A Comunidade Autónoma de Galicia, desde o 1 de xaneiro de 1998 e mediante o Decreto 289/1997, ten asumida a transferencia da xestión das distintas medidas activas de emprego e que, ata esa data, lle correspondía ao Inem, hoxe Servizo Público de Emprego Estatal.

Como consecuencia da nova estrutura orgánica da Xunta de Galicia, fixada por medio do Decreto 8/2003, do 18 de xaneiro, e en virtude do previsto polo Decreto 301/2004, do 22 de decembro, correspóndelle á Consellería de Asuntos Sociais, Emprego e Relacións Laborais a xestión das políticas activas de emprego, sendo a Dirección Xeral de Promoción do Emprego a que ten encomendada a correspondente aos programas de fomento do emprego, entre os que está o de obradoiros de emprego.

Establecidas polo Decreto 171/1999, do 27 de maio, as liñas básicas do antedito programa, faise preciso proceder ao seu desenvolvemento, xunto coa determinación das bases que regularán a convocatoria das correspondentes axudas e subvencións para 2005, seguindo as previsións contidas na normativa autonómica na materia (Decreto 287/2000 e texto refundido da Lei de réxime financeiro e orzamentario de Galicia, aprobado polo Decreto lexislativo 1/1999) así como polas directrices do Consello da Unión Europea sobre as políticas de emprego dos estados membros.

De conformidade co previsto no citado texto refundido, o financiamento, entre outras, das axudas e subvencións previstas nesta orde, realizaranse con cargo ás aplicacións orzamentarias 16.02.241-A.460.2 e 16.02.241-A.480.0 da Lei 13/2004, do 29 de decembro, de orzamentos xerais da Comunidade Autónoma de Galicia para o ano 2005.

Os ditos créditos poderán ser obxecto de modificación como consecuencia da asignación ou da redistribución de fondos para o financiamento dos programas de fomento do emprego, coas limitacións que establezan a Conferencia Sectorial de Asuntos Laborais ou as disposicións aplicables ás axudas e subvencións cofinanciadas polo Fondo Social Europeo.

Consecuentemente co exposto, informado o Comité Autonómico de Emprego, consultado o Consello Galego de Relacións Laborais, logo dos informes favorables da Asesoría Xurídica Xeral, Dirección Xeral de Planificación Económica e Fondos Comunitarios, Inspección Xeral de Servizos e Intervención Xeral da Comunidade Autónoma, e autorizada polo Consello da Xunta de Galicia, na súa sesión do vinte e oito de xaneiro de dous mil cinco, a concesión de anticipos e a forma de pagamento das axudas

e subvencións reguladas nesta orde así como o seu carácter plurianual; e no exercicio das facultades que teño conferidas polo artigo 34 da Lei 1/1983, do 22 de febreiro, reguladora da Xunta e do seu presidente

DISPOÑO:

Capítulo I

Disposicións xerais

Artigo 1º.-Obxecto.

Esta orde ten por obxecto o desenvolvemento do Decreto 171/1999, do 27 de maio, polo que se establece o programa de obradoiros de emprego na Comunidade Autónoma de Galicia xunto co establecemento das bases reguladoras da concesión, en réxime de concorrencia competitiva, de axudas e subvencións ao seu funcionamento pola Consellería de Asuntos Sociais, Emprego e Relacións Laborais. Así mesmo, e por medio da súa publicación, procédese á convocatoria das ditas axudas e subvencións para 2005.

Artigo 2º.-Beneficiarios do programa.

Poderán ser beneficiarios do programa de obradoiros de emprego os desempregados de ambos os sexos que, estando inscritos no Servizo Público de Emprego de Galicia, teñan vinte e cinco ou máis anos de idade, nos termos previstos no artigo 12º.3 desta orde.

Artigo 3º.-Beneficiarios da subvención: entidades promotoras.

1. Os proxectos de obradoiros de emprego poderán ser promovidos por:

a) Organismos autónomos e entes públicos da Comunidade Autónoma de Galicia.

b) Órganos, organismos autónomos e entes públicos da Administración xeral do Estado.

c) Entidades locais e os seus organismos autónomos, así como entidades públicas con competencias en materia de promoción do emprego, dependentes ou asimiladas a elas, cuxa titularidade corresponda integramente ás ditas entidades locais.

d) Consorcios.

e) Fundacións, asociacións e outras entidades sen ánimo de lucro.

2. As entidades promotoras deberán ser competentes para a execución das correspondentes obras ou servizos e dispoñer da capacidade técnica e de xestión suficientes para a realización dos proxectos.

Artigo 4º.-Duración.

1. Os obradoiros de emprego terán unha duración máxima dun ano.

2. Transcorrido o prazo de duración previsto na resolución de aprobación do proxecto, o obradoiro de emprego considerarase finalizado.

Artigo 5º.-Finalidade das actuacións.

1. As obras e servizos de utilidade pública ou de interese social que se desenvolvan con ocasión do funcionamento dun obradoiro de emprego deberán posibilitarlles aos alumnos-traballadores a realización dun traballo efectivo que, xunto coa formación profesional ocupacional recibida, que estará relacionada directamente co dito traballo, procure a súa cualificación profesional e favoreza a súa inserción laboral.

2. A programación dos obradoiros de emprego integrarase, na medida do posible e conforme os itinerarios de inserción profesional que se definan, en plans integrais de emprego que dean resposta ás demandas do mercado de traballo e sexan capaces de activar o desenvolvemento territorial, xerar riqueza e, consecuentemente, postos de traballo.

Capítulo II

Formación

Artigo 6º.-Formación.

Durante o desenvolvemento do proxecto, os alumnos-traballadores recibirán formación profesional ocupacional, segundo o plan formativo incluído na memoria exixida no artigo 18º letra i), en alternancia coa práctica profesional. A formación adecuarase, na medida do posible e en función do oficio ou posto de traballo que se vai desempeñar, aos contidos mínimos establecidos nos reais decretos que regulen os certificados de profesionalidade das correspondentes ocupacións, de acordo co establecido no punto 1º do artigo 3 do Real decreto 1506/2003, do 28 de novembro, polo que se establecen as directrices dos certificados de profesionalidade.

Artigo 7º.-Iniciación informática.

Coa finalidade de permitir o acceso dos alumnos-traballadores ás novas tecnoloxías da información e da comunicación, en todos os obradoiros de emprego será impartido un módulo de iniciación informática.

O contido do dito módulo, que terá unha duración mínima de trinta horas, incluirase dentro do plan formativo exixido no artigo 18º desta orde, de acordo cos contidos e tempo de impartición que, se é o caso, estableza a Dirección Xeral de Promoción do Emprego.

Artigo 8º.-Orientación, información profesional, formación empresarial e asistencia técnica.

1. Os alumnos-traballadores, durante todo o proceso formativo, recibirán orientación, asesoramento e información profesional e formación empresarial, para o que os obradoiros de emprego deberán contar co persoal e métodos axeitados.

2. Ao remate da actividade do obradoiro de emprego, as entidades promotoras prestaranlles asistencia técnica aos alumnos-traballadores participantes, tanto para a busca de emprego por conta allea como para o establecemento por conta propia. Para iso

actuarán, se é o caso, mediante as súas propias unidades ou organismos de orientación e asesoramento, en colaboración coa Consellería de Asuntos Sociais, Emprego e Relacións Laborais. No caso de existiren iniciativas emprendedoras de autoemprego, poderase promover a súa inclusión en viveiros de empresas ou en actuacións similares. Con esta finalidade, as entidades promotoras poderán solicitar á antedita consellería e a outras administracións públicas as axudas establecidas para os distintos programas de apoio á creación de emprego.

Artigo 9º.-Educación básica.

1. Para os alumnos-traballadores participantes que non alcanzasen os obxectivos da educación secundaria obrigatoria previstos na Lei orgánica 1/1990, do 3 de outubro, de ordenación xeral do sistema educativo, e de conformidade co disposto no seu artigo 23.2º, así como no artigo 11.2º letra e) do texto refundido da Lei do Estatuto dos traballadores, organizaranse, en colaboración coa Consellería de Educación e Ordenación Universitaria, programas específicos coa finalidade de proporcionarlles unha formación básica e profesional que lles permita incorporarse á vida activa ou proseguir os seus estudos nas distintas ensinanzas reguladas na antedita lei orgánica e, especialmente, mediante as probas de acceso previstas no seu artigo 32.1º.

2. O disposto no parágrafo anterior tamén será aplicable aos que non posúan o título de graduado escolar, por ter este os mesmos efectos profesionais ca o de graduado en educación secundaria, segundo establece a disposición adicional cuarta da referida lei orgánica.

Artigo 10º.-Certificacións e diplomas.

1. Finalizada a súa participación no obradoiro de emprego, os alumnos-traballadores recibirán un certificado expedido pola entidade promotora, nos termos recollidos no artigo 11.2º letra g) do texto refundido da Lei do Estatuto dos traballadores e no modelo que para o efecto estableza a Dirección Xeral de Promoción do Emprego, en que constará a duración en horas da súa participación no programa, así como o nivel de formación teórico-práctica adquirido e os módulos formativos cursados.

2. Este certificado poderá servir, total ou parcialmente, se é o caso, e logo dos requisitos que se determinen, para ser validado no seu momento polo certificado de profesionalidade previsto no Real decreto 1506/2003, do 28 de novembro, polo que se establecen as directrices dos certificados de profesionalidade.

3. A Consellería de Asuntos Sociais, Emprego e Relacións Laborais concederalles aos alumnos-traballadores participantes diplomas nos cales se recollerá a duración da súa participación no proxecto, de conformidade co modelo e as instrucións que estableza a Dirección Xeral de Promoción do Emprego.

Capítulo III

Selección e contratación

Artigo 11º.-Normas xerais: grupo de traballo mixto.

1. A selección dos alumnos-traballadores así como a do director, docentes e persoal de apoio, será realizada por un grupo de traballo mixto constituído para tal fin por persoal da Consellería de Asuntos Sociais, Emprego e Relacións Laborais e da entidade promotora. A presidencia do dito grupo recaerá no representante da consellería que para o efecto sexa designado pola respectiva delegación provincial.

2. A este grupo corresponderalle establecer os criterios de selección de todo o persoal do obradoiro de emprego, de acordo co previsto nesta orde e nas resolucións, circulares ou instrucións que poidan desenvolvela, procurando a maior adaptabilidade dos seleccionados ás ocupacións e ás particulares circunstancias de dificultade destas.

3. Finalizados os procedementos selectivos, o grupo de traballo mixto preparará a relación dos seleccionados como alumnos-traballadores, persoal directivo, docente e de apoio, estendendo acta, por duplicado exemplar, de todo o actuado e remitiralle un exemplar á entidade promotora para o seu cumprimento e outro á delegación provincial da Consellería de Asuntos Sociais, Emprego e Relacións Laborais.

Artigo 12º.-Procedemento de selección dos alumnos-traballadores.

1. Para a selección dos alumnos-traballadores, o grupo de traballo mixto determinará o perfil dos candidatos, os baremos e probas que poidan aplicarse, se é o caso, e os requisitos mínimos que aqueles deben cumprir, con suxeición ao previsto nos puntos seguintes.

2. En todo caso, a selección irá precedida da tramitación de oferta de emprego pola correspondente oficina de emprego, debendo esta observar, como requisitos mínimos que deben cumprir os candidatos preseleccionados, os de:

-Idade: teren vinte e cinco ou máis anos de idade.

-Desemprego: estaren desempregados, entendéndose nesta situación os demandantes de emprego rexistrados no Servizo Público de Emprego de Galicia que carezan de ocupación remunerada e estean dispoñibles para o emprego.

-Contratación: cumpriren os requisitos establecidos na normativa reguladora do contrato para a formación, co obxecto de estaren vinculados ao proxecto mediante un contrato das ditas características, durante toda a duración do proxecto, segundo o disposto no artigo 14º desta orde.

3. Terán preferencia para participar no programa de obradoiros de emprego os desempregados que, reunindo os requisitos xerais antes establecidos, teñan especiais dificultades de inserción no mercado de traballo, tales como os beneficiarios do Programa Labora, as mulleres en xeral, as beneficiarias do Programa de fomento da inserción laboral das mulle

res vítimas de violencia doméstica, os parados de longa duración, os maiores de corenta e cinco anos, as persoas con discapacidade, sempre que poidan realizar os traballos e os pertencentes a colectivos desfavorecidos ou en risco de exclusión social, especialmente, beneficiarios da renda de integración social de Galicia.

4. O grupo de traballo mixto practicará a selección de entre as relacións de desempregados confeccionadas pola oficina de emprego, que deberán conter, no posible, tres candidatos por posto.

5. Os alumnos-traballadores seleccionados deberán manter o cumprimento dos requisitos de selección na data da súa incorporación ao proxecto.

Artigo 13º.-Procedemento de selección do director, docentes e persoal de apoio.

1. Na selección do director, persoal docente e de apoio, o grupo de traballo mixto establecerá o procedemento selectivo, podendo utilizar oferta de emprego tramitada pola oficina de emprego, convocatoria pública ou ambas.

2. Tamén corresponderalle ao grupo de traballo mixto:

-Determinar o perfil, as características e os requisitos que deben cumprir os candidatos.

-Elaborar as convocatorias.

-Establecer os baremos e, se é o caso, as probas que poidan aplicarse.

-Preparar as ofertas de emprego que se tramitarán á oficina de emprego, se procedese.

-Difundir as convocatorias a través dos medios de comunicación que se determinen, se é o caso.

3. A selección definitiva deberase realizar entre os preseleccionados pola oficina de emprego e as solicitudes presentadas á convocatoria pública, se é o caso, debendo considerar, na medida do posible, tres candidatos por posto.

Artigo 14º.-Contratación dos alumnos-traballadores e do persoal directivo, docente e de apoio.

1. Desde o inicio da súa participación no obradoiro de emprego, os seleccionados como alumnos-traballadores, segundo as actas do grupo de traballo mixto, serán contratados pola entidade promotora na modalidade do contrato para a formación, polo que deberán reunir, para formalizar o dito contrato, os requisitos establecidos no artigo 11.2º do texto refundido da Lei do Estatuto dos traballadores, aprobado polo Real decreto lexislativo 1/1995, do 24 de marzo, segundo a redacción dada pola Lei 12/2001, do 9 de xullo, de medidas urxentes de reforma do mercado de traballo e a mellora da súa calidade, e nas súas normas de desenvolvemento.

2. Os alumnos-traballadores percibirán as retribucións salariais que lles correspondan de conformidade coa normativa aplicable e con esta orde, e a duración dos seus contratos de traballo non pode

rá exceder da data de remate do obradoiro de emprego.

3. Así mesmo, a entidade promotora contratará o persoal directivo, docente e de apoio que fose seleccionado e figure como tal nas actas do grupo de traballo mixto.

4. Os contratos de traballo formalizaranse por escrito no modelo oficial correspondente, debendo facerse constar a súa pertenza ao programa de obradoiros de emprego, a denominación do obradoiro de emprego para o que se formaliza e, se é o caso, o número da oferta de emprego utilizada. Serán rexistrados na oficina de emprego, indicando a súa pertenza ao dito programa co indicador xenérico de grupo E. Ademais, cada contrato deberá codificarse coa clave E01, para alumno-traballador participante, e E02 para persoal directivo, docente e de apoio.

Artigo 15º.-Baixas.

1. De producirse a baixa dalgún alumno-traballador, poderá ser substituído por outro sempre que este teña unha base formativa suficiente para continuar o proceso formativo no que consiste o proxecto, non podendo exceder a data de finalización do novo contrato da de remate do obradoiro de emprego.

2. A selección dos alumnos-traballadores para a cobertura das vacantes que se produzan, ao igual ca a do persoal directivo, docente e de apoio que se contrate unha vez iniciado o proxecto, efectuarase polo procedemento que determine o grupo de traballo mixto para cubrir baixas, respectando, en todo caso, os trámites e requisitos establecidos nesta orde.

Artigo 16º.-Incidencias e reclamacións.

1. As incidencias e reclamacións que se puidesen suscitar, derivadas dos procesos de selección, serán resoltas polo grupo de traballo mixto, sen que caiba ulterior recurso en vía administrativa.

2. Calquera que sexa o sistema de selección utilizado, seguiranse os criterios e procedementos establecidos polo Servizo Público de Emprego para a cobertura de ofertas de emprego, polo que non será de aplicación a normativa establecida para os procedementos de selección do persoal das distintas administracións públicas aínda cando a entidade promotora sexa un organismo público. Neste último caso, o persoal e alumnos-traballadores seleccionados non se considerarán incluídos nos correspondentes cadros de persoal ou relacións de postos de traballo, polo que non será precisa oferta de emprego público previa.

Capítulo IV

Procedemento para a concesión de subvencións

Artigo 17º.-Solicitudes. Prazo de presentación.

1. As entidades que estando previstas no artigo 3º, desexen promover un proxecto de obradoiro de emprego e obter as axudas e subvencións establecidas nesta orde, deberán formalizar a correspondente solicitude, por exemplar duplicado, de conformidade co disposto no artigo 70 da Lei 30/1992, do 26 de novembro, de réxime xurídico das admi

nistracións públicas e do procedemento administrativo común, no modelo que se publica como anexo I, que estará ao seu dispor nas oficinas de emprego e nas delegacións provinciais e servizos centrais da Consellería de Asuntos Sociais, Emprego e Relacións Laborais, subscrita polo seu representante legal, xunto coa documentación sinalada no artigo seguinte.

2. As solicitudes dirixiranse ás delegacións provinciais da Consellería de Asuntos Sociais, Emprego e Relacións Laborais e presentaranse por calquera das formas previstas no artigo 38.4º da Lei 30/1992, do 26 de novembro.

3. O prazo de presentación de solicitudes para a obtención das axudas e subvencións reguladas por esta orde, tendo en consideración o previsto no artigo 21º.2, rematará o 15 de xullo.

Artigo 18º.-Documentación.

Xunto coa solicitude, a documentación que se presentará, sempre por duplicado exemplar e en orixinais ou en copias compulsadas, será a seguinte:

a) A que acredite a personalidade xurídica da entidade solicitante, tendo en conta que:

-Se é un órgano da Administración xeral do Estado, ente público desta ou da Administración da Comunidade Autónoma de Galicia, organismo autónomo estatal, autonómico ou local, mancomunidade, consorcio ou algunha das entidades con competencias en materia de promoción do emprego ás que alude o artigo 3º.1 letra c), deberá achegarse, segundo proceda, norma ou acordo de creación ou estatutos publicados no diario oficial correspondente, podendo substituírse por unha certificación expedida para tal efecto.

-Se é unha fundación, asociación ou outra entidade sen ánimo de lucro, achegarase, segundo proceda, escritura pública de constitución ou acta fundacional outorgada en documento público ou privado, así como os seus estatutos debidamente inscritos no rexistro correspondente, que acrediten a súa condición de entidade sen ánimo de lucro.

b) Tarxeta de identificación fiscal.

c) A que acredite a personalidade e o apoderamento suficiente e subsistente de quen actúa en nome e representación da entidade solicitante. Esta circunstancia farase constar mediante copia da norma ou acordo de nomeamento publicada no correspondente diario oficial ou mediante certificación expedida para o efecto.

d) As entidades locais, os seus organismos autónomos e as entidades con competencias en materia de promoción do emprego ás que alude o inciso final do artigo 3º.1, letra c), deberán achegar certificación expedida polo secretario, na cal se recolla o acordo de aprobación do proxecto de obradoiro de emprego e de solicitude de subvención á Consellería de Asuntos Sociais, Emprego e Relacións Laborais, adoptado polo órgano competente.

As demais entidades solicitantes deberán achegar a documentación que acredite que os seus órganos de goberno ou administración aprobaron o proxecto e a solicitude de subvención á Consellería de Asuntos Sociais, Emprego e Relacións Laborais.

e) A que acredite a titularidade xurídica de cada un dos obxectos de actuación e a súa dispoñibilidade para realizar as obras ou a prestación dos servizos previstos no proxecto. No caso de titularidade privada, documento de cesión para o seu uso público por un período de tempo non inferior a vinte e cinco anos.

Non será necesaria a achega do documento de cesión cando o titular dos bens sexa unha das entidades sinaladas no artigo 3º.1 desta orde ou así o estime a Consellería de Asuntos Sociais, Emprego e Relacións Laborais polo carácter social da obra ou servizo que se vai realizar ou prestar. Nestes casos, será suficiente unha autorización por escrito dos titulares para a actuación do obradoiro de emprego.

f) As autorizacións administrativas que sexan exixibles atendendo á natureza xurídica e ao réxime de protección dos obxectos sobre os que se pretende actuar con ocasión do desenvolvemento do obradoiro de emprego. De non ser necesarias, achegarase certificación en tal sentido.

g) Declaración do representante legal en que se recolla o conxunto de todas as axudas ou subvencións solicitadas ou concedidas para a mesma finalidade polas distintas administracións públicas competentes ou entes públicos nacionais ou internacionais, segundo o modelo que se xunta como anexo II.

h) Certificado en que consten as fontes de financiamento da parte do custo do proxecto que non sexa subvencionada pola Consellería de Asuntos Sociais, Emprego e Relacións Laborais.

i) Proxecto para o que se solicita a subvención e que, como mínimo, constará dunha memoria, segundo o modelo que se publica como anexo III, en que se recollerán os seguintes aspectos:

-Descrición detallada da obra ou servizo que se vai realizar ou prestar, indicando o destino previsto para a súa utilización posterior. No caso de que a obra que se vai executar o requira, achegarase proxecto básico asinado por técnico competente. O dito proxecto básico constará, cando menos, de memoria descritiva, planos xerais e orzamento con estimación global por capítulos.

-Plan formativo do obradoiro de emprego por especialidades en relación co proxecto de obra ou servizo que se vai desenvolver, de xeito que se estableza a correspondencia entre o plan formativo por especialidades e as unidades de obra ou servizos. Os itinerarios formativos adecuaranse, na medida do posible, ao establecido nos reais decretos dos correspondentes certificados de profesionalidade ou, no seu defecto, especificaranse os módulos formativos da ocupación, indicando o número de horas e os seus contidos teórico-prácticos.

-Cada itinerario formativo deberá incluír a denominación dos módulos que o integran e a súa duración, o obxectivo xeral do módulo e os contidos teórico-prácticos.

-Orzamento e financiamento do proxecto, detallado segundo o disposto no artigo seguinte.

-Datas previstas de comezo e finalización da actividade do obradoiro de emprego e de cada unha das fases ou períodos en que se divide.

-Informe sobre as estratexias de desenvolvemento e perspectivas de emprego, con inclusión das previsións, o máis concretas posibles, de inserción laboral dos alumnos-traballadores ao remate da súa participación no obradoiro de emprego.

Artigo 19º.-Contido do orzamento.

Para os efectos do previsto na letra i) do artigo anterior, o orzamento do proxecto presentarase subdividido en:

1. Orzamento de gastos: periodificado por fases ou períodos non superiores a seis meses, tendo en consideración que no caso de obradoiros de emprego que teñan unha duración superior a seis meses e inferior a doce, a primeira fase será de seis meses e a segunda do resto. O orzamento presentarase segundo o seguinte detalle:

a) Custos máximos totais derivados da contratación do persoal directivo, docente, administrativo ou de apoio e dos alumnos-traballadores.

b) Custos máximos totais derivados do funcionamento e da xestión do obradoiro de emprego:

-Medios e materiais didácticos e de consumo para a formación.

-Amortización de instalacións e equipamento. Cando a entidade promotora achegue, para o desenvolvemento do proxecto, bens (equipos e instalacións) amortizables, xuntarase relación valorada destes, incluíndo as cotas de amortización que deriven da aplicación das táboas de coeficientes de amortización anualmente establecidas.

-Viaxes dos alumnos-traballadores para a súa formación.

-Material de oficina.

-Aluguer de instalacións, maquinaria e equipos, excluído o leasing.

-Gastos xerais.

-Se é o caso, o importe da póliza de responsabilidade civil para facer fronte aos riscos que para os bens e as persoas poidan derivar da actuación profesional do persoal do obradoiro de emprego durante todo o funcionamento do proxecto.

-Outros gastos de funcionamento necesarios para o desenvolvemento do proxecto.

2. Orzamento de ingresos: expresará a parte financiada pola entidade promotora e por outros posibles organismos ou entidades colaboradoras, así como a parte para a que se solicita financiamento á Con

sellería de Asuntos Sociais, Emprego e Relacións Laborais. De ser o caso, tamén se farán constar os posibles ingresos previstos como consecuencia, e sempre que se cumpra o establecido no artigo 30º, do alleamento de bens producidos ou servizos prestados polo obradoiro de emprego.

Artigo 20º.-Emenda.

No suposto de que a solicitude non cumpra os requisitos exixidos ou a documentación achegada contivese erros ou fose insuficiente, a delegación provincial da Consellería de Asuntos Sociais, Emprego e Relacións Laborais, competente por razón do territorio para a instrución do expediente, requirirá a solicitante para que, no prazo de dez días hábiles, emende a falta ou achegue os documentos preceptivos, con indicación de que se así non o fixese, se lle considerará desistida da súa petición, logo da correspondente resolución, de conformidade co estipulado no artigo 71 da Lei 30/1992, do 26 de novembro.

Artigo 21º.-Avaliación de solicitudes. Comisión Central de Valoración.

1. Os expedientes, unha vez completos, serán remitidos, no prazo de quince días, xunto co informe técnico emitido pola delegación provincial, no modelo que para o efecto estableza a Dirección Xeral de Promoción do Emprego, á comisión central de valoración, para o seu estudo e proposta de resolución.

2. Con carácter xeral, a avaliación dos ditos expedientes pola referida comisión, terá lugar en dúas fases:

a) Para os recibidos ata o día 15 de marzo: na segunda quincena do dito mes.

b) Para os recibidos ata o día 15 de xullo: no mes de setembro.

3. Aquelas solicitudes das cales na primeira fase de concesión non se formulase proposta de resolución, non se considerarán expresamente desestimadas e poderán ser obxecto de ulterior avaliación na seguinte fase.

4. A comisión central de valoración estará composta polo director xeral de Promoción do Emprego, que a presidirá; e serán vogais os catro delegados provinciais da Consellería de Asuntos Sociais, Emprego e Relacións Laborais, actuando como secretario, con voz pero sen voto, o subdirector xeral de Escolas Obradoiro e Programas de Cooperación.

5. Cando a comisión central de valoración propoña unha variación do número de alumnos ou do tempo de duración solicitados, a entidade promotora, no prazo de quince días, deberá realizar os axustes e modificacións pertinentes no proxecto presentado, para os efectos da súa aprobación segundo o previsto no artigo 23º.1.

Artigo 22º.-Criterios de valoración dos proxectos.

1. Na valoración dos proxectos teranse en consideración os seguintes criterios:

a) Número de desempregados de vinte e cinco ou máis anos de idade existentes no ámbito territorial en que se desenvolva o proxecto.

b) Perspectivas de emprego do colectivo participante, especialmente para a creación de maior número de postos de traballo estables.

c) Adaptabilidade do proxecto para a participación dos colectivos sinalados como preferentes polo Servizo Público de Emprego de Galicia, de acordo co que establezan as directrices de emprego europeas, no marco da Estratexia europea de emprego e do Plan Nacional de Acción para o Emprego.

d) Carácter innovador do proxecto, tendo en consideración a súa incidencia en novos viveiros de emprego como:

-Servizos de utilidade colectiva: rehabilitación do patrimonio artístico, histórico, cultural ou natural, revalorización de espazos públicos e urbanos, xestión de residuos, xestión de augas, protección e mantemento de zonas naturais e aqueles que incidan directa ou indirectamente no control da enerxía.

-Servizos de ocio e culturais: promoción do turismo e desenvolvemento cultural e local.

-Servizos personalizados de carácter cotián: coidado de nenos, prestación de servizos a domicilio a persoas discapacitadas ou maiores, axuda a mozos en dificultades e/ou con desarraigamento social.

e) Calidade do proxecto, atendendo ás actuacións que se van realizar e á súa adecuación para a cualificación e adquisición de experiencia profesional dos alumnos-traballadores e dos beneficios sociais que se prevexa xerar.

f) Calidade do plan formativo e a súa adecuación entre as especialidades propostas e as ocupacións máis ofertadas no mercado de traballo.

g) Ámbito de actuación superior ao municipal e que implique, no seu deseño, financiamento e execución, a outras entidades locais do contorno.

h) Achegas da entidade promotora ou doutras entidades colaboradoras, especialmente cando estas achegas diminúan a subvención que poida conceder a Consellería de Asuntos Sociais, Emprego e Relacións Laborais. Para tal efecto, terase en conta o esforzo investidor en cada caso.

i) Resultados cualitativos e cuantitativos de anteriores proxectos de obradoiros de emprego, escolas obradoiro ou casas de oficios promovidos pola entidade solicitante e, en concreto:

-Inserción dos participantes no mercado laboral.

-Formación e experiencia profesional adquirida.

-Resultado socioeconómico derivado da realización de proxectos de utilidade pública e social acollidos a esta orde e á reguladora do programa de escolas obradoiro e casas de oficios.

j) Participación dos axentes económicos e sociais con presenza no territorio na elaboración do contido e posterior desenvolvemento do proxecto ou cando estivese vinculado ou xurdise en aplicación dun pacto local ou territorial de emprego.

Artigo 23º.-Resolución.

1. Dentro dos nove meses seguintes á entrada da solicitude no rexistro do órgano competente para a súa tramitación, cumpridos os trámites previstos no artigo 21º e fiscalizada a proposta de resolución pola respectiva Intervención, o/a delegado/a provincial, por delegación da conselleira de Asuntos Sociais, Emprego e Relacións Laborais, ditará e notificaralle á entidade solicitante a resolución que proceda.

2. A resolución favorable conterá, como mínimo, os seguintes extremos:

a) Finalidade e obxectivos básicos do proxecto, especialidades que se impartirán, número e, se é o caso, características dos beneficiarios.

b) Subvención outorgada con cargo aos orzamentos da Consellería de Asuntos Sociais, Emprego e Relacións Laborais para o financiamento dos custos sinalados no artigo 25º, debendo facerse constar que o seu importe ten o carácter de estimado.

c) Duración do obradoiro de emprego e datas previstas para o seu comezo e para cada unha das súas fases.

d) Referencia a que a Unión Europea, a través do Fondo Social Europeo, e mediante o Programa Operativo de Obxectivo 1 nº 2000ES051PO017 que configura o Marco Comunitario de Apoio 2000/2006, cofinancia a subvención concedida ao obradoiro de emprego nunha porcentaxe equivalente ao 65% da totalidade dos gastos de formación e funcionamento e custos salariais dos alumnos-traballadores.

e) Calquera outra especificación que se estime oportuna en cada caso concreto.

3. Transcorrido o prazo de nove meses sen que se notificase a resolución expresa, a entidade solicitante poderá entender desestimada a súa solicitude, de acordo co disposto no artigo 2 da Lei 6/2001, do 29 de xuño, de adecuación da normativa da Comunidade Autónoma de Galicia á Lei 4/1999, do 13 de xaneiro, de modificación da Lei 30/1992, do 26 de novembro, de réxime xurídico das administracións públicas e do procedemento administrativo común.

4. Sen prexuízo do previsto no artigo 38º desta orde, toda alteración das condicións tidas en conta para a concesión da axuda ou subvención e, en todo caso, a obtención concorrente de subvencións ou axudas outorgadas por outras administracións ou entes públicos ou privados, nacionais ou internacionais, poderá dar lugar á modificación da resolución de concesión.

5. As resolucións dos expedientes instruídos ao abeiro do disposto nesta orde esgotan a vía administrativa, polo que, de conformidade co previsto no artigo 46 da Lei 29/1998, do 13 de xullo, reguladora da xurisdición contencioso-administrativa, contra elas poderá interpoñerse recurso contencioso-administrativo perante o órgano xurisdicional competente, no prazo de dous meses contados desde o día seguinte ao da súa notificación, se fose expresa; se non o fose, o prazo será de seis meses e contarase,

para a solicitante e outros posibles interesados, a partir do día seguinte a aquel en que se produza o acto presunto.

Malia o anterior, cando a recorrente sexa Administración pública, poderá facer uso do requirimento previo ao que alude o artigo 44 da antedita Lei 29/1998.

Potestativamente, de non ser a entidade solicitante Administración pública, con anterioridade á interposición do recurso contencioso-administrativo, de conformidade co previsto nos artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común, poderá interpoñerse recurso de reposición ante o mesmo órgano que ditou o acto, no prazo dun mes, se o dito acto fose expreso; se non o fose, o prazo será de tres meses e contarase, para a solicitante e outros posibles interesados, a partir do día seguinte a aquel en que se produza o acto presunto.

Todo isto sen prexuízo da interposición de calquera outro recurso que se considere oportuno para a defensa dos dereitos e intereses das entidades solicitantes e outros posibles interesados.

Artigo 24º.-Modificacións do proxecto.

1. Calquera modificación que implique un cambio de titularidade da entidade promotora, ou dos obxectivos e actuacións básicas do proxecto que sexan considerados como substanciais, deberá ser solicitada segundo o procedemento indicado anteriormente.

2. De teren as modificacións o dito carácter de substanciais, as delegacións provinciais remitirán as solicitudes, cando o informe técnico sexa favorable, á Dirección Xeral de Promoción do Emprego para que esta ditamine sobre a procedencia da modificación pretendida. A súa resolución correspóndelles aos/ás delegados/as provinciais, por delegación da conselleira de Asuntos Sociais, Emprego e Relacións Laborais.

Os mencionados cambios deberán responder a causas excepcionais debidamente xustificadas que así o exixan.

3. Para a tramitación do cambio de titularidade, a entidade promotora titular deberá presentar ante a correspondente delegación provincial a seguinte documentación:

-Solicitude de aceptación da súa renuncia e de cambio de titularidade do proxecto, debidamente xustificada.

-Escrito de aceptación do cambio de titularidade pola nova entidade, xunto coa documentación exixible a teor do previsto no artigo 18º.

-Balances dos dereitos e obrigas que se transfiren e de situación e xustificación das subvencións recibidas da Consellería de Asuntos Sociais, Emprego e Relacións Laborais.

-Acta conxunta na cal se acepta a liquidación e transferencia dos dereitos e obrigas co visto e prace do delegado provincial da Consellería de Asuntos Sociais, Emprego e Relacións Laborais.

4. As solicitudes de modificacións non esenciais non precisarán do ditame de procedencia da Dirección Xeral de Promoción do Emprego para seren resoltas pola delegación provincial. Da resolución que se dite enviarase copia á dita dirección xeral.

Capítulo V

Financiamento e xustificación de subvencións

Artigo 25º.-Financiamento e obxecto da subvención.

1. O programa de obradoiros de emprego será financiado con cargo aos orzamentos xerais da Comunidade Autónoma a través das axudas e subvencións que conceda a Consellería de Asuntos Sociais, Emprego e Relacións Laborais, ou ben directamente con medios propios con cargo ás partidas orzamentarias correspondentes.

2. As aplicacións orzamentarias coas que se financiarán, entre outras, as anteditas axudas e subvencións son as 16.02.241-A.460.2 e 16.02.241-A.480.0 dos orzamentos xerais da Comunidade Autónoma de Galicia para 2005, e polos importes respectivos de 11.915.718 euros e 770.000 euros.

Para exercicios futuros as subvencións financiaranse con cargo ás aplicacións 16.02.241-A.460.2 e 16.02.241-A.480.0 que, para 2006, serán de 9.000.000 de euros e 2.000.000 de euros, respectivamente. Estes importes poderán ser incrementados ou minorados en función das solicitudes que se presenten e das axudas e subvencións que efectivamente se concedan.

3. As axudas e subvencións que conceda a Consellería de Asuntos Sociais, Emprego e Relacións Laborais para cada obradoiro de emprego, e que se determinarán na resolución que aprobe o proxecto, destinaranse exclusivamente a sufragar os seguintes custos:

a) Os de formación profesional ocupacional e, se é o caso, educación básica durante as etapas do proxecto.

b) Os salariais derivados dos contratos que se subscriban cos alumnos-traballadores dos obradoiros de emprego.

4. En ningún caso o importe da subvención concedida poderá ser de tal contía que, illadamente ou en concorrencia con subvencións ou axudas doutras administracións públicas ou doutros entes públicos ou privados, nacionais ou internacionais, supere o custo do proxecto.

Artigo 26º.-Subvención para custos de formación ocupacional e educación básica.

1. Consideraranse como custos de formación ocupacional e, se é o caso, de educación básica, susceptibles de seren subvencionados:

-Os custos derivados da contratación do director, docentes e persoal de apoio.

-Os medios e materiais didácticos e de consumo para a formación.

-As amortizacións de instalacións e equipamentos. Para o seu cálculo utilizaranse as táboas de coeficientes anuais de amortización oficialmente establecidas.

-As viaxes para a formación dos alumnos-traballadores.

-Os materiais de oficina.

-Aluguer de instalacións, maquinaria e equipos, excluído o leasing.

-Os gastos xerais.

-Se é o caso, o importe da póliza de responsabilidade civil para facer fronte aos riscos que para os bens e as persoas poidan derivar da actuación profesional do persoal do obradoiro de emprego durante todo o funcionamento do proxecto.

-Outros gastos de funcionamento que sexan necesarios para o desenvolvemento do proxecto formativo.

2. Non poderán financiarse con cargo á subvención concedida:

-As indemnizacións por morte e as correspondentes a traslados, suspensións, despedimentos, cesamentos ou finalizacións de contratos.

-Os gastos de investimento tales como a adquisición de inmobles, instalacións, maquinarias ou equipamentos.

-Os alugueres de edificios, locais, naves, aulas ou o seu acondicionamento, sempre que non sexa resultado da práctica profesional dos alumnos-traballadores participantes.

-Os gastos financeiros xerados por avais, anticipos bancarios ou análogos.

Artigo 27º.-Cálculo da subvención para custos de formación ocupacional e educación básica.

1. Para os efectos do previsto no artigo anterior, o cálculo da subvención efectuarase por hora/alumno-traballador de formación e por módulos e fases:

-Módulo A: mediante este módulo compensaranse os custos salariais do director, docentes e persoal de apoio que fosen seleccionados e contratados para o obradoiro de emprego, incluídos os orixinados polas cotas por conta do empregador, derivados de continxencias comúns e profesionais, Fondo de Garantía Salarial, desemprego e formación profesional.

-Módulo B: con este módulo compensaranse os demais gastos enumerados no punto 1º do artigo anterior. Dado que os alumnos-traballadores reciben formación teórica ou teórico-práctica, durante toda a xornada, consideraranse horas formativas as correspondentes á súa totalidade.

2. Para o ano 2005 establécense os seguintes importes:

-Módulo A: 2,73 euros/hora/alumno.

-Módulo B: 0,77 euros/hora/alumno.

O incremento destes módulos para anos sucesivos será do 3% anual, mentres non se dite disposición en contrario.

3. A contía dos anteditos módulos é única para cada fase, aínda que se desenvolva en dous exercicios anuais distintos, e será a que corresponda á data de inicio da fase.

4. O importe do módulo A ten en consideración a relación dun docente a xornada completa por cada oito alumnos-traballadores.

O importe da subvención prevista para gastos de formación e funcionamento en cada fase será o equivalente ao resultado de multiplicar o valor dos módulos A e B polo número de alumnos-traballadores participantes e polo total de horas considerando a xornada completa.

Artigo 28º.-Subvención para custos salariais dos alumnos-traballadores.

Nos contratos para a formación que a entidade promotora subscriba cos alumnos-traballadores participantes, a Consellería de Asuntos Sociais, Emprego e Relacións Laborais subvencionará o 150% do salario mínimo interprofesional anualmente establecido, incluída a parte proporcional de dúas pagas extraordinarias. Así mesmo, tamén subvencionará a totalidade das cotas a cargo do empregador, correspondentes á Seguridade Social, Fondo de Garantía Salarial e Formación Profesional previstas para os ditos contratos na súa normativa específica.

Artigo 29º.-Actualización da subvención.

O importe das cantidades efectivas que se aboarán en cada fase estará en función do incremento anual do valor dos módulos, do salario mínimo interprofesional e das cotizacións á Seguridade Social vixentes, do número de alumnos-traballadores participantes en cada fase e da xustificación dos gastos subvencionados na fase anterior.

Artigo 30º.-Produción de bens e servizos.

Cando os obradoiros de emprego, no desenvolvemento da súa actividade, produzan bens que sexan susceptibles de comercialización, poderán allearse, sempre que non se incorra en competencia desleal e se dispoña das autorizacións necesarias. Os ingresos procedentes de tales alleamentos ou da prestación de servizos deberán aplicarse ás actividades do obradoiro de emprego, debendo quedar constancia documental e contable tanto dos ingresos obtidos como do seu destino.

Artigo 31º.-Convenios de colaboración.

As entidades promotoras poderán subscribir convenios de colaboración con outras entidades públicas ou privadas, mediante os cales se comprometan a achegar parte ou a totalidade do custo do proxecto, descontándose estas achegas da subvención que poida conceder a Consellería de Asuntos Sociais, Emprego e Relacións Laborais. Esta circunstancia farase constar na memoria prevista no artigo 18º, letra i).

Artigo 32º.-Pagamento da subvención.

1. Correspóndelles ás delegacións provinciais da Consellería de Asuntos Sociais, Emprego e Relacións Laborais o pagamento das subvencións concedidas, logo da solicitude da entidade promotora, no modelo que para o efecto estableza a Dirección Xeral de Promoción do Emprego, por períodos semestrais e en función das fases do proxecto que se indiquen na resolución de concesión.

2. Con carácter xeral, acreditado o inicio do primeiro período pola entidade promotora, mediante a oportuna certificación, aboaráselle a esta, en concepto de anticipo, unha cantidade equivalente ao custo subvencionado correspondente a ese período, que, en ningún caso, poderá superar o 50% do importe total da subvención.

Rematada a fase anterior e logo da xustificación de gastos, no prazo dun mes contado desde a data da súa solicitude, aboaráselle ao promotor, en concepto de pagamento a conta da liquidación definitiva e a medida que o beneficiario xustifique os gastos, unha cantidade equivalente ao custo subvencionado correspondente ao segundo período, sen que en ningún caso se supere o límite do 80% do importe dos libramentos non xustificados pola entidade promotora, de acordo co establecido no artigo 34º.

3. Cando o obradoiro de emprego conste dunha fase, e unha vez acreditado o seu inicio na forma prevista no número 2º, aboaráselle á entidade promotora, en concepto de anticipo, unha cantidade equivalente ao 50% do importe total da subvención para o conxunto do proxecto.

Neste caso, despois de recibida a súa solicitude, poderáselle aboarse ao promotor, en concepto de pagamento a conta e a medida que o beneficiario xustifique os gastos, unha cantidade equivalente ao 30% do importe total da subvención para o conxunto do proxecto.

4. O 20% ou, se é o caso, o 50% restante aboaráselle á entidade promotora unha vez rematado o obradoiro de emprego, xustificados todos os gastos e presentada a acta de liquidación do expediente nos termos dispostos nos artigos 34º e 36º.

5. No momento da xustificación da execución total do proxecto e, en calquera caso, antes do derradeiro pagamento, o beneficiario presentará unha declaración complementaria do conxunto das axudas solicitadas, tanto as aprobadas ou concedidas coma as pendentes de resolución, para o mesmo proxecto, das distintas administracións públicas competentes ou das súas entidades vinculadas ou dependentes.

Artigo 33º.-Garantías.

1. No suposto de que as entidades promotoras teñan a condición xurídica de entes de dereito privado, con carácter previo á recepción dos libramentos previstos no artigo anterior, deberán constituír a favor da Consellería de Asuntos Sociais, Emprego e Relacións Laborais garantía para responder da correcta

aplicación da subvención concedida, na forma e condicións previstas no artigo 17 do Decreto 287/2000, do 21 de novembro, polo que se desenvolve o réxime de axudas e subvencións públicas da Comunidade Autónoma de Galicia.

2. A garantía será liberada cando sexa acreditado que a subvención concedida se aplicou á finalidade prevista e que foron xustificadas correctamente as cantidades percibidas en tal concepto.

Artigo 34º.-Forma de xustificación.

1. A entidade promotora, dentro do mes seguinte ao remate de cada fase ou período considerado, remitirá á delegación provincial da Consellería de Asuntos Sociais, Emprego e Relacións Laborais os xustificantes dos pagamentos efectuados con cargo aos fondos recibidos. A xustificación presentarase segundo o detalle indicado nos modelos que estableza a Dirección Xeral de Promoción do Emprego, non podendo efectuarse compensacións entre os distintos conceptos (módulos A e B e salarios dos alumnos-traballadores participantes). Así mesmo, xuntarase relación dos pagamentos realizados con identificación dos perceptores e detalle das cantidades aboadas.

Unha vez verificada a xustificación por gastos efectuados, e no caso de ser inferior á cantidade establecida como subvención máxima xustificable no artigo seguinte, axustarase o correspondente saldo na próxima transferencia que se vaia efectuar.

2. A xustificación por horas realizadas deberá efectuarse mediante unha relación dos alumnos-traballadores participantes no período que se xustifica, con expresión das súas datas de alta e baixa, xunto coas copias dos seus contratos de traballo, prórrogas e partes de baixa na Seguridade Social.

Para a xustificación dos custos salariais dos alumnos-traballadores participantes, que se efectuará en función dos contratos efectivamente formalizados e pola duración correspondente en cada fase, será necesario achegar a documentación indicada no parágrafo anterior.

A antedita documentación deberá xuntarse á solicitude de transferencia de fondos correspondentes á seguinte fase, segundo o modelo que para o efecto estableza a Dirección Xeral de Promoción do Emprego.

3. Cando as entidades promotoras sexan organismos públicos, consideraranse documentos xustificativos dos pagamentos efectuados as certificacións expedidas para o efecto polos órganos competentes, en que consten detallados os pagamentos correspondentes a cada unha das partidas subvencionadas. Igualmente, deberán achegar relación dos xustificantes de gastos e pagamentos realizados con cargo ao módulo B.

En calquera caso, os documentos xustificativos individualizados deberán quedar dispoñibles para as actuacións de comprobación e control.

4. As asociacións, fundacións e entidades sen ánimo de lucro presentarán documentos xustificativos individualizados dos pagamentos efectuados.

5. No caso de que non se xustifique segundo o previsto nos puntos anteriores, non se realizarán novas provisións de fondos e procederase á reclamación das cantidades non xustificadas de conformidade co procedemento establecido para o efecto.

Artigo 35º.-Subvención máxima xustificable.

A subvención máxima que en cada período se pode admitir como xustificada por gastos de formación e funcionamento, para cada un dos módulos A e B, non poderá exceder do que resulte de multiplicar o número de horas realizadas por cada módulo. Para estes efectos, tamén serán consideradas como horas efectivas as dos alumnos-traballadores que abandonen o proxecto e polo tempo comprendido entre a data da súa baixa e o remate do período ou, se é o caso, a data de alta do alumno-traballador que substitúa a dita baixa e as correspondentes aos días lectivos non asistidos. Igualmente, asimilaranse a horas de formación efectivamente impartidas as correspondentes aos períodos de vacacións anuais retribuídos, desfrutados polos alumnos-traballadores participantes, establecidos legal ou convencionalmente.

Artigo 36º.-Liquidación do expediente.

1. Dentro do mes seguinte ao remate do obradoiro de emprego, a entidade promotora remitirá á delegación provincial da Consellería de Asuntos Sociais, Emprego e Relacións Laborais, nos modelos que estableza a Dirección Xeral de Promoción do Emprego, a seguinte documentación:

-Xustificación dos pagamentos efectuados con cargo aos fondos correspondentes á segunda ou única fase, segundo proceda.

-Relación de gastos realizados e os correspondentes xustificantes de pagamento.

-Acta de liquidación e cadro-resumo de xustificantes de gastos.

2. Despois de verificada a xustificación presentada, e no caso de acordo, a delegación provincial da Consellería de Asuntos Sociais, Emprego e Relacións Laborais dará a súa conformidade aos documentos antes sinalados, ao mesmo tempo que procede ao aboamento das cantidades previstas no artigo 32º.4 e, se é o caso, expide o certificado necesario para liberar a garantía constituída.

No suposto de desconformidade ou discrepancia, a delegación provincial descontará do pagamento do 20% restante as cantidades non xustificadas.

3. Revisada a xustificación, e de existir un saldo positivo a favor da Consellería de Asuntos Sociais, Emprego e Relacións Laborais, a delegación provincial iniciará o procedemento establecido para o reintegro das cantidades non xustificadas.

4. En todo caso, no prazo de tres meses posteriores á finalización da actividade do obradoiro de emprego, a delegación provincial da Consellería de Asuntos Sociais, Emprego e Relacións Laborais remitirá á Dirección Xeral de Promoción do Emprego a documentación sinalada na letra c) do punto 1º deste artigo.

Capítulo VI

Obrigas, seguimento e control

Artigo 37º.-Obrigas.

As entidades beneficiarias das subvencións previstas nesta orde, ademais de cumprir as obrigas establecidas pola normativa aplicable con carácter xeral ás axudas e subvencións públicas, deberán:

a) Realizar as actividades para as que se concede a subvención, de conformidade coas disposicións previstas nesta orde e nas resolucións, instrucións ou circulares que a desenvolvan.

b) Acondicionar e dotar as instalacións de xeito que reúnan as condicións de seguridade e saúde laboral que permitan o normal desenvolvemento das actividades formativas desde o inicio da actividade do obradoiro de emprego.

c) Contratar os alumnos-traballadores desde o inicio da súa participación no obradoiro de emprego, na modalidade contractual prevista no artigo 14º desta orde, e formalos nos aspectos teóricos e prácticos das actividades profesionais ou oficios obxecto do programa.

d) Acreditar ante a Consellería de Asuntos Sociais, Emprego e Relacións Laborais a realización das actividades e o cumprimento dos requisitos exixidos para a concesión da axuda ou subvención, achegando a documentación que lles sexa requirida co fin de comprobar o cumprimento das obrigas que derivan da dita concesión.

e) Someterse ás actuacións de comprobación efectuadas pola Consellería de Asuntos Sociais, Emprego e Relacións Laborais e ás da Inspección de Traballo e Seguridade Social, ás de control financeiro que corresponden á Intervención Xeral da Comunidade Autónoma, ás previstas na lexislación do Consello de Contas e ás que poidan corresponder, no suposto de cofinanciamento polo Fondo Social Europeo, á Comisión e Tribunal de Contas das Comunidades Europeas.

f) Comunicar á Consellería de Asuntos Sociais, Emprego e Relacións Laborais a obtención doutras subvencións ou axudas para a mesma finalidade, procedentes de calquera outra Administración ou ente público nacional ou internacional, no momento de presentar a solicitude, así como con ocasión da xustificación da execución total do proxecto e, en todo caso, antes do derradeiro pagamento.

g) Identificar convenientemente, para os efectos de difusión pública, a sede do proxecto así como as actividades e as obras e servizos que se realicen,

tendo en conta que as súas actividades de publicidade e divulgación se adecuarán á normativa correspondente e ás previsións do Fondo Social Europeo. Así mesmo, nas realizacións de carácter permanente que leven a cabo os obradoiros de emprego, colocarase unha placa identificativa seguindo os modelos e características que estableza a Dirección Xeral de Promoción do Emprego.

h) Satisfacer, ao seu vencemento, as obrigas económicas que deriven do funcionamento do proxecto subvencionado, especialmente as de carácter salarial, con independencia de que se percibise con anterioridade a subvención concedida.

Artigo 38º.-Incumprimento de obrigas. Reintegro da subvención.

O incumprimento total ou parcial por parte da entidade beneficiaria das obrigas establecidas nesta orde así como na demais normativa aplicable ao programa de obradoiros de emprego e, con carácter xeral, ás axudas e subvencións públicas que se outorguen con cargo aos orzamentos xerais da Comunidade Autónoma de Galicia, orixinará, tendo en consideración a natureza e causas do incumprimento e a súa incidencia na formación e cualificación profesional dos alumnos-traballadores participantes, o reintegro total ou parcial das cantidades recibidas en concepto de axudas ou subvencións máis os xuros de demora, sen prexuízo do establecido no texto refundido da Lei sobre infraccións e sancións na orde social, aprobado polo Real decreto lexislativo 5/2000, do 4 de agosto.

Artigo 39º.-Asistencia, seguimento e avaliación.

1. As delegacións provinciais da Consellería de Asuntos Sociais, Emprego e Relacións Laborais son os órganos encargados de realizar as tarefas de supervisión, coordinación, asistencia técnica, seguimento e control da xestión dos obradoiros de emprego así como das axudas e subvencións concedidas.

2. Ademais de tramitar e resolver o expediente de solicitude e, de ser o caso, transferir os fondos correspondentes, deben realizar, na forma e cos procedementos que estableza a Dirección Xeral de Promoción do Emprego, as seguintes actuacións:

a) Asistencia, apoio e asesoramento técnico e administrativo tanto á entidade promotora na preparación do proxecto coma ao propio obradoiro de emprego na realización das actividades para as que se concede a subvención, para conseguir o éxito do proxecto: creación de emprego; cualificación, adquisición de experiencia e inserción laboral, así como a correcta realización e desenvolvemento dos traballos e actividades previstas.

b) Seguimento da xestión, obtendo dos obradoiros de emprego a información referente aos seus alumnos-traballadores, persoal directivo, docente e de apoio e calquera outro dato que se considere de interese para o seguimento puntual da xestión, especialmente daqueles que serviron de base para a concesión da subvención.

c) Control das axudas e subvencións concedidas e liquidación do expediente.

d) Control dos resultados obtidos polo obradoiro de emprego. Para estes efectos, aos seis e doce meses da súa finalización a entidade promotora remitirá, debidamente cuberto, o cuestionario de inserción laboral, ademais de estar obrigada a proporcionar calquera outra información que se considere pertinente con tal finalidade.

Disposicións adicionais

Primeira.-As axudas e subvencións ao programa de obradoiros de emprego son cofinanciadas pola Unión Europea, a través do Fondo Social Europeo, mediante o Programa Operativo de Obxectivo 1 número 2000ES051PO017 que configura o Marco Comunitario de Apoio 2000/2006, conforme as decisións de aprobación da Comisión Europea e cun cofinanciamento do 65% da totalidade dos gastos de formación e funcionamento e custos salariais de alumnos-traballadores participantes.

Segunda.-A concesión das axudas e subvencións reguladas por esta orde, estará supeditada á existencia de crédito nas aplicacións orzamentarias 16.02.241-A.460.2 e 16.02.241-A.480.0 dos orzamentos xerais da Comunidade Autónoma de Galicia de 2005.

As entidades sinaladas no artigo 3º, alíneas a) e b), desta orde poderán obter a concesión das referidas axudas e subvencións, logo de existencia de crédito nas aplicacións orzamentarias que, polo carácter das ditas entidades, corresponda. Para tales fins, realizaranse as oportunas modificacións orzamentarias.

Terceira.-Os créditos correspondentes a subvencións que conteñan fases que se inicien en exercicios futuros, terán o carácter de plurianuais, de conformidade co preceptuado polo artigo 58.1º b) do texto refundido da Lei de réxime financeiro e orzamentario de Galicia e no acordo do Consello da Xunta de Galicia, adoptado na súa sesión do 28 de xaneiro de 2005.

Cuarta.-Os créditos previstos para o financiamento das axudas e subvencións que se concedan ao abeiro desta orde, poderán ser obxecto de modificación como consecuencia da asignación ou da redistribución dos fondos destinados a custear os programas de fomento do emprego, coas limitacións que establezan a Conferencia Sectorial de Asuntos Laborais ou as disposicións aplicables ás axudas e subvencións cofinanciadas polo Fondo Social Europeo.

Quinta.-Apróbase a delegación de atribucións da conselleira de Asuntos Sociais, Emprego e Relacións Laborais nos/as delegados/as provinciais, no ámbito das súas respectivas provincias, para resolver a concesión ou denegación das axudas e subvencións previstas nesta orde, aprobación ou denegación das modificacións dos proxectos así como para autorizar,

dispoñer, recoñecer a obriga e propoñer os correspondentes pagamentos.

Sexta.-Se por calquera causa, no momento que a comisión central de valoración teña que examinar as solicitudes, algún dos seus compoñentes non puidese asistir, será substituído pola persoa que sexa designada pola conselleira de Asuntos Sociais, Emprego e Relacións Laborais.

Sétima.-As entidades beneficiarias das axudas e subvencións previstas nesta orde están suxeitas ao réxime de infraccións e sancións en materia de subvencións, de conformidade co previsto no artigo 79 do texto refundido da Lei de réxime financeiro e orzamentario de Galicia.

Oitava.-Por resolución do director xeral de Promoción do Emprego poderanse establecer os criterios necesarios para que, a través desta orde, en canto aos colectivos prioritarios, se poidan cumprir os obxectivos establecidos polo Servizo Público de Emprego de Galicia, de acordo coas directrices de emprego europeas e o Plan Nacional de Acción para o Emprego e a demais normativa e acordos que, se é o caso, resulten de aplicación.

Novena.-Por resolución do director xeral de Promoción do Emprego estableceranse as pautas de actuación a seguir na selección do persoal directivo, docente e de apoio e dos alumnos traballadores participantes nos obradoiros de emprego.

Disposicións transitorias

Primeira.-Os obradoiros de emprego en funcionamento á entrada en vigor desta orde, continuarán rexéndose pola normativa ao abeiro da cal foron aprobados.

Segunda.-As solicitudes presentadas ao abeiro da Orde do 8 de marzo de 2004 e que non se resolvesen dentro de 2004, así como as presentadas entre o 1 de xaneiro de 2005 e a data de entrada en vigor desta orde, poderán resolverse no exercicio de 2005, sempre que reúnan os requisitos exixidos por esta norma. Para estes efectos, será suficiente con que a entidade solicitante presente cuberto o modelo que, como anexo I a esta orde, figura coa referencia Solicitude S-1.

Disposicións derradeiras

Primeira.-Autorízase o director xeral de Promoción do Emprego para ditar, no ámbito das súas competencias, as resolucións e instrucións necesarias para o desenvolvemento e a execución desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 31 de xaneiro de 2005.

Belén Prado Sanjurjo

Conselleira de Asuntos Sociais, Emprego

e Relacións Laborais