de material de oficina e imprenta, e consumibles informáticos, para as distintas unidades da consellería e do Servizo Galego de Saúde.

Artigo 7º.-A Subdirección Xeral de Aseguramento e Planificación Sanitaria.

1. É a unidade á que lle corresponden as funcións encomendadas á Secretaría Xeral en relación co aseguramento e coa planificación sanitaria, tarxeta sanitaria e acreditación persoal, desenvolvemento de sistemas e avaliación de tecnoloxías e protección radiolóxica.

2. Correspóndenlle a esta subdirección xeral a proposta dos criterios de planificación e as directrices de carácter xeral e o seguimento con respecto ás actividades de avaliacións de tecnoloxías desenvolvidas pola Fundación Escola Galega de Administración Sanitaria mediante a subscrición dos oportunos convenios coa Consellería de Sanidade e os organismos dependentes.

3. Contará con nivel orgánico de servizo coas seguintes unidades:

3.1. Servizo de Aseguramento:

Correspóndenlle as seguintes funcións:

a) As propostas de aseguramento sanitario.

b) A elaboración das propostas de ordenación das prestacións sanitarias e sociosanitarias.

c) As propostas de incorporación das prestacións sanitarias non financiadas polo Sistema Nacional de Saúde.

d) O aseguramento dos dereitos dos cidadáns, así como o seguimento do seu cumprimento.

e) As propostas dos criterios xerais para asegurar a equidade no acceso ás prestacións e servizos sanitarios.

f) A supervisión da equidade no funcionamento da lista de espera e da aplicación dos tempos de garantía, co obxecto de garantir os dereitos individuais dos pacientes.

g) A proposta de niveis de calidade de referencia para todos os dispositivos e prestacións da Rede Galega Sanitaria de Utilización Pública.

h) A xestión do procedemento de incorporación de novos procedementos, técnicas e outros medios sanitarios na Rede Galega de Atención Sanitaria de Utilización Pública.

i) A elaboración da proposta de metodoloxía e de criterios xerais de compra de servizos cos centros da Rede Galega de Atención Sanitaria de Utilización Pública.

j) A proposta de criterios xerais e de coordinación de actuacións sobre calidade, así como do cadro de mando de calidade asistencial.

k) A realización das enquisas de calidade percibida.

l) A análise das queixas e reclamacións sobre as prestacións sanitarias, no relativo ao aseguramento dos dereitos dos cidadáns.

3.2. Servizo de Planificación Sanitaria.

Correspóndenlle as seguintes funcións:

a) A elaboración da proposta do Plan de saúde e das accións prioritarias derivadas del, o seu seguimento, vixilancia e avaliación do cumprimento e dos resultados.

b) A análise das necesidades sanitarias da poboación, a elaboración de indicadores sanitarios necesarios para o desenvolvemento das funcións de planificación.

c) A elaboración da proposta de ordenación territorial sanitaria.

d) A proposta da metodoloxía e alcance dos programas estratéxicos e operativos.

e) O informe das solicitudes de autorización previa, de creación ou modificación de centros, servizos e establecementos sanitarios que resolva a Secretaría Xeral.

f) A proposta de planificación e desenvolvemento do programa sobre prácticas e ensinanzas sanitarias especializadas.

3.3. Servizo de Tarxeta Sanitaria e Acreditación Persoal.

Correspóndenlle as seguintes funcións:

a) A elaboración dos procedementos para garantir a acreditación do dereito á asistencia sanitaria dos cidadáns residentes na Comunidade Autónoma de Galicia.

b) A xestión do Sistema de Información Poboacional do Servizo Galego de Saúde, para identificación única de todos os usuarios do sistema, e desenvolvemento de novas funcionalidades que faciliten a interacción dinámica do cidadán coa administración sanitaria a través das novas canles de comunicación.

c) O deseño e a xestión dos documentos que acreditan o dereito á asistencia sanitaria pública como medio de acceso aos diferentes servizos sanitarios autentificando tanto a cidadáns como a profesionais sanitarios.

d) A proposta de estratexias para a integración de datos necesarios para a planificación de servizos, e o establecemento de medidas de coordinación para o mantemento do sistema de recursos vinculado á tarxeta sanitaria.

3.4. Servizo de Desenvolvemento de Sistemas e Avaliación de Tecnoloxías.

Correspóndelle as seguintes funcións:

a) A proposta dos criterios de planificación e das directrices de carácter xeral e o seguimento con respecto á Axencia de Avaliación de Tecnoloxías Sanitarias, desenvolvida pola Fundación Escola Galega de Administración Sanitaria mediante a subscrición dos oportunos convenios.

b) A detección e estudo das tecnoloxías sanitarias emerxentes.

c) A coordinación e realización de informes técnicos e estudos de avaliación sobre tecnoloxías sanitarias, así como dos sistemas organizativos en que se desenvolve a atención sanitaria, de acordo cos criterios de seguridade, eficacia, efectividade e eficiencia, e tendo en conta a súa valoración ética, clínica, económica e social.

d) O deseño de novas organizacións para a aplicación de alta tecnoloxía, así como as propostas de criterios de seguimento e avaliación das súas actividades.

e) Coordinar o deseño, elaboración e difusión de guías de práctica clínica e de recomendacións na aplicación das tecnoloxías sanitarias, propoñer sistemas de información dirixidos a obter os datos necesarios para a avaliación de tecnoloxías.

f) A promoción da investigación científica dirixida a mellorar a metodoloxía necesaria no ámbito da avaliación de tecnoloxías sanitarias.

g) Informar os plans e as propostas de novos recursos tecnolóxicos e de novos procedementos, técnicas e outros medios sanitarios, cando así se lle solicite.

3.5. Servizo de Protección Radiolóxica.

Sen prexuízo das competencias atribuídas á protección civil e a outras consellerías, correspóndenlle as seguintes funcións:

a) Establecer un sistema de validación e seguimento que permita determinar se o programa de garantía de calidade en radioterapia, medicina nuclear ou radiodiagnóstico se adecua aos obxectivos previstos, cumpre coas disposicións regulamentarias que lle sexan de aplicación e estea implantado de forma efectiva, para os efectos da súa certificación.

b) Seguimento e vixilancia de cada un dos criterios de calidade establecidos en radioterapia, medicina nuclear ou radiodiagnóstico e, máis especificamente, no programa de garantía de calidade. En caso de ser preciso, promover a realización de auditorías nos centros e propoñer medidas correctoras do equipamento, dos procedementos ou as actuacións inspectoras que correspondan.

c) Promover a mellora da calidade, eficiencia e efectividade do acto radiolóxico médico, así como evitar exposicións inadecuadas ou excesivas ás radiacións ionizantes, mediante disposicións tales como asesoría no ámbito da garantía de calidade ou a formación do persoal implicado, relativa á protección do paciente e aos programas de control e garantía de calidade.

d) Elaborar os criterios mínimos que garantan a seguridade, eficacia e eficiencia dos equipamentos das instalacións radiolóxicas, sen prexuízo das competencias do Consello de Seguridade Nuclear e outros organismos con autoridade na materia.

e) Elaborar o inventario de equipos radiolóxicos das instalacións de radiodiagnóstico, radioterapia e de medicina nuclear, e colaborar co Ministerio de Sanidade e Consumo na realización do Censo Nacional de Instalacións Radioactivas de Uso Médico.

f) Realizar estudos necesarios para que o Servizo Galego de Saúde lle propoña ao Ministerio de Sanidade e Consumo a actualización dos criterios de ordenación que, en relación coa protección radiolóxica, se aplicarán na autorización previa para a creación, ampliación e modificación de centros ou establecementos sanitarios.

