A institucionalización por parte da Real Academia Galega, a partir de 1963, do día 17 de maio como o Día das Letras Galegas, foi, sen dúbida, un acontecemento que, ano tras ano, colleu pulo e resonancia na nosa sociedade, de tal xeito que, en toda a Comunidade Autónoma galega se proxecta a figura homenaxeada e serve, ao mesmo tempo, para reflexionar sobre Galicia, sobre a súa lingua e sobre a súa cultura.
A Real Academia Galega tomou como punto de partida, para a celebración desta efeméride, a publicación, no ano 1863, de Cantares Gallegos, de Rosalía de Castro.
O Goberno galego declara, a través do Decreto 1/2005, do 7 de xaneiro, o ano 2005 como ano de Lorenzo Varela.
Escritor e dinamizador. Mantívose dentro dos círculos vinculados a Galicia, cun contacto permanente cos membros máis destacados do pensamento galego, cos que desenvolveu un labor de fundación e promoción de proxectos, nos que se inclúen revistas, edicións e espazos radiofónicos, ademais de manter unha actividade de creación poética durnate toda a súa vida.
Por todo isto, a Consellería de Educación e Ordenación Universitaria
DISPÓN:
Primeiro.-Durante o mes de maio destacarase en todos os centros docentes situados na Comunidade Autónoma galega a importancia que ten para Galicia o Día das Letras Galegas.
Segundo.-O profesorado, de acordo coa liña que estableza o consello escolar de cada centro, programará as actividades que considere oportunas para un mellor coñecemento do persoeiro ao que se lle dedica esta data.
Terceiro.-En calquera caso, dedicarase polo menos unha hora, en cada un dos grupos de cada curso, ao desenvolvemento dunha lección ou conferencia coloquio, adaptada á idade do alumnado, na que se poña de manifesto a importancia que ten para Galicia a nosa lingua, facendo referencia ao poeta e dinamizador cultural homenaxeado este ano, Lorenzo Varela.
Santiago de Compostela, 19 de xaneiro de 2005.
Celso Currás Fernández
Conselleiro de Educación e Ordenación Universitaria