Rogelio López Rodríguez en nome e representación da sociedade Pizarras Trevinca, S.A., solicitou da Consellería de Innovación, Industria e Comercio da Xunta de Galicia, a incoación dun expediente de expropiación forzosa polo procedemento de urxencia dos terreos necesarios para proseguir os labores de explotación das concesións mineiras Queivane III nº 4286 e Lavandeira nº 4276, sitas en Carballeda de Valdeorras (Ourense).
Os bens aos que fai referencia a declaración de urxente ocupación están determinados no expedien
te, o cal foi sometido ao trámite de información pública, sendo ademais realizadas notificacións individuais aos interesados dos predios afectados.
A solicitude foi efectuada conforme o disposto no artigo 105 da Lei 22/1973, do 21 de xullo, de minas, en relación co artigo 131 do regulamento que desenvolve a citada lei, así como o artigo 52 da Lei de expropiación forzosa do 16 de decembro de l954 e o artigo 56 do seu regulamento, do 28 de abril de 1957.
Como consecuencia da información pública e das notificacións individuais, foron presentados escritos de alegacións, procedendo a desestimación destas, xa que non desvirtúan as razóns obxectivas polas cales neste momento é urxente a ocupación dos predios para evitar a paralización dos traballos de explotación na concesión de referencia, todo iso en función do que consta no informe da Delegación Provincial de Industria de Ourense e na memoria-proposta da Subdirección Xeral de Recursos Minerais.
A expropiación está xustificada e é de todo punto necesaria e ademais polo procedemento de urxencia, xa que permitirá proseguir o aproveitamento racional do xacemento mantendo as regulamentarias condicións de seguridade mineira.
De acordo co plan de labores presentado e aprobado, aos predios obxecto de expropiación están afectados para realizar os labores de desmonte necesarios, posto que a extracción actual está alcanzado os límites de altura regulamentarios, necesarias para garantir a súa estabilidade e seguridade, sendo esta a única alternativa posible para manter a actividade da explotación, polo que a desestimación da petición acarrearía graves trastornos ao concesionario, tanto de orde técnica e económica, como de seguridade, segundo o sinalado precedentemente, así como unha influencia negativa na economía da comarca polo impacto que nela causaría a perda de postos de traballo.
Na súa virtude, por proposta do conselleiro de Innovación, Industria e Comercio e logo de deliberación do Consello da Xunta de Galicia, na súa reunión do trece de xaneiro de dous mil cinco
DISPOÑO:
Artigo único.-Declárase urxente, segundo o mencionado artigo 105 da Lei de minas e para os efectos dispostos no artigo 52 da Lei de expropiación forzosa, a ocupación dos predios aos que se contrae o expediente e definidos nel, sitos no termo municipal de Carballeda de Valdeorras (Ourense), definidas nos planos presentados e das que se publicou a súa relación nos boletíns correspondentes, predios que é necesario expropiar para dar continuidade ao laboreo das concesións mineiras Queivane III nº 4286 e Lavandeira nº 4276.
Santiago de Compostela, trece de xaneiro de dous mil cinco.
Manuel Fraga Iribarne
Presidente
Juan Rodríguez Yuste
Conselleiro de Innovación, Industria e Comercio