Artigo 8º.-A Subdirección Xeral de Sistemas e Tecnoloxías de Información.

1. É a unidade á que lle corresponde a elaboración das propostas de estratexias para o deseño, normalización, mantemento e calidade dos sistemas e das tecnoloxías de información da Consellería de Sanidade e os seus organismos dependentes, así como a proposta dos mecanismos precisos para a adecuada dispoñibilidade da información no sistema sanitario, tanto no ámbito asistencial coma de xestión.

2. Correspóndelle ademais propoñer os procedementos de implantación e soporte relacionados coas tecnoloxías e sistemas de información da Consellería de Sanidade e dos órganos dependentes, as políticas e tecnoloxías en materia de sistemas, comunicacións, redes e seguridade informática, a estruturación dos contidos e os procedementos de xestión da infraestrutura da intranet e da extranet da consellería e do Sergas, a xestión de dominios e correo corporativo, definir a metodoloxía e procedementos de auditoría informática das áreas sanitarias, así como a organización dos procedementos para a obtención da sinatura electrónica dos profesionais que traballen para a administración sanitaria.

3. Contará con nivel orgánico de servizo, coas seguintes unidades:

3.1. Servizo de Análise de Sistemas de Información.

Correspóndenlle as seguintes funcións:

a) A análise das necesidades de información e de desenvolvemento de sistemas de información e informáticos.

b) A normalización da estrutura lóxica dos sistemas de información.

c) A análise das necesidades de modificación e de evolución conceptual dos sistemas de información.

d) A formación na utilización dos sistemas de información deseñados e na súa explotación, así como na interpretación da información.

3.2. Servizo de Tecnoloxías de Información e Infraestruturas Informáticas.

3.2.1. Correspóndenlle nas diversas áreas funcionais da Consellería de Sanidade e os órganos dependentes as funcións de elaboración de normativas e

procedementos técnicos para a integración da información relacionada coas correspondentes actividades e unidades, así como a xestión dos proxectos de tecnoloxías da información, o seu mantemento e evolución.

3.2.2. Correspóndenlle ademais as seguintes funcións na área de infraestruturas tecnolóxicas:

a) A xestión das redes de comunicacións da Consellería de Sanidade e o Servizo Galego de Saúde e a configuración, instalación e xestión do equipamento de comunicacións nas redes de área local e corporativa.

b) A proposta das políticas corporativas e a xestión da evolución da plataforma tecnolóxica en materia de hardware e software de base.

c) A xestión da operatividade das plataformas técnicas e do Centro de Procesos de Datos da Consellería de Sanidade, habilitando o mantemento preventivo e correctivo e o establecemento das políticas de seguridade física, lóxica, de dispoñibilidade e de backup dos sistemas informáticos.

d) Elaborar os procedementos de xestión da infraestrutura e contidos das publicacións da intranet e da extranet da consellería e do Sergas, así como a xestión de dominios e correo corporativo.

3.2.3. Correspóndenlle tamén as seguintes funcións na área de arquitecturas tecnolóxicas.

a) As propostas de planificación tecnolóxica en sistemas de información, a definición e actualización das metodoloxías, normativas e estándares tecnolóxicos a seguir polo conxunto da organización, así como a realización de auditorías para avaliar a súa aplicación.

b) A xestión do ciclo de vida de adquisición e desenvolvemento da tecnoloxía dos sistemas de información e a revisión do seu correcto cumprimento, definindo a arquitectura para cada un dos proxectos de desenvolvemento ou de adquisición de aplicacións informáticas.

c) A avaliación de ferramentas software corporativas e a aplicación da tecnoloxía da información en materia de sinatura electrónica.

3.2.4. Correspóndenlle ademais as seguintes funcións na área de soporte e implantación de tecnoloxías da información:

a) Definir e establecer as normas, estándares e procedementos en actividades de soporte e implantación de aplicacións e sistemas informáticos e asegurar o seu cumprimento para a obtención da calidade destes e da satisfacción dos usuarios impulsando os procesos de certificación en normas de aseguramento da calidade.

b) Definir a metodoloxía e procedementos de auditoría informática nas áreas sanitarias.

c) Xestionar e supervisar a actividade de soporte de aplicacións e sistemas informáticos nos seus distintos niveis de especialización.

d) Organizar, planificar e supervisar os procesos de implantación de tecnoloxías da información e coordinar ás unidades implicadas.

3.2.5. Correspóndenlle ademais as seguintes funcións na área de informática clínico-asistencial.

a) Xestión dos proxectos de tecnoloxías da información relacionados cos procesos clínicos.

b) Mantemento e evolución dos sistemas de información clínico-asistencial.

c) Coordinación dos grupos de traballo para a selección e evolución dos sistemas de información clínico-asistencial.

d) Elaboración de normativas e procedementos técnicos para a integración da información clínico-asistencial.

3.2.6. Correspóndenlle ademais as seguintes funcións nas áreas de informática económico-financeira, recursos humanos e de programas especiais:

a) Xestión dos proxectos de tecnoloxías da información relacionados cos sistemas de información económico-financeiros, recursos humanos e programas especiais.

b) Mantemento e evolución dos sistemas de información económico-financeiros, recursos humanos e programas especiais.

c) Coordinación dos grupos de traballo para a selección e evolución dos sistemas de información económico-financeiros, recursos humanos e programas especiais.

d) Elaboración de normativas e procedementos técnicos para a integración dos sistemas da información económico-financeiros, recursos humanos e programas especiais.

3.3. Servizo de Mantemento do Sistema de Información.

Correspóndenlle as seguintes funcións:

a) A revisión permanente da calidade dos sistemas de información e da súa explotación.

b) A definición dos niveis de acceso aos datos e dos procedementos de autorización dos permisos.

c) A detección das novas necesidades para a mellora e evolución dos sistemas existentes e a proposta das modificacións necesarias deles.

d) O desenvolvemento na Comunidade Autónoma das estatísticas sanitarias que se lle encomenden e a colaboración co Ministerio de Sanidade e Consumo na realización das estatísticas nacionais de establecementos con réxime de internado.

e) A estruturación de contidos na páxina da internet da consellería.

3.4. Servizo de codificación.

Correspóndenlle as seguintes funcións:

a) A proposta de sistemas de codificación para a súa utilización na Consellería de Sanidade e do Sergas.

b) A normalización dos sistemas de codificación utilizados na Consellería de Sanidade e no Sergas.

c) A xestión da calidade dos conxuntos mínimos básicos de datos.

d) A coordinación técnica das unidades e comisións de codificación.

Artigo 9º.-A Subdirección Xeral de Inspección de Servizos Sanitarios.

1. É a unidade á que lle corresponde a realización da inspección da xestión en todo o sistema sanitario galego, de acordo coas necesidades das autoridades sanitarias da consellería.

2. A Inspección de Servizos Sanitarios exercerase sobre todos os centros, servizos, establecementos e prestacións sanitarias de titularidade pública ou privada da Comunidade Autónoma de Galicia.

3. Correspóndenlle as seguintes funcións:

a) A elaboración do anteproxecto do Plan Anual de Inspección, o seu seguimento e avaliación.

b) Elaboración dos protocolos de actuación da inspección.

c) A programación, supervisión, control e coordinación das actividades da Inspección de Servizos Sanitarios da Consellería de Sanidade.

d) Coordinar as actuacións de inspección da xestión da garantía dos dereitos e deberes dos usuarios e pacientes.

e) Coordinar as actuacións de inspección da xestión das prestacións de asistencia sanitaria e da súa calidade.

f) Coordinar as actuacións de inspección da xestión en materia da prestación farmacéutica.

g) Coordinación, control e avaliación da instrución dos procedementos de responsabilidade patrimonial.

h) Coordinación da prestación da asistencia médico farmacéutica dos servizos de prevención de riscos laborais das empresas.

i) Coordinación, control e avaliación das actuacións de inspección no relativo a centros, servizos e establecementos sanitarios públicos e privados que desempeñen a súa actividade no ámbito da Comunidade Autónoma.

j) Coordinación, control e avaliación das actividades encomendadas á Inspección de Servizos Sanitarios pola lexislación vixente en materia de accidentes de traballo, enfermidades profesionais, incapacidade temporal, empresas colaboradoras coa Seguridade Social, mutuas de accidentes de traballo e enfermidades profesionais, caixas de urxencia e servizos de prevención de riscos laborais das empresas.

k) Coordinación, control, avaliación e proposta da acreditación de centros, establecementos e servizos sanitarios na Comunidade Autónoma de Galicia.

l) Realizar nos centros as auditorías do programa de garantía de calidade en materia de protección radiolóxica.

m) Emitir informe sobre as propostas de resolución dos procedementos disciplinarios de persoal sanitario.

n) Coordinar a inspección e control sanitarios da incapacidade temporal.

o) A análise e tramitación das queixas e reclamacións dos usuarios sobre centros e prestacións sanitarias, no relativo á función inspectora.

p) Aplicación, coordinación, seguimento e control do convenio subscrito pola Consellería de Sanidade co Instituto Nacional da Seguridade Social en materia de incapacidade temporal.

q) Coordinación do equipo auditor da Comunidade Autónoma de Galicia na realización de auditorías docentes de acreditación -MIR a hospitais e unidades docentes doutras comunidades autónomas, dentro do programa de colaboración co Ministerio de Sanidade e Consumo.

r) Coordinación e representación da comunidade autónoma nas auditorías docentes que enmarcadas no mesmo programa realizan na nosa Comunidade Autónoma equipos auditores doutras comunidades autónomas, nomeados polo Ministerio de Sanidade e Consumo, e informe á Secretaría Xeral dos resultados.

s) Coordinar as funcións de apoio que desenvolva a Inspección Central no ámbito da Comunidade Autónoma de Galicia.

4. Contará co nivel orgánico de servizo, coas seguintes unidades:

4.1. Servizo de Xestión Administrativa.

Correspóndenlle as seguintes funcións:

a) A xestión, coordinación e seguimento da adecuación normativa das actuacións administrativas da inspección.

b) A tramitación das propostas de resolución dos procedementos disciplinarios do persoal facultativo estatutario así como as propostas de resolución dos recursos contra as resolucións dos ditos procedementos.

c) Tramitar as propostas de resolución dos procedementos sancionadores a establecementos farmacéuticos.

d) As propostas de resolución que sexan competencia do secretario xeral e do conselleiro de Sanidade, derivadas das infraccións en materia de autorización de centros, servizos e establecementos sanitarios.

e) A realización de estudos, proxectos e informes da Inspección de Servizos Sanitarios.

4.2. Servizo de Rexistro de Autorización de Actividades e Centros Sanitarios.

Correspóndenlle as seguintes funcións:

a) Elaborar as propostas de resolución de autorización de funcionamento relativa a centros, servizos e establecementos sanitarios.

b) O rexistro de centros, servizos e establecementos sanitarios da comunidade autónoma.

c) O seguimento e a avaliación da publicidade sanitaria.

Artigo 10º.-A Subdirección Xeral de Documentación, Estudos e Informes.

1. É a unidade á que lle corresponde a emisión de informes e estudos, así como a organización, o mantemento e a divulgación do fondo documental da consellería e do Sergas e a coordinación e tramitación de publicacións no ámbito de competencias da Consellería de Sanidade e dos seus órganos dependentes.

2. Correspóndenlle ademais as funcións de coordinación, apoio e documentación nas relacións que, en materia sanitaria, mantén a consellería con outras administracións públicas e o Consello Interterritorial do Sistema Nacional da Saúde.

3. Contará, a nivel orgánico de servizo, coa seguinte unidade:

-Servizo de Documentación, Publicación e Estudos:

Correspóndenlle as seguintes funcións:

a) A organización, o mantemento e a divulgación do fondo documental da consellería e do Sergas e a coordinación e tramitación de publicacións no ámbito de competencias da Consellería de Sanidade e do Servizo Galego de Saúde.

b) A xestión da rede de bibliotecas biomédicas.

c) A adquisición centralizada dos recursos documentais dos servizos centrais da consellería e do Sergas.

d) A elaboración do plan editorial da consellería e do Sergas.

e) A elaboración da memoria anual da consellería e do Sergas.

f) A normalización das memorias dos centros e servizos sanitarios.

Artigo 11º.-A Dirección Xeral de Saúde Pública.

1. A Dirección Xeral de Saúde Pública é o órgano encargado da protección e promoción colectiva da saúde da poboación galega.

2. A súa misión é mellorar a saúde da poboación galega desde unha perspectiva comunitaria, identificando problemas de saúde, perigos para ela e as poboacións máis susceptibles; avaliando os riscos

dos problemas e perigos identificados; vixiando os problemas de saúde das poboacións e os perigos que as afectan; controlando e conseguindo diminuír eses riscos e o seu impacto na saúde das persoas e planificando actuacións para diminuír o risco de enfermar ou morrer prematuramente.

3. Correspóndenlle á Dirección Xeral de Saúde Pública, no marco da actuación sanitaria da Comunidade Autónoma de Galicia, as funcións dirixidas a:

a) Avaliar o estado de saúde da poboación galega e identificar os factores determinantes da saúde dos cidadáns galegos.

b) A vixilancia e a análise dos indicadores de morbilidade e mortalidade, e coordinación dos diferentes rexistros da competencia da dirección xeral.

c) Identificar os factores determinantes da saúde dos cidadáns galegos.

d) Diminuír o impacto dos factores de risco.

e) Aumentar o impacto dos factores protectores da saúde.

f) Desenvolvemento dos programas de promoción colectiva e protección da saúde na Comunidade Autónoma de Galicia.

g) Mellora da calidade da xestión dos servizos de saúde pública.

h) Desenvolvemento e xestión de programas de prevención individualizada de problemas de saúde con especial repercusión na Comunidade Autónoma de Galicia.

i) Desenvolvemento de actividades como autoridade competente en materia de saúde pública.

j) A oferta de servizos de saúde pública na procura da mellora do estado de saúde da poboación.

k) Actividades de control e coordinación da rede de laboratorios de saúde pública.

l) O exercicio da potestade sancionadora, nos termos previstos na lexislación vixente.

m) A emisión do informe vinculante ao que fai referencia a Lei 5/1995, de regulación das augas minerais, termais, de manancial e dos establecementos sanitarios.

4. A Dirección Xeral de Saúde Pública contará, para o cumprimento das ditas competencias, coa seguinte estrutura:

a) A Subdirección Xeral de Programas de Control de Riscos Ambientais para a Saúde.

b) A Subdirección Xeral de Información e Prevención e Control de Enfermidades.

5. Do director xeral dependerá directamente, con nivel orgánico de servizo, o Servizo de Coordinación e Calidade da Saúde Pública.

6. Intégrase organicamente na Dirección Xeral de Saúde Pública, con dependencia funcional directa

do conselleiro, o Comisionado do Plan de Galicia sobre Drogas, creado, e adscrito á Consellería de Sanidade polo Decreto 254/1997, do 10 de setembro.

Artigo 12º.-A Subdirección Xeral de Programas de Control de Riscos Ambientais para a Saúde.

1. Correspóndenlle á Subdirección Xeral de Programas de Control de Riscos Ambientais para a Saúde a aplicación e execución das directrices da dirección xeral en materia de planificación e coordinación operativa e auditoría dos programas que actúen sobre os factores determinantes da saúde dos galegos.

2. Cando os plans e programas incidan na rede asistencial do Servizo Galego de Saúde, a auditoría levarase a cabo en coordinación coa Inspección Sanitaria, de acordo coas funcións previstas no artigo 8º deste decreto e cos principios do Decreto 126/1992, do 19 de maio, sobre ordenación de funcións da Inspección de Servizos Sanitarios da Comunidade Autónoma de Galicia.

3. Para o cumprimento das súas funcións contará, con nivel orgánico de servizo, coas seguintes unidades:

3.1. Servizo de Seguridade Alimentaria.

Correspóndenlle as seguintes funcións:

a) A xestión dos rexistros dos factores de risco asociados ao consumo de alimentos.

b) A planificación, a programación, a avaliación e a xestión así como a difusión da información das actividades de protección da saúde da poboación da comunidade autónoma fronte aos factores de risco asociados ao consumo de alimentos.

c) A coordinación e o seguimento das actuacións no marco da rede de alerta alimentaria.

3.2. Servizo de Sanidade Ambiental.

Correspóndenlle as seguintes funcións:

a) A xestión dos rexistros dos factores de risco asociados ao medio ambiente específicos, entendendo por tales aqueles que, sendo distintos dos asociados ao consumo de alimentos, interactúan coas persoas dependendo de variables individuais, como a idade, o lugar de residencia e as actividades laborais e de tempo libre.

b) A planificación, a programación, a avaliación, a xestión, así como a difusión da información das actividades de protección da saúde da poboación da comunidade autónoma fronte aos riscos asociados ao ambiente específicos.

c) A proposta do informe vinculante ao que fai referencia a Lei 5/1995, de regulación das augas minerais, termais, de manancial e dos establecementos sanitarios.

3.3. Servizo de Inspección e Laboratorios de Saúde Pública:

Correspóndenlle as seguintes funcións:

a) A xestión, a coordinación e a auditoría dos sistemas de aseguramento da calidade da actividade inspectora de saúde pública.

b) A implantación da política de calidade establecida pola Dirección Xeral de Saúde Pública para os servizos de Inspección de Saúde Pública así como proporcionar os medios necesarios para a consecución dos obxectivos de calidade marcados.

c) A xestión, a coordinación e a auditoría dos sistemas de aseguramento da calidade dos laboratorios de saúde pública.

d) O deseño e a promoción dos programas de formación interna para o persoal dos servizos de inspección e dos laboratorios de saúde pública.

e) A tramitación dos procedementos administrativos derivados da actividade inspectora de saúde pública.

f) A tramitación da proposta de resolución dos expedientes sancionadores competencia da dirección xeral.

g) A tramitación dos expedientes sancionadores que resulten do Plan Nacional de Investigación de Residuos

h) As actuacións relacionadas coa coordinación e a xestión das taxas xeradas polas actividades de saúde pública.

i) Calquera outra actuación que lle encomende a Dirección Xeral de Saúde Pública en materia de coordinación dos servizos de inspección e dos laboratorios de saúde pública.

Artigo 13º.-A Subdirección Xeral de Información, Prevención e Control de Enfermidades.

1. Correspóndelle a esta subdirección a aplicación e a execución do Plan de Saúde baixo as directrices da dirección xeral en materia de identificación de problemas de saúde, avaliación dos riscos dos problemas e perigos identificados e dos programas ou procesos existentes para o seu control, xestión do sistema de información sobre saúde pública, actividade inspectora de saúde pública, mellora da calidade da xestión dos servizos de saúde pública, e a xestión de programas de cribaxe poboacional de determinados problemas de saúde individual.

2. Cando os plans e programas incidan na rede asistencial do Servizo Galego de Saúde, a auditoría levarase a cabo en coordinación coa Inspección de Servizos Sanitarios de acordo coas funcións previstas no artigo 8º deste decreto e cos principios do Decreto 126/1992, do 19 de maio, sobre ordenación de funcións da Inspección de Servizos Sanitarios da Comunidade Autónoma de Galicia.

3. Para o cumprimento das súas funcións contará, con nivel orgánico de servizo, coas seguintes unidades:

3.1. Servizo de Epidemioloxía:

Correspóndenlle as seguintes funcións:

a) A xestión dos sistemas de información de saúde pública.

b) A análise integral da información de saúde pública e a avaliación do estado de saúde da comunidade autónoma.

c) A difusión da información xerada nos sistemas de información de saúde pública.

d) Asesoramento e formación en materia de método epidemiolóxico.

e) Control de abrochos epidémicos, a coordinación e o seguimento do Sistema de Alerta Epidemiolóxica de Galicia.

f) A coordinación da organización de saúde pública con outras administracións ou entidades con funcións na materia.

3.2. Servizo de Prevención e Control das Enfermidades Transmisibles:

Correspóndenlle as seguintes funcións:

a) A elaboración e a coordinación da execución do Plan de Prevención e Control das Enfermidades Transmisibles.

b) A planificación e a xestión dos sistemas de información específicos das enfermidades transmisibles con plans de actuación propios.

c) A actualización e a coordinación da execución da estratexia de prevención e control da infección polo VIH/SIDA en Galicia.

d) A planificación, a xestión e a coordinación do Programa galego de vacinacións.

e) A planificación, a xestión e a coordinación do Plan de prevención e control da tuberculose en Galicia.

f) En xeral, a planificación, a programación, a avaliación e a auditoría dos sistemas de aseguramento da calidade e a difusión da información relacionada coa protección fronte ás enfermidades transmisibles.

3.3. Servizo de Prevención e Control de Enfermidades non Transmisibles:

Correspóndenlle as seguintes funcións:

a) A xestión dos rexistros dos factores psicosociais e hábitos de vida.

b) A planificación, a programación, a xestión, a avaliación, e a auditoría dos sistemas de aseguramento da calidade e difusión da información das actividades de promoción de hábitos de vida saudables.

c) Protección da saúde da poboación da comunidade autónoma fronte a factores psicosociais.

d) A planificación, a programación, a xestión, a avaliación, ae a auditoría dos sistemas de aseguramento da calidade e difusión da información das actividades de prevención e control das enfermidades non transmisibles.

3.4. Servizo de Programas Poboacionais de Cribado.

Correspóndenlle as seguintes funcións:

a) A xestión dos rexistros dos programas poboacionais de cribado.

b) A planificación, a programación, a xestión, a avaliación, e a auditoría dos sistemas de aseguramento da calidade e difusión da información dos programas poboacionais de cribado desenvolvidos na Comunidade Autónoma de Galicia.

Artigo 14º.-Servizo de Coordinación e Calidade da Saúde Pública.

Correspóndenlle as seguintes funcións:

a) A coordinación dos sistemas de xestión de programas e proxectos de saúde pública no relativo á súa comunicación externa e interna, á súa xestión económica e orzamentaria e ao deseño e produción das publicacións de saúde pública, sen prexuízo da competencia da Secretaría Xeral da consellería.

b) Coordinar o deseño, a execución, o control e a avaliación dos programas continuados de educación para a saúde no ensino.

c) Prestar o seu apoio, asesoramento e orientación en educación para a saúde a outras organizacións.

d) A coordinación e o deseño e a promoción dos programas de formación interna para o persoal da dirección xeral.

e) A xestión, o seguimento e o control dos plans de xestión de calidade e de acción de mellora organizativa que determine a dirección.

Artigo 15º.-Dirección Xeral de Farmacia e Produtos Sanitarios.

1. Á Dirección Xeral de Farmacia e Produtos Sanitarios correspóndelle o desenvolvemento e a coordinación da política autonómica en relación coa ordenación da prestación farmacéutica e da lexislación do Estado sobre produtos farmacéuticos regulada no Decreto 288/1997, do 9 de outubro, de acordo co Real decreto 1379/1997, do 29 de agosto, sobre traspaso de funcións e servizos da Administración do Estado á Comunidade Autónoma de Galicia en materia de execución da lexislación do Estado sobre produtos farmacéuticos.

2. Así mesmo é o órgano encargado de desenvolver programas orientados á racionalización do emprego dos recursos farmacoterapéuticos na prescrición, distribución e dispensación de medicamentos e produtos sanitarios, con criterios de efectividade, seguridade e custo, nos termos previstos na Lei 7/2003, do 9 de decembro, de ordenación sanitaria de Galicia.

3. Correspóndenlle tamén as propostas de desenvolvemento normativo da Lei 5/1999, do 21 de maio, de ordenación farmacéutica.

4. Correspóndenlle ademais as seguintes funcións:

a) Planificación, avaliación e control da prestación farmacéutica.

b) Análise da información do consumo de medicamentos na Rede Sanitaria de Utilización Pública.

c) Harmonización das propostas realizadas polas comisións técnicas de farmacia e terapéutica.

d) Execución e desenvolvemento de todas as actividades relacionadas coa farmacovixilancia e información farmacoterapéutica aos profesionais sanitarios e aos cidadáns.

e) O establecemento dos requisitos para a homologación sanitaria de medicamentos e produtos sanitarios.

f) Planificación, elaboración e actualización do mapa farmacéutico de Galicia, e as propostas de autorización de novas oficinas de farmacia, de acordo cos criterios que se establezan.

g) Planificación e informe das proposta de creación de servizos de farmacia e depósitos de medicamentos.

h) Informe, a pedimento da Secretaría Xeral, das propostas relativas a expedientes de farmacia e boticas anexas.

i) Propostas de incoación de procedementos sancionadores a establecementos farmacéuticos.

j) Propoñer a inclusión no plan anual de inspección de actividades en materia de farmacia, medicamentos e produtos sanitarios.

k) Autorizacións de uso de receitas oficiais do Servizo Galego de Saúde.

l) Adopción de medidas cautelares e comunicación das alertas sobre riscos relacionados cos medicamentos e produtos sanitarios de uso humano na nosa comunidade autónoma.

m) Definición dos criterios xerais para o desenvolvemento das actividades de atención farmacéutica na Rede Galega de Atención Sanitaria de Utilización Pública e centros previstos no artigo 31.2º, letras b) e c) da devandita lei.

5. Adscríbese á Dirección Xeral de Farmacia e Produtos Sanitarios, a Comisión Autonómica Central de Farmacia e Terapéutica, a Comisión de Produtos Sanitarios, o Comité Galego de Avaliación dos Medicamentos de Uso Compasivo, os comités asesores da utilización terapéutica da hormona do crecemento, da esclerose múltiple, do tratamento de pacientes con déficit de alfa-1-antitripsina e cantas comisións se puidesen crear referentes a medicamentos especiais destinados a patoloxías concretas.

6. Queda adscrito á Dirección Xeral de Farmacia e Produtos Sanitarios, en coordinación coa División

de Asistencia Sanitaria do Servizo Galego de Saúde, o Comité Ético de Investigación Clínica de Galicia.

7. Así mesmo, quedan adscritos tamén á Dirección Xeral de Farmacia e Produtos Sanitarios, o Centro de Información Farmacoterapéutica, e o Centro de Farmacovixilancia de Galicia.

8. Para o cumprimento das súas funcións, contará coa seguinte estrutura: Subdirección Xeral de Farmacia e Produtos Sanitarios.

Artigo 16º.-Subdirección Xeral de Farmacia e Produtos Sanitarios.

1. É o órgano encargado da realización de funcións de apoio ao director xeral de farmacia e produtos sanitarios, e da coordinación das comisións de farmacia e terapéutica e dos comités asesores de medicamentos e produtos sanitarios.

2. Así mesmo, é o órgano encargado da coordinación da atención farmacéutica nos programas de mantemento e deshabituación de pacientes drogodependentes que se leven a cabo na Comunidade Autónoma de acordo co Comisionado do Plan de Galicia sobre Drogas.

3. Correspóndelle realizar a proposta dos programas orientados a racionalizar os recursos farmacoterapéuticos e produtos sanitarios, e de avaliación da prestación farmacéutica, así como a relación cos colexios profesionais en materia de medicamentos e produtos sanitarios.

4. Para o desenvolvemento das súas funcións, contará con nivel orgánico de servizo coas seguintes unidades:

4.1. Servizo de Avaliación da Atención Farmacéutica:

O Servizo de Avaliación da Atención Farmacéutica desenvolverá as seguintes funcións:

a) Proposta de planificación e desenvolvemento de indicadores da prestación farmacéutica.

b) Seguimento e avaliación da utilización de medicamentos e produtos sanitarios na Rede Galega de Atención Sanitaria de Utilización Pública e centros previstos no artigo 31.2º, letras b) e c) da Lei 5/1999, do 21 de maio de ordenación farmacéutica.

c) Proposta de criterios para a homologación sanitaria de receitas oficiais do Servizo Galego de Saúde.

d) Seguimento e avaliación da execución do concerto da prestación farmacéutica coas oficinas de farmacia.

e) Propostas para o desenvolvemento, avaliación e mantemento dos sistemas de información relacionados coa prestación farmacéutica.

f) Coordinación de programas dirixidos a facilitar a prescrición e a dispensación electrónica.

4.2. Servizo de Ordenación Farmacéutica e Control do Medicamento.

O Servizo de Ordenación Farmacéutica e Control do Medicamento desenvolverá as seguintes funcións:

a) Proposta de planificación e actualización do mapa farmacéutico de Galicia.

b) Elaboración da planificación, informe e propostas nos expedientes de creación de servizos de farmacia e depósitos de medicamentos.

c) Informe, por solicitude da Secretaría Xeral, das propostas de autorización relativas á creación, apertura, modificación, traslado, cerramento e transmisión das oficinas de farmacia e boticas anexas.

d) Elaboración das propostas de autorización de novas oficinas de farmacia, de acordo cos criterios de planificación que se establezan.

e) Elaboración das propostas normativas en relación coa ordenación farmacéutica.

f) Xestión das autorizacións de uso de receitas oficiais do Servizo Galego de Saúde.

g) Realizar a proposta daqueles medicamentos que se van dispensar nas áreas sanitarias que, polas súas características, exixan unha particular vixilancia, supervisión e control do equipo multidisciplinario da atención á saúde.

h) Coordinación da rede de alerta sobre riscos relacionados cos medicamentos e produtos sanitarios de uso humano na nosa comunidade autónoma.

i) Proposta de accións inspectoras relacionadas co cumprimento de normas, boas prácticas e control de calidade de medicamentos, así como do control da publicidade e promoción de medicamentos.

j) Emitir informe previo á resolución de procedementos sancionadores a establecementos farmacéuticos.

4.3. Servizo de Produtos Sanitarios.

O Servizo de Produtos Sanitarios desenvolverá as seguintes funcións:

a) Proposta de especificacións técnicas mínimas para a adquisición dos produtos sanitarios polo Sergas e organismos adscritos á Consellería de Sanidade, garantindo a súa calidade, eficacia e seguridade.

b) Determinación dos criterios de utilización dos produtos sanitarios dispensables a través de receita oficial e das características técnicas mínimas daqueles produtos sanitarios que se utilizan nas áreas sanitarias e centros de asistencia social.

c) Desenvolvemento de protocolos de utilización e condicións de dispensación dos produtos dietéticos incluídos na prestación sanitaria, así como o seu seguimento e avaliación nas áreas sanitarias e centros de asistencia social.

d) Informe previo dos expedientes de autorización dos establecementos de fabricación a medida, de venda con adaptación individualizada, de distribución e venda de produtos sanitarios.

e) Proposta de accións inspectoras sobre produtos sanitarios e cosméticos.

Artigo 17º.-O Consello Galego de Saúde.

O Consello Galego de Saúde é o principal órgano colexiado de participación comunitaria no sistema sanitario de Galicia ao que lle corresponde o asesoramento á Consellería de Sanidade na formulación da política sanitaria e no control da súa execución. Sen prexuízo do seu desenvolvemento regulamentario, a súa composición e funcións son os establecidos polos artigos 121 e 122 da Losga.

Artigo 18º.-Consello Asesor do Sistema Sanitario de Galicia.

O Consello Asesor do Sistema Sanitario de Galicia é o órgano superior de consulta e asesoramento da Consellería de Sanidade. Sen prexuízo do seu desenvolvemento regulamentario, a súa composición e funcións son os establecidos polo artigo 129 da Losga.

Artigo 19º.-Outros órganos colexiados.

Así mesmo, están adscritos á Consellería de Sanidade, coa composición e funcións que sinalan as súas normas de creación, os seguintes órganos:

-A comisión de coordinación interconsellerías en materia de Drogodependencias.

-A comisión de coordinación interadministracións públicas en materia de Drogodependencias.

-A comisión de coordinación interadministración con organizacións non gobernamentais, en materia de drogodependencias.

-A comisión galega de autorización de laboratorios de ensaios de produtos alimenticios relacionados co consumo humano.

Capítulo II

Órganos periféricos

Artigo 20º.-As delegacións provinciais.

1. Para o exercicio das súas competencias, a Consellería de Sanidade organízase en catro delegacións provinciais, que desenvolven as súas funcións no ámbito territorial correspondente a cada unha das provincias da Comunidade Autónoma de Galicia.

2. Á fronte de cada delegación provincial existirá un delegado de que dependerán os servizos, unidades e centros da consellería que radiquen no ámbito territorial da súa competencia. Os delegados dependerán orgánica e funcionalmente do conselleiro, sen prexuízo das directrices que, na orde funcional, poidan emanar do secretario xeral e dos directores xerais da consellería.

3. Nos seus respectivos ámbitos territoriais, correspóndelles aos delegados provinciais o exercicio das seguintes competencias:

a) Exercer a representación oficial da consellería ante as autoridades, organismos e entidades.

b) Dirixir a xestión dos servizos da delegación e exercer a supervisión e seguimento das súas actividades, asumindo a plena representatividade deles.

c) Desempeñar a xefatura superior de persoal respecto dos servizos provinciais da consellería.

d) O exercicio da potestade disciplinaria do persoal dos servizos provinciais da consellería nos termos previstos na normativa reguladora.

e) Elaborar a proposta de dotacións orzamentarias da delegación que hai que incluír no anteproxecto de orzamentos da consellería.

f) A coordinación, execución e control dos plans e programas de actuación da consellería, tanto no ámbito da planificación e ordenación sanitaria, como de farmacia e saúde pública.

g) Incoar e tramitar os expedientes sancionadores derivados da comisión de infraccións administrativas no ámbito das súas competencias, e a resolución daqueles que lle atribúa a normativa vixente, así como acordar a suspensión temporal do exercicio de actividades, a incautación ou a inmobilización de produtos, a intervención de medios e outras de carácter cautelar, no ámbito da Losga, da normativa de ordenación farmacéutica e das normas sectoriais que resulten de aplicación.

h) A recepción, tramitación e resolución, se é o caso, de cantas denuncias, queixas e reclamacións se produzan no seu ámbito competencial.

i) As funcións encomendadas en materia de tramitación e proposta, polo Decreto 146/2001, do 7 de xuño, sobre planificación, apertura, traslado, cerramento e transmisión de oficinas de farmacia, e as tamén encomendadas polo Decreto 176/2001, do 12 de xullo, sobre creación, apertura e funcionamento dos servizos de farmacia e depósitos de medicamentos nas estruturas de atención primaria, así como as previstas pola Orde do 20 de novembro de 2001, pola que se establecen os requisitos e procedemento de autorización das boticas anexas.

j) As funcións que lle outorgan o Decreto 77/2001, do 29 de marzo, e demais normativa en materia de centros, servizos e establecementos sanitarios.

k) As funcións establecidas no Decreto 5/1987, do 14 de xaneiro, no Decreto 87/1990, do 15 de febreiro, e no Decreto 88/1990, do 15 de febreiro, así como calquera outra función ou atribución que a lexislación vixente lles confira ou lles sexan delegadas polo conselleiro.

l) As funcións que lle outorga o Decreto 97/1998, polo que se regula a publicidade sanitaria na Comunidade Autónoma de Galicia.

4. As delegacións provinciais da Consellería de Sanidade estarán integradas polas seguintes unidades administrativas:

-A Secretaría.

-Servizo de Aseguramento, Planificación e Ordenación Sanitaria.

-Servizo de Inspección Sanitaria.

-Servizo de Promoción da Saúde.

-Servizo de Protección da Saúde.

-Servizo de Laboratorio de Saúde Pública.

Artigo 21º.-A Secretaría da delegación.

A Secretaría, con nivel orgánico de servizo, é o órgano de xestión e coordinación dos servizos administrativos e de persoal da delegación, ao que lle corresponde o exercicio das seguintes funcións:

a) A asistencia técnica e administrativa ao delegado.

b) A coordinación administrativa do funcionamento dos servizos dependentes da delegación provincial.

c) A xestión do persoal que preste servizos na delegación.

d) Información previa e instrución de expedientes disciplinarios do persoal dos servizos provinciais da consellería nos termos previstos na normativa vixente.

e) As cuestións de réxime interior, información e atención ao cidadán, rexistro xeral, publicacións, documentación administrativa, arquivo e inventario.

f) A vixilancia e supervisión da organización e funcionamento dos servizos administrativos da consellería.

g) A iniciación e seguimento dos expedientes sancionadores en materia de sanidade ambiental e seguridade alimentaria, sen prexuízo das funcións atribuídas a outros órganos da Xunta de Galicia.

h) A xestión económica da delegación.

i) A administración, control e xustificación dos créditos orzamentarios asignados á delegación.

j) A habilitación dos medios materiais e de persoal da delegación.

k) A tramitación das queixas e reclamacións dos usuarios do sistema sanitario público presentadas na delegación.

l) Calquera outro asunto que non sexa función específica dos demais servizos da delegación.

m) Substituír o delegado provincial nos casos de enfermidade, ausencia ou vacante deste.

Artigo 22º.-Servizo de Aseguramento, Planificación e Ordenación Sanitaria.

Correspóndelle a este servizo as seguintes funcións:

a) A elaboración de indicadores, realización de estudos e demais accións necesarias para o proceso de planificación sanitaria.

b) A supervisión das enquisas de calidade percibida.

c) A realización do catálogo de procedementos.

d) A análise das queixas e reclamacións sobre as prestacións sanitarias, no relativo ao aseguramento dos dereitos dos cidadáns.

e) A tramitación e informe dos expedientes de autorización previa de creación e modificación dos centros, servizos e establecementos sanitarios, cuxa resolución corresponda á delegación provincial.

f) A tramitación e informe dos expedientes de autorización e funcionamento respecto dos centros, servizos e establecementos sanitarios que a súa resolución corresponda á delegación provincial.

g) Tramitación e proposta de resolución dos expedientes de apertura, traslado, modificación, peche e transmisión de oficinas de farmacia e boticas anexas.

h) Tramitar as iniciativas de creación de servizos de farmacia e depósitos de medicamentos.

i) A xestión da Unidade Provincial de Tarxeta Sanitaria.

j) Levar a cabo as accións oportunas para verificar as medidas adoptadas pola Dirección Xeral de Farmacia e Produtos Sanitarios como consecuencia das alertas sobre riscos relacionados cos medicamentos ou produtos sanitarios nos centros, establecementos e servizos sanitarios do seu ámbito de actuación.

k) A tramitación de expedientes e proposta de recoñecemento de interese sanitario para actos de carácter científico.

l) Aquelas que lle encomende o delegado provincial.

Artigo 23º.-Servizo de Inspección Sanitaria.

Ao Servizo de Inspección Sanitaria, con dependencia orgánica e funcional da Secretaría Xeral da Consellería de Sanidade, correspóndenlle as seguintes funcións:

a) Desenvolvemento do Plan Anual de Inspección, no seu ámbito territorial.

b) As actuacións de inspección da xestión da garantía dos dereitos e deberes dos usuarios e pacientes do sistema sanitario público galego, en especial no referente aos principios de equidade e calidade da asistencia.

c) Analizar e se é o caso emitir informe sobre as queixas e reclamacións dos usuarios sobre centros e prestacións sanitarias, no relativo á función inspectora, así como a inspección, a avaliación e o control da actividade levada a cabo por outros órganos da administración sanitaria en materia de queixas e reclamacións.

d) Inspección da xestión dos centros, servizos e establecementos tanto públicos como privados, e da asistencia sanitaria prestada por eles, no ámbito das súas competencias.

e) Inspección dos centros, servizos, e establecementos concertados e con autorización de uso, no referente ao cumprimento de requisitos e condicións do concerto, a súa organización e funcionamento, así como no relativo aos seus servizos e á atención e prestacións sanitarias.

f) Inspección da xestión e dos dispositivos de coordinación de urxencias e emerxencias na Comunidade Autónoma de Galicia, así como das prestacións sanitarias complementarias: transporte sanitario, ortopróteses, terapias respiratorias e prestacións dietoterápicas.

g) Realización das actividades inspectoras e a elaboración das propostas dos procedementos de autorización de funcionamento de centros, servizos e establecementos sanitarios.

h) Levar a cabo as auditorías e a acreditación dos centros, servizos e establecementos sanitarios.

i) Inspección da xestión da prestación farmacéutica respecto ao control dos establecementos, centros e servizos públicos, privados e concertados nos cales se preste atención farmacéutica á poboación.

j) A inspección da prestación farmacéutica e das receitas oficiais do Sistema Nacional de Saúde facturadas polos colexios farmacéuticos en execución do concerto para a prestación farmacéutica.

k) A inspección e o control da fabricación, distribución e venda de medicamentos e produtos sanitarios, as funcións de inspección derivadas da cooperación coa Axencia Española dos Medicamentos e Produtos Sanitarios.

l) A inspección dos sistemas de farmacovixilancia e dos estudos posteriores á autorización.

m) A inspección e o control dos medios de promoción utilizados na publicidade do medicamento.

n) Realizar nos centros as auditorías de garantía de calidade en protección radiolóxica.

o) Inspección, avaliación e control da asistencia sanitaria prestada polas empresas colaboradoras e polas mutuas de accidentes de traballo e enfermidades profesionais, e das súas instalacións e servizos, no ámbito das súas competencias.

p) Inspección, avaliación e control sanitario da incapacidade temporal.

q) Colaboración coas entidades xestoras en materia de saúde laboral e participación no equipo de valoración de incapacidades de acordo coa normativa vixente na materia.

r) Inspección, avaliación, e informe en relación cos aspectos sanitarios dos servizos de prevención de riscos laborais, así como para o control da prestación da asistencia sanitaria médico farmacéutica deles.

s) Instrucións do procedemento e elaboración dos informes técnico-sanitarios nos expedientes de responsabilidade patrimonial da administración sani

taria, así como a realización, se é o caso, de actividades de consultaría e asesoramento en relación con procedementos de reclamación, xurisdicional ou administrativa, contra a administración sanitaria.

t) Propostas de iniciación, instrución e propostas de resolución dos procedementos disciplinarios do persoal facultativo estatutario.

u) As informacións previas aos procedementos disciplinarios do persoal facultativo estatutario.

v) Instrución e proposta de resolucións dos procedementos sancionadores a establecementos farmacéuticos.

w) Inspección e informe das actividades de investigación, en especial as referidas aos ensaios clínicos.

x) Inspección e informe da docencia nos centros sanitarios, no relativo á docencia pregraduada, posgraduada e de formación continuada.

Artigo 24º.-Servizo de Promoción da Saúde.

Correspóndelle o exercicio das seguintes funcións:

a) A organización da execución dos programas de saúde pública e de vixilancia epidemiolóxica elaborados pola Dirección Xeral de Saúde Pública.

b) A coordinación e emisión de informes e avaliación dos programas e actividades encomendados.

c) Calquera outra función que lle sexa encomendada en materia de promoción da saúde, de programas e de vixilancia de saúde pública.

d) O control previo do gasto derivado da execución dos programas de saúde pública que se lle encomenden, acorde cos créditos que se lle atribúan.

e) Aquelas que lle encomende o delegado provincial.

Artigo 25º.-Servizo de Protección da Saúde.

Correspóndelle o exercicio das seguintes funcións:

a) A execución das disposicións ditadas en materia de protección da saúde.

b) A organización da execución dos programas de protección da saúde elaborados pola Dirección Xeral de Saúde Pública.

c) O seguimento dos cursos e programas de formación e información en materia de protección da saúde.

d) A coordinación e supervisión das inspeccións en materia de sanidade ambiental e seguridade alimentaria e en calquera outra materia relacionada coa protección da saúde na Comunidade Autónoma de Galicia.

e) A proposta de resolución dos expedientes sancionadores en materia de sanidade ambiental e seguridade alimentaria e en calquera outra materia relacionada coa protección da saúde na Comunidade Autónoma de Galicia.

f) A coordinación e a emisión de informes de avaliación dos programas e actividades encomendados.

g) O control e a supervisión das actividades que realice o persoal adscrito ao desenvolvemento de cada unha das actividades relacionadas coa sanidade ambiental e coa seguridade alimentaria e en calquera outra materia relacionada coa protección da saúde na Comunidade Autónoma de Galicia.

h) Calquera outra función que lle sexa encomendada en materia de sanidade ambiental e seguridade alimentaria e en calquera outra materia relacionada coa protección da saúde na Comunidade Autónoma de Galicia.

i) A tramitación dos expedientes administrativos de centros, establecementos ou servizos non sanitarios relacionados coa protección da saúde.

j) O control previo do gasto derivado da execución dos programas de saúde pública que se lle encomenden, acorde cos créditos que se lle atribúan.

k) Aquelas que lle encomende o delegado provincial.

Artigo 26º.-Servizo de Laboratorio de Saúde Pública.

Correspóndelle o exercicio das seguintes funcións:

a) A xestión e a coordinación das actividades realizadas polo laboratorio de saúde pública da delegación.

b) A execución das análises que se lle encomenden en materia de saúde pública.

c) O deseño e implantación dos programas de calidade no laboratorio.

d) O control e supervisión das actividades que realice o persoal adscrito ao laboratorio.

e) O control previo do gasto derivado da execución dos programas de saúde pública que se lle encomenden, acorde cos créditos que se lle atribúan.

f) Calquera outra actuación que se lle encomende por razón da idoneidade dos seus recursos.

Disposición adicional

Para o exercicio das funcións de supervisión e inspección en materia de riscos relacionados cos medicamentos ou produtos sanitarios, sanidade ambiental e seguridade alimentaria e nas materias relacionadas coa protección e promoción da saúde na Comunidade Autónoma de Galicia, o persoal da consellería ao que se lle encomenden estes labores terá a condición de axente da autoridade sanitaria para os efectos do artigo 137 da Lei 30/1992, do 26 de novembro, de réxime xurídico das administracións públicas e do procedemento administrativo común e, logo da acreditación da súa identidade, estará autorizado para realizar as actuacións establecidas no artigo 88 da Losga.

Disposicións transitorias

Primeira.-Mentres non se creen na Secretaría Xeral as unidades precisas para o desenvolvemento das

funcións que lle corresponden en materia económica e de persoal, as ditas funcións serán exercidas respectivamente polas correspondentes unidades das divisións de Recursos Económicos e de Recursos Humanos do Sergas.

Segunda.-Cando, como consecuencia da estrutura orgánica que se establece neste decreto, se modifique a denominación das distintas unidades administrativas existentes con anterioridade, se cree ou suprima algunha das devanditas unidades, autorízase o conselleiro de Sanidade, por proposta do secretario xeral, para adscribir o persoal afectado polo cambio de estrutura a postos do mesmo ou inferior nivel, sempre que sexan de libre designación, ou a readscribilo con carácter temporal a postos de igual ou inferior nivel, cando se trata de postos de provisión por concurso ata que, neste caso, os devanditos postos sexan cubertos da forma regulamentariamente establecida, sen que en ningún caso a readscrición ou adscrición supoñan cambio de residencia, todo isto sen prexuízo do disposto no artigo 62.4º da Lei 4/1988, do 26 de maio, da función pública de Galicia e na Lei 9/1997, do 12 de maio, de órganos de representación, determinación das condicións de traballo e participación do persoal ao

servizo das administracións públicas, así como das competencias que poida ter atribuídas nesta materia a Consellería da Presidencia, Relacións Institucionais e Administración Pública.

Terceira.-A Consellería de Sanidade, de conformidade co disposto no artigo 15.5º da Lei 4/1988, do 26 de maio, da función pública de Galicia, elaborará a proposta de relación de postos de traballo resultantes da aplicación deste decreto, efectuando a súa tramitación de acordo coa normativa vixente.

Cuarta.-Cando como consecuencia da estrutura orgánica que se establece neste decreto algunha das unidades administrativas existentes cambie a súa adscrición do Servizo Galego de Saúde á Consellería de Sanidade ou viceversa, ou dentro da mesma sección cambie de servizo, poderán continuar coa xestión dos créditos orzamentarios que teñan encomendados independentemente do orzamento de gastos onde se sitúen estes.

Disposición derrogatoria

Queda derrogado o Decreto 44/2002, que establece a estrutura orgánica da Consellería de Sanidade, así como cantas disposicións de igual ou inferior rango que se opoñan ao disposto neste decreto.

Disposicións derradeiras

Primeira.-A estrutura orgánica que se establece neste decreto non suporá aumento do gasto.

Segunda.-Facúltase o conselleiro de Sanidade para ditar cantas disposicións sexan necesarias para o desenvolvemento deste decreto.

Terceira.-Este decreto entrará en vigor o día seguinte ao da súa publicación no Diario Oficial

de Galicia, agás no relativo aos seus efectos económicos respecto dos cales a entrada en vigor se producirá o día 1 de marzo de 2005.

Santiago de Compostela, tres de febreiro de dous mil cinco.

Manuel Fraga Iribarne

Presidente

José Manuel González Álvarez

Conselleiro de Sanidade