Dentro do plan de actividades da Escola Galega de Administración Pública para o 2005 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse unhas xornadas sobre o sector ferroviario, conforme as seguintes bases:
1. Obxectivos.
Poñer ao día formativamente os profesionais, os empregados públicos e persoas con especial interese no campo ferroviario e no ámbito dos servizos públicos, mediante a exposición a debate dos temas máis candentes no sector a partir das políticas de liberalización iniciadas nos últimos anos. Combínase a formulación teórica coa experiencia práctica dos relatores, para conseguir o necesario equilibrio entre o rigor académico e a proximidade aos problemas reais que acostuman preocupar o operador xurídico ou técnico.
O obxectivo destes sete relatorios é ofrecer unha visión, nun momento de cambio, do panorama xurídico do ferrocarril en España, con especial incidencia no modelo autonómico e, en particular, referencia á Comunidade Autónoma galega.
2. Contido.
Trataranse estes temas:
-A distribución competencial no marco do sector ferroviario.
-Encadramento do novo concepto de servizo público e a súa repercusión no sector ferroviario.
-A integración da Lei do sector ferroviario no sistema administrativo español.
-A liberación ferroviaria e a Lei 39/2003, do sector ferroviario.
-Os axentes do transporte ferroviario no novo marco regulador.
-Urbanismo e liberación do sector ferroviario.
-A rede ferroviaria galega.
3. Destinatarios.
Persoal ao servizo da Xunta de Galicia e da Administración local galega e interesados en xeral.
4. Desenvolvemento.
-Horario: mañá e tarde.
-Lugar e data: as xornadas convocadas desenvolveranse no salón de actos da Delegación de Presidencia na Coruña, sita na praza de Pontevedra nº 22, da citada cidade os días 15 e 16 de febreiro de 2005.
5. Inscrición.
-Prazo: remata o venres 11 de febreiro de 2005.
-Tramitación de solicitudes: as solicitudes irán dirixidas ao director da Escola Galega de Administración Pública, Polígono das Fontiñas, rúa de Madrid, 2-4, 15707, Santiago de Compostela, segundo o modelo que figura como anexo a esta convocatoria, e presentaranse no rexistro xeral da EGAP, ou por calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Admitiranse tamén inscricións por telefax: 981 54 63 30.
-Número de prazas: limitado á capacidade do local.
-Inscricións fóra de prazo: só se admitirán, de quedaren prazas baleiras, coa condición de que se cumpran os requisitos xerais antes indicados.
Os peticionarios poderán obter confirmación da súa posible admisión, chamando por teléfono, o día 14 de febreiro, de 8.30 a 14.30 horas, aos seguintes números: 981 54 62 39/44 ou 981 54 60 40.
6. Modificacións.
A EGAP reserva para si a facultade de interpretar e de resolver as incidencias que puidesen xurdir no desenvolvemento das xornadas, así como a de cancelalas, se o escaso número de solicitudes non xustificase a súa realización.
7. Certificación de asistencia.
Entregaráselles, ao remate das xornadas, a aquelas persoas inscritas que concorresen asiduamente a el, cando a súa asistencia sexa igual ou superior ao 85% das horas lectivas programadas, e expresarase neste documento a natureza da actividade e as datas da súa realización.
Santiago de Compostela, 20 de xaneiro de 2005.
Domingo Bello Janeiro
Director da Escola Galega de Administración
Pública
CONSELLERÍA DA PRESIDENCIA, RELACIÓNS INSTITUCIONAIS
E ADMINISTRACIÓN PÚBLICA